ໃນຕອນບ່າຍຂອງວັນທີ 06 ກັນຍາ 2019, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ປາຣີ, ສ.ຝຣັ່ງ ໄດ້ຈັດກອງປະຊຸມຊາວພຸດສົງເຖຣາວາດຂຶ້ນ ໂດຍການເຂົ້າຮ່ວມຂອງ ພຣະຄູ ວິນັຍທອນ ສວັສດ໌ ຍານະພະໂລ (ນິດສັຍບັນດິຕ), ປະທານອົງການຄະນະສົງເຖຣະວາດລາວ ປະຈຳ ປະເທດຝຣັ່ງ-ເອີຣົບ; ທ່ານ ຢົງ ຈັນທະລັງສີ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ຝຣັ່ງ, ມີບັນດາເຈົ້າອະທິການ, ພຣະສົງຈາກບັນດາວັດລາວຢູ່ປະເທດຝຣັ່ງ ຈຳນວນ 19 ອົງ, ກຳມະການແນວລາວສ້າງຊາດຢູ່ປະເທດຝຣັ່ງ 03 ທ່ານ, ບັນດາຜູ້ອຸ້ມຊູວັດ ພ້ອມດ້ວຍພະນັກງານສະຖານທູດ ເຂົ້າຮ່ວມຈຳນວນ 60 ກວ່າຄົນ.

ກອງປະຊຸມດັ່ງກ່າວນີ້ໄດ້ຈັດຂຶ້ນເປັນຄັ້ງທຳອິດ ໂດຍມີຈຸດປະສົງເພື່ອພົບປະແລກປ່ຽນຄຳຄິດຄຳເຫັນ ກ່ຽວກັບ ການຈັດການ ແລະ ການຈັດຫາ, ຄຸ້ມຄອງພະສົງຢູ່ປະເທດຝຣັ່ງ ໃຫ້ເປັນລະບົບ ແລະ ຖືກຕ້ອງຕາມກົດລະບຽບພຣະທຳມະວິໄນທາງພຸດທະສາສະໜາ ຂອງອົງການພຸດທະສາສະໜາສຳພັນລາວ ແລະ ສອດຄ່ອງກັບລະບຽບກົດໝາຍຂອງປະເທດເຈົ້າພາບ, ອໍານວຍຄວາມສະດວກໃຫ້ແກ່ການເກັບກຳຂໍ້ມູນ ແລະ ການຄຸ້ມຄອງຕ່າງໆຂອງພະສົງໃຫ້ເກີດປະໂຫຍດ. ນອກຈາກນັ້ນ, ກອງປະຊຸມຍັງໄດ້ປຶກສາຫາຫລື ກ່ຽວກັບ ການຈັດກິດຈະກຳສົ່ງເສີມວັດທະນະທຳລາວ ໂດຍຜ່ານຊ່ອງທາງພຸດທະສາສະໜາ ເພື່ອເປັນການເຜີຍແຜ່ຮີດຄອງປະເພນີລາວໃຫ້ຄົນເຊື້ອຊາດລາວທີ່ຢູ່ປະເທດຝຣັ່ງ ກໍຄືຄົນຕ່າງປະເທດ ໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດຖະບານເຮົາ ແລະ ສ້າງຄວາມສົນໃຈໃຫ້ເຂົ້າໄປທ່ອງທ່ຽວປະເທດລາວ. ກອງປະຊຸມໄດ້ດຳເນີນໄປດ້ວຍບັນຍາກາດອັນຟົດຟື້ນ ໂດຍຜ່ານການປະກອບຄຳຄິດຄຳເຫັນຢ່າງກົງໄປກົງມາ ເຮັດໃຫ້ກອງປະຊຸມໃນຄັ້ງນີ້ປິດລົງດ້ວຍຜົນສຳເລັດອັນຈົບງາມ.

ໃນຕອນເຊົ້າຂອງວັນດຽວກັນ ກໍ່ໄດ້ມີພິທີສູດປະລິຕະມົງຄຸນ ໃຫ້ແກ່ສະຖານທູດ ພ້ອມດ້ວຍພະນັກງານ ແລະ ຄອບຄົວ ໃຫ້ມີຄວາມຈະເລີນກ້າວໜ້າ ພ້ອມພໍາກັນ ແລະ ໄດ້ຖວາຍເພນແກ່ພຣະສົງ ເພື່ອເປັນສິລິມົງຄຸນ.