ໃນວັນທີ 20 ມິຖຸນາ 2023, ສະຖາບັນການຕ່າງປະເທດ ໃນນາມຄະນະຮັບຜິດຊອບຊຸດຮຽນທິດສະດີການເມືອງ ຂັ້ນຕົ້ນ ຮ່ວມກັບ ຄູອາຈານຈາກສະຖາບັນການເມືອງ ແລະ ປົກຄອງແຫ່ງຊາດ ໄດ້ນໍາພາຜູ້ເຂົ້າຮຽນທິດສະດີການເມືອງ ຂັ້ນຕົ້ນ ຊຸດທີ I ສຳລັບພະນັກງານກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ຈຳນວນ 62 ທ່ານ ໄປເຄື່ອນໄຫວທັດສະນະສຶກສາຢູ່ເມືອງສັງທອງ, ນະຄອນຫລວງວຽງຈັນ ໂດຍໃຫ້ກຽດຕ້ອນຮັບຂອງ ທ່ານ ພົງສະຫວັນ ສີລິພັນ, ກຳມະການຄະນະພັກ ນະຄອນຫຼວງວຽງຈັນ, ເລຂາພັກເມືອງ, ເຈົ້າເມືອງ ເມືອງສັງທອງ ພ້ອມດ້ວຍຄະນະນຳເມືອງ ແລະ ຫົວໜ້າຂະແໜງການກ່ຽວຂ້ອງພາຍໃນເມືອງ.

ຈຸດປະສົງການລົງຮາກຖານທັດສະນະສຶກສາຄັ້ງນີ້ ແມ່ນເພື່ອຮັບຟັງການລາຍງານສະພາບລວມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄໝ ກໍຄືການປະຕິບັດສອງວາລະແຫ່ງຊາດຂອງລັດຖະບານ ໂດຍສະເພາະຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ທີ່ເມືອງປະສົບພົບພໍ້ ເພື່ອເປັນຂໍ້ມູນໃຫ້ແກ່ຜູ້ເຂົ້າຮຽນທິດສະດີ ໄດ້ນໍາໄປຂຽນບົດເກັບກ່ຽວລາຍງານຂອງຕົນ ພ້ອມທັງສະເໜີວິທີທາງແກ້ໄຂແຕ່ລະບັນຫາ ຊ່ວຍເມືອງ ເພື່ອປັບປຸງໃຫ້ດີຍິ່ງໆຂື້ນ. 

ໃນໂອກາດດັ່ງກ່າວ, ຜູ້ເຂົ້່າຮຽນ ກໍໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມ ຂອງເມືອງຢ່າງສັງເຂບ ໂດຍປີ່ນອ້ອມທຸກບັນຫາທີ່ເມືອງສັງທອງ ກຳລັງສຸມໃສ່ ເປັນຕົ້ນ: ການປະຕິບັດສອງວາລະແຫ່ງຊາດ, ນະໂຍບາຍສາມສ້າງ, ນະໂຍບາຍສ້າງບ້ານພັດທະນາ, ບ້ານວັດທະນະທຳ ແລະ ບ້ານແບບຢ່າງ. ທຸກວຽກງານແມ່ນດໍາເນີນຢ່າງເປັນຂະບວນການ ແລະ ຟົດຟື້ນ. ນອກຈາກນັ້ນ, ຜູ້ເຂົ້າຮຽນ ຍັງໄດ້ລົງໄປເບິ່ງເຂດພັດທະນາກະສີກຳຂອງເມືອງ ໂດຍສະເພາະຟາມປູກຜັກປອດສານຜິດ ຂອງນັກທຸລະກິດລາວ ເຊິ່ງສາມາດສ້າງລາຍຮັບໄດ້ ເດືອນລະຫລາຍຮ້ອຍລ້ານກີບ.

ໃນໂອກາດລົງຢ້ຽມຢາມທັດສະນະສຶກສາຄັ້ງນີ້, ຊຸດຮຽນທິດສະດີການເມືອງ ກໍໄດ້ນໍາເອົາເຄື່ອງຊ່ວຍເຫຼືອອຸປະກອນການສຶກສາ ແລະ ກິລາ ເປັນມູນຄ່າ 17 ລ້ານກວ່າກີບ ໄປມອບໃຫ້ແກ່ 5 ໂຮງຮຽນປະຖົມຂອງເມືອງຄື: ໂຮງຮຽນປະຖົມສົມບູນ ບ້ານຫີນສິ່ວ, ບ້ານກ້ວຍ, ບ້ານຫ້ວຍຄຳ, ບ້ານອ່າງນ້ອຍ ແລະ ບ້ານ ນາໝ້ຽງ ເພື່ອຊ່ວຍເຫຼືອນ້ອງນັກຮຽນ ໃຫ້ໄດ້ມີອຸປະກອນການຮຽນ ໃນມື້ເປີດສົກຮຽນໃໝ່ທີ່ຈະມາເຖິງນີ້  ພ້ອມທັງເປັນການຊ່ວຍເຫຼືອແບ່ງເບົາ ພໍ່ແມ່ຜູ້ປົກຄອງ ໃນສະພາບເສດຖະກິດຫຍຸ້ງຍາກ ຝືດເຄືອງ.