ໃນໄລຍະກອງປະຊຸມ ຄັ້ງທີ 9 ຂອງລັດພາຄີຕໍ່ສົນທິສັນຍາເກືອດຫ້າມລະເບີດລູກຫວ່ານຈັດຂຶ້ນ, ແຕ່ວັນທີ 02-04 ກັນຍາ 2019, ທີ່ ນະຄອນເຊີແນວ, ໄດ້ມີການພິຈາລະນາການຂໍອະນຸມັດຕໍ່ໄລຍະເວລາ ການຈັດຕັ້ງປະຕິບັດມາດຕາ 3 ແລະ 4 ວ່າດ້ວຍພັນທະໃນການເກັບກູ້ລະເບີດທີ່ຕົກຄ້າງຈາກປາງສົງຄາມ ສຳລັບບັນດາປະເທດທີ່ບໍ່ສາມາດທໍາລາຍຄັງລະເບີດ ດັ່ງກ່າວ ແລະ ເກັບກູ້ລະເບີດບໍ່ທັນແຕກຕົກຄ້າງ ໃຫ້ຫມົດໄດ້ ພາຍໃນປີ 2020 ຕາມພັນທະທີ່ລະບຸໄວ້ໃນສອງມາດຕາດັ່ງກ່າວຂອງສົນທິສັນຍາ ອອກໄປຕື່ມອີກ 05 ປີ (2020-2025) ເຊິ່ງໃນນີ້ມີ 03 ປະເທດ ທີ່ໄດ້ສະເໜີຂໍຕໍ່ເວລາການທຳລາຍຄັງລະເບີດ ແລະ ເກັບກູ້ ຄື: ບູນກາລີ, ເຢຍລະມັນ ແລະ ສປປ ລາວ. ສໍາລັບກໍລະນີຂອງ ສປປ ລາວ ເຫດຜົນຂອງການຂໍຕໍ່ໄລຍະເວລາການເກັບກູ້ພາຍໃຕ້ມາດຕາ 4 ໃນຄັ້ງນີ້ ກໍແມ່ນຍ້ອນ ສປປ ລາວ ເປັນຫນຶ່ງໃນບັນດາປະເທດທີ່ມີລະເບີດບໍ່ທັນແຕກຕົກຄ້າງຫລາຍກວ່າຫມູ່ໃນໂລກ ເຊິ່ງກວມເອົາເຖິງ 1 ສ່ວນ 3 ຂອງເນື້ອທີ່ທັງຫມົດຂອງປະເທດ ແລະ ມີຈຳນວນຕົກຄ້າງຫລາຍເກີນກວ່າຄວາມສາມາດດ້ານທຶນຮອນ ແລະ ເຕັກໂນໂລຊີ ເພື່ອສາມາດເກັບກູ້ລະເບີດທີ່ມີຢູ່ໃນປະຈຸບັນ ໃຫ້ຫມົດໄດ້ພາຍໃນ 5 ປີ.

    ໃນຕອນເຊົ້າຂອງວັນທີ 08 ກັນຍາ 2019, ທີ່ສະຖານເອກອັກຄະລັດຖະທູດລາວ ປະຈຳ ສະຫະພັນ ຣັດເຊຍ ໄດ້ເປີດກອງປະຊຸມໃຫຍ່ຄັ້ງທີ I ຂອງໜ່ວຍສະຫະພັນແມ່ຍິງສະຖານທູດລາວ ປະຈໍາ ສ.ຣັດເຊຍ ຂຶ້ນຢ່າງເປັນທາງການ, ໂດຍການເຂົ້າຮ່ວມ ຂອງ ສະຫາຍ ສີວຽງເພັດ ເພັດວໍລະສັກ, ເລຂາໜ່ວຍພັກສະຖານທູດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສະຫະພັນ ຣັດເຊຍ ພ້ອມດ້ວຍຜູ້ຕາງໜ້າອົງການຈັດຕັ້ງມະຫາຊົນ (ແມ່ຍິງ, ກໍາມະບານ ແລະ ຊາວຫນຸ່ມ) ປະຈໍາ ສະຖານທູດລາວ ທີ່ ສ.ຣັດເຊຍ, ພະນັກງານສະຖານທູດ, ເອື້ອຍນ້ອງແມ່ຍິງສະຖານທູດ ແລະ ເອື້ອຍນ້ອງນັກສຶກສາທີ່ກຳລັງຮຽນຢູ່ນະຄອນຫຼວງມົດສະກູກໍ່ໄດ້ເຂົ້າຮ່ວມຢ່າງພ້ອມພຽງ.

ໃນຕອນບ່າຍຂອງວັນທີ 06 ກັນຍາ 2019, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ປາຣີ, ສ.ຝຣັ່ງ ໄດ້ຈັດກອງປະຊຸມຊາວພຸດສົງເຖຣາວາດຂຶ້ນ ໂດຍການເຂົ້າຮ່ວມຂອງ ພຣະຄູ ວິນັຍທອນ ສວັສດ໌ ຍານະພະໂລ (ນິດສັຍບັນດິຕ), ປະທານອົງການຄະນະສົງເຖຣະວາດລາວ ປະຈຳ ປະເທດຝຣັ່ງ-ເອີຣົບ; ທ່ານ ຢົງ ຈັນທະລັງສີ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ຝຣັ່ງ, ມີບັນດາເຈົ້າອະທິການ, ພຣະສົງຈາກບັນດາວັດລາວຢູ່ປະເທດຝຣັ່ງ ຈຳນວນ 19 ອົງ, ກຳມະການແນວລາວສ້າງຊາດຢູ່ປະເທດຝຣັ່ງ 03 ທ່ານ, ບັນດາຜູ້ອຸ້ມຊູວັດ ພ້ອມດ້ວຍພະນັກງານສະຖານທູດ ເຂົ້າຮ່ວມຈຳນວນ 60 ກວ່າຄົນ.