ທ່ານ ຢົງ ຈັນທະລັງສີ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈຳ​ ປະ​ເທດ​ຝຣັ່ງ ​ພ້ອມ​ດ້ວຍ​ພັນ​ລະ​ຍາ ​ແລະ ພະນັກງານ​ ໄດ້​ເຂົ້າຮ່ວມງານ​ປີ​ໃໝ່​ໄທ​ດຳ​ ​ໃນ​ວັນ​ທີ 22 ກຸມພາ 2020 ​ຢູ່​ສະ​ໂມ​ສອນ​​ກາງ​ເມືອງ​ອອກ​ລ່ຽງ, ປະເທດ ຝຣັ່ງ, ຜູ້​ເຂົ້າຮ່ວມມີ 300 ກວ່າຄົນ ຕາມ​ການ​ເຊື້ອ​ເຊີນຂອງສະມາຄົມ ເຜົ່າໄທດໍາ ທີ່ເມືອງອອກລ່ຽງ, ​ເຊິ່ງ​ເປັນຄັ້ງທຳ​ອິດ ທີ່​ຄະນະ​ສະຖານທູດ​ໄດ້​ເຂົ້າຮ່ວມ​ງານ​ຂອງ​ເຜົ່າ​ໄທ​ດຳ, ​ເປັນ​ຂີດ​ໝາຍ​ການ​ພົວພັນທີ່​ດີ ລະຫວ່າງ ​ສະຖານທູດ ​ແລະ ​ເຜົ່າ​ໄດ​ດຳ ທີ່​ປະ​ເທດ​ຝຣັ່ງ. ​ເຈົ້າກົກ​ເຈົ້່​າເຫລົ່າ ປະມານ 10 ທ່ານ ​ແລະ ພີ່ນ້ອງ​ເຜົ່າ​ໄທ​ດຳທີ່​ເຂົ້າຮ່ວມ​ງານ ​ໄດ້ສະ​ແດງຄວາມ​ຍິນ​ດີຕ້ອນຮັບ​ທ່ານ​ທູດ​ພ້ອມ​ດ້ວຍຄະນະ​ ຢ່າງ​ອົບ​ອຸ່ນ.

ໃນວັນທີ 12 ກຸມພາ 2020, ທີ່ ຫ້ອງປະຊຸມ ແຂວງບໍລິຄໍາໄຊ, ກະຊວງການຕ່າງປະເທດ ຮ່ວມກັບ ສູນອາຊຽນ-ຍີ່ປຸ່ນ (AJC) ໄດ້ຈັດກອງປະຊຸມສຳມະນາ ໃນຫົວຂໍ້ “ຍົກສູງບົດບາດຂອງ ສປປ ລາວ ໃນການເຊື່ອມໂຍງເສດຖະກິດພາກພື້ນ ແລະ ສາກົນ”, ພາຍໃຕ້ການເປັນປະທານຮ່ວມຂອງ ທ່ານ ບຸນມາ ບຸຈະເລີນ, ຮອງເຈົ້າແຂວງ ບໍລິຄໍາໄຊ ແລະ ທ່ານ ວິລະສັກ ສົມພົງ, ຮັກສາການຫົວໜ້າກົມເສດຖະກິດ, ກະຊວງການຕ່າງປະເທດ, ໂດຍມີຜູ້ເຂົ້າຮ່ວມຈາກບັນດາພະແນກການກ່ຽວຂ້ອງ, ພາກທຸລະກິດ, ວິທະຍາໄລພາຍໃນແຂວງ ຈໍານວນ 80 ກວ່າທ່ານ.

ກອງປະຊຸມໃຫຍ່ ຄັ້ງທີ I ຂອງໜ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສິງກະໂປ ໄດ້ໄຂຂຶ້ນຢ່າງເປັນທາງການ ໃນວັນທີ 7 ກຸມພາ 2020, ໂດຍການເປັນປະທານຂອງ ສະຫາຍ ຄອນເພັງ ທໍາມະວົງ, ເລຂາໜ່ວຍພັກສະຖານທູດ, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສິງກະໂປ ເຊິ່ງມີສະມາຊິກພັກສົມບູນຂອງໜ່ວຍພັກສະຖານທູດເຂົ້າຮ່ວມທັງໝົດ 6 ສະຫາຍ.