ໃນວັນທີ 29 ສິງຫາ 2019, ສະຖານທູດລາວ ທີ່ ປັກກິ່ງ ໄດ້ຈັດພິທີລົງນາມຖະແຫຼງການຮ່ວມ ວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ກົງໂກ ທີ່ນະຄອນຫຼວງປັກກິ່ງ ສປ ຈີນ, ເຊິ່ງຕາງໜ້າ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ນາງ ວັນດີ ບຸດທະສະວົງ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປ ຈີນ, ສ່ວນຕາງໜ້າ ລັດຖະບານ ແຫ່ງ ສາທາລະນະລັດ ກົງໂກ ແມ່ນ ທ່ານ ເດເນວ ໂອວາຊາ, ເອກອັກຄະລັດຖະທູດ ວິ ສາມັນຜູ້ມີອໍານາດເຕັມ ແຫ່ງ ສ. ກົງໂກ ປະຈໍາ ສປ ຈີນ ພ້ອມດ້ວຍພະນັກງານ ຂອງ ສອງສະຖານທູດ ສປປ ລາວ ແລະ ສ. ກົງໂກ ທີ່ປັກກິ່ງ ເຂົ້າຮ່ວມເປັນສັກຂີພະຍານໃນພິທີລົງນາມດັ່ງກ່າວ.
ໃນໂອກາດດັ່ງກ່າວ, ທ່ານ ນາງ ວັນດີ ບຸດທະສະວົງ, ເອກອັກຄະລັດຖະທູດ ສປປ ລາວ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ ການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ. ກົງໂກ ໃນຄັ້ງນີ້ ເຊິ່ງຈະເປັນພື້ນຖານ ແລະ ຂີດໝາຍສໍາຄັນອັນດີ ໃນການເສີມຂະຫຍາຍການຮ່ວມມືຂອງສອງປະເທດໃນຕໍ່ໜ້າ ບົນພື້ນ ຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ນໍາຜົນປະໂຫຍດອັນແທ້ຈິງມາສູ່ປະຊາຊົນຂອງທັງສອງປະເທດ. ທ່ານ ເດເນວ ໂອວາຊາ, ເອກອັກຄະລັດຖະທູດ ສ. ກົງໂກ ໄດ້ສະແດງຄວາມຊົມເຊີຍ ຕໍ່ການສ້າງຕັ້ງສາຍພົວພັນການທູດຂອງສອງປະເທດ ໃນຄັ້ງນີ້ ອັນຈະເປັນຂີດໝາຍໃໝ່ໃຫ້ແກ່ການພົວພັນລະຫວ່າງ ສ. ກົງໂກ ແລະ ສປປ ລາວ. ພ້ອມນີ້, ສອງຝ່າຍ ຍັງໄດ້ແຈ້ງສະພາບພາຍໃນຂອງປະເທດຕົນໃຫ້ກັນແລະກັນຊາບ ໂດຍສະເພາະ ສະພາບການພັດທະນາເສດຖະ ກິດ-ສັງຄົມ ກໍ່ຄືທ່າແຮງບົ່ມຊ້ອນ ພ້ອມທັງ ເຊື່ອໝັ້ນວ່າ ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ຈະໄດ້ຮັບການຂະຫຍາຍຕົວຍິ່ງໆຂຶ້ນ.