ໃນວັນທີ 22 ສິງຫາ 2023, ທີ່ ສະຖານເອກອັກຄະລັດຖະທຸດ ແຫ່ງ ສປປ ລາວ ປະຈຳ ສສ ຫວຽດນາມ  ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກ ບໍລິສັດ ແຟຊັ່ນ Elise ຈຳກັດ  ເພື່ອສົ່ງໄປໃຫ້ປະຊາຊົນທີ່ທຸກຍາກຂອງລາວ, ໂດຍມີການເຂົ້າຮ່ວມຂອງ ທ່ານ ຈັນທະພອນ ຄໍາມະນີຈັນ, ທີ່ປຶກສາ, ຮອງຫົວໜ້າສຳນັກງານສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ Tokuo Yotaro, ຜູ້ອຳນວຍການບໍລິຫານ (Principal) ບໍລິສັດ ແຟຊັ່ນ Elise ຈຳກັດ ພ້ອມດ້ວຍພະນັກງານຂອງທັງສອງຝ່າຍ ເຂົ້າຮ່ວມ.

​ໂອກາດ​ນີ້​, ທ່ານ Tokuo Yotaro ໄດ້​ກ່າວສະ​ແດງ​ຄວາມ​ເປັນ​ຫ່ວງ​ເປັນ​ໄຍຕໍ່​ປະຊາຊົນລາວ ໂດຍສະເພາະແມ່ນຜູ້ທີ່ອາໄສຢູ່ເຂດພູດອຍ ແລະ ມີຄວາມຍິນດີທີ່ໄດ້ປະກອບສ່ວນເຄື່ອງ​ຊ່ວຍ​ເຫຼືອທີ່​ມອບໃນ​ຄັ້ງ​ນີ້ ຊຶ່ງເປັນ​ການ​ປະກອບ​ສ່ວນເປັນຄັ້ງທີ 2 ຈາກ ບໍລິສັດ ແຟຊັ່ນ Elise ຈຳກັດ.  ບໍລິສັດ ແຟຊັ່ນ Elise ຈຳກັດ ເປັນບໍລິສັດ ຜະລິດເຄື່ອງນຸ່ງ (ແຟຊັ່ນ) ທີ່ມີຄຸນນະພາບ ແລະ ມີຫ້າງຮ້ານຂາຍຢູ່ທົ່ວປະເທດຫວຽດນາມ ໂດຍສະເພາະແມ່ນຕົວເມືອງໃຫຍ່ຂອງຫວຽດນາມ.

ເຄື່ອງ​ທີ່​ນຳ​ມາມອບ​ຄັ້ງ​ນີ້​ ແມ່ນປະເພດເຄື່ອງນຸ່ງຂອງແມ່ຍິງລະດູໜາວ ຈຳນວນ 5.321 ໂຕ, ລວມມູນຄ່າຫຼາຍກວ່າ 10 ຕື້ດົ່ງ ​ເພື່ອ​ໄປໃຫ້ປະຊາຊົນທີ່ທຸກຍາກຂອງລາວ ທັງເປັນການສືບຕໍ່ປະກອບສ່ວນເສີມຂະຫຍາຍມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ, ຫວຽດນາມ-ລາວ.

​ທ່ານ ຈັນທະພອນ ຄໍາມະນີຈັນ ໄດ້ສະ​ແດງ​ຄວາມ​ຮູ້ບຸນຄຸນ ແລະ ຂອບ​​ອົກຂອບໃຈຢ່າງຈິງໃຈມາຍັງ ທ່ານ Tokuo Yotaro ແລະ ບໍລິສັດ ແຟຊັ່ນ Elise ຈຳກັດ ທີ່ໄດ້ນໍາເອົາເຄື່ອງຈໍານວນດັ່ງກ່າວໄປມອບໃຫ້ສະຖານທູດ ເພື່ອສົ່ງໄປຍັງປະຊາຊົນລາວ ຊຶ່ງຈະເປັນການສ້າງຄວາມຄຸ້ຍເຄີຍຂອງປະຊາຊົນລາວຕໍ່ກັບຍີ່ຫໍ້ສິນຄ້າດັ່ງກ່າວ ແລະ ຫວັງວ່າ ບໍລິສັດ ຈະສືບຕໍ່ຂະຫຍາຍທຸລະກິດໄປຍັງຕະຫລາດລາວໃນອະນາຄົດ. ທ່ານ ຈັນທະພອນ ຄໍາມະນີຈັນ ​​ຢືນຢັນ​ວ່າ ​ຈະ​ປະສານໄປຍັງພາກສ່ວນທີ່ກ່ຽວຂ້ອງຂອງລາວ ໃນການຈັດສົ່ງຕໍ່ໄປຍັງປະຊາຊົນລາວໃນເວລາອັນເໝາະສົມ.