ໃນວັນທີ 28 ກໍລະກົດ 2023, ໜ່ວຍແມ່ຍິງສະຖານທູດລາວ ທີ່ ແບກແລງ ໄດ້ຈັດພິທີປາຖະກະຖາ ເພື່ອເຜີຍ ແຜ່ເອກະສານປະຫວັດມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວອັນພົ້ນເດັ່ນ ຂອງອົງການ ຈັດຕັ້ງສະຫະພັນແມ່ຍິງລາວ ຄົບຮອບ 68 ປີ, (20 ກໍລະກົດ 1955 - 20 ກໍລະກົດ 2023) ພາຍໃຕ້ການເປັນປະທານ ຂອງສະຫາຍ ນາງ ວານິດາ ວໍລະສານ, ພັນລະຍາເອກອັກຄະລັດຖະທູດລາວ ປະຈໍາ ເຢຍລະມັນ ໂດຍຕາງໜ້າໜ່ວຍ ແມ່ຍິງສະຖານທູດ ໃຫ້ກຽດບັນລະຍາຍ ເອກະສານປະຫວັດມູນເຊື້ອຂອງອົງການຈັດຕັ້ງສະຫະພັນແມ່ຍິງລາວດັ່ງກ່າວ ໂດຍມີການເຂົ້າຮ່ວມຂອງທ່ານ ໄມບົວ ໄຊຍະວົງ, ເອກອັກຄະລັດຖະທູດລາວ ປະຈໍາ ເຢຍລະມັນ, ເອື້ອຍນ້ອງແມ່ຍິງ ສະຖານທູດ, ອົງການຈັດຕັ້ງມະຫາຊົນ ແລະ ພະນັກງານສະຖານທູດລາວ ປະຈໍາ ແບກແລງ. ໃນໂອກາດດັ່ງກ່າວ, ປະທານ ໄດ້ຍົກໃຫ້ເຫັນເຖິງປະຫວັດມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວອັນພົ້ນເດັ່ນ ຂອງອົງການຈັດຕັ້ງຂອງສະຫະພັນແມ່ຍິງລາວ ຕະຫຼອດໄລຍະຜ່ານມາ, ບໍ່ວ່າຈະເປັນໃນໄລຍະຕໍ່ສູ້ກູ້ຊາດໃນເມືອກ່ອນ ກໍຄື ໃນໄລຍະແຫ່ງການສ້າງສາ ແລະ ພັດທະນາປະເທດຊາດ ໃນປັດຈຸບັນ, ຊຶ່ງເອື້ອຍນ້ອງແມ່ຍິງລາວ ຍາມໃດ ກໍ່ເຮັດວຽກຄ່ຽງບ່າຄຽງໄຫຼ່ກັບອ້າຍນ້ອງຊາຍ ປະກອບສ່ວນສ້າງຜົນງານຢ່າງບໍ່ຮູ້ອິດຮູ້ເມື່ອຍ ເພື່ອຍົກສູງບົດບາດ ຂອງແມ່ຍິງລາວ ຂຶ້ນສູ່ເວທີພາກພື້ນ ແລະ ສາກົນ.
ກ່ອນໜ້ານັ້ນ, ໜ່ວຍແມ່ຍິງສະຖານທູດລາວ ທີ່ ແບກແລງ ຍັງໄດ້ຈັດກິດຈະກໍາ ເພື່ອເປັນການຂໍ່ານັບຊົມເຊີຍ ວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ເຊັ່ນ: ຮ່ວມກັບສາມອົງການຈັດຕັ້ງມະຫາຊົນອອກແຮງງານລວມ ອະນາໄມໃນວໍລິເວນສໍານັກງານສະຖານທູດ ແລະ ໄດ້ໄປທັດສະນະສຶກສາ ຢູ່ ສະຖານທີທ່ອງທ່ຽວທີ່ສໍາຄັນ ທາງປະຫວັດສາດ ໃນຕົວເມືອງແບກແລງ ໂດຍການນຸ່ງຖືຊຸດແມ່ຍິງລາວບັນດາເຜົ່າ ເພື່ອເປັນການເຜີຍເເຜ່ຄວາມ ຫຼາກຫຼາຍທາງດ້ານວັດທະນະທໍາ ແລະ ການອະນຸລັກຮີດຄອງປະເພນີການນຸ່ງຖືຂອງແມ່ຍິງລາວ ໃຫ້ຕ່າງຊາດໄດ້ຮັບຮູ້. ນອກຈາກນັ້ນ, ຍັງໄປທັດສະນະສຶກສາ ຢູ່ ສວນປູກພືດກະສິກໍາ ແລະ ໝາກໄມ້ນາໆຊະນິດ ທີ່ ສວນ ອາມູຊີເມັນ (Amusement park) ເຊິ່ງເປັນລະດູການເກັບໝາກໄມ້ຂອງຊາວກະສິກອນທ້ອງຖິ່ນເຢຍລະມັນ.