ໃນວັນທີ 29 ສິງຫາ 2019, ສະຖານທູດລາວ ທີ່ ປັກກິ່ງ ໄດ້ຈັດພິທີລົງນາມຖະແຫຼງການຮ່ວມ ວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ກົງໂກ ທີ່ນະຄອນຫຼວງປັກກິ່ງ ສປ ຈີນ, ເຊິ່ງຕາງໜ້າ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ນາງ ວັນດີ ບຸດທະສະວົງ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປ ຈີນ, ສ່ວນຕາງໜ້າ ລັດຖະບານ ແຫ່ງ ສາທາລະນະລັດ ກົງໂກ ແມ່ນ ທ່ານ ເດເນວ ໂອວາຊາ, ເອກອັກຄະລັດຖະທູດ ວິ ສາມັນຜູ້ມີອໍານາດເຕັມ ແຫ່ງ ສ. ກົງໂກ ປະຈໍາ ສປ ຈີນ ພ້ອມດ້ວຍພະນັກງານ ຂອງ ສອງສະຖານທູດ ສປປ ລາວ ແລະ ສ. ກົງໂກ ທີ່ປັກກິ່ງ ເຂົ້າຮ່ວມເປັນສັກຂີພະຍານໃນພິທີລົງນາມດັ່ງກ່າວ.
ໃນຕອນເຊົ້າຂອງວັນທີ 29 ສິງຫາ 2019, ທີ່ທຳນຽບປະທານາທິບໍດີ, ນະຄອນຫລວງລູບລິຈານາ, ສາທາລະນະລັດສະໂລເວນີ, ທ່ານ ສີທົງ ຈິດໂຍທິນ ໄດ້ຍື່ນສານຕາຕັ້ງຕໍ່ ພະນະທ່ານ Borut Pahor, ປະທານາທິບໍດີ ແຫ່ງ ສາທາລະນະລັດ ສະໂລເວນີ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ສະໂລເວນີ, ໂດຍມີສໍານັກງານສະຖານທູດຕັ້ງຢູ່ນະຄອນຫຼວງວຽນ, ປະເທດໂອຕຣິດ.
ໃນຕອນເຊົ້າຂອງວັນທີ 22 ສິງຫາ 2019, ທີ່ ໂຮງແຮມຈໍາປາສັກແກຣນ, ເມືອງປາກເຊ, ນະຄອນຈໍາປາສັກ, ສະຖາບັນການຕ່າງປະເທດ ຂອງກະຊວງການຕ່າງປະເທດ ໃນນາມສູນຄົ້ນຄວ້າແມ່ນໍ້າຂອງສາກົນລາວ (The Global Center for Mekong Studies/ GCMS-Laos)ໄດ້ຈັດກອງປະຊຸມສໍາມະນາພາກພື້ນ ພາຍໃຕ້ຫົວຂໍ້: “ການສ້າງແລວພັດທະນາເສດຖະກິດແມ່ນໍ້າຂອງ-ແມ່ນໍ້າລ້ານຊ້າງ: ກາລະໂອກາດ ແລະ ສິ່ງທ້າທາຍ (Building Mekong-Lancang Economic Development Belt: Prospects and Challenges)” ພາຍໃຕ້ໂຄງການຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ (Mekong-Lancang Cooperation/MLC). ກອງປະຊຸມຄັ້ງນີ້, ເປັນປະທານໂດຍ ທ່ານທູດ ຄໍາສວຍ ແກ້ວດາລາວົງ, ຫົວໜ້າສະຖາບັນການຕ່າງປະເທດ ທັງເປັນຫົວໜ້າສູນ GCMS ຂອງລາວ, ມີຜູ້ເຂົ້າຮ່ວມຈາກສູນ GCMS ຂອງ 6 ປະເທດສະມາຊິກ (ຈີນ, ລາວ, ຫວຽດນາມ, ມຽນມາ, ໄທ ແລະ ກໍາປູເຈຍ), ກອງເລຂາ MLC ລາວ ແລະ ຈີນ. ນອກຈາກນີ້ ຍັງມີຜູ້ຕາງໜ້າຈາກສະຖາບັນທັງພາຍໃນ ແລະ ພາກພື້ນ ເຊັ່ນ: ສະຖາບັນແມ່ນໍ້າຂອງ (Mekong Institute), ມະຫາວິທະຍາໄລຢູນນານ, ທະນາຄານພັດທະນາອາຊີ (ADB)ປະຈໍາລາວ, ແລະ ຈາກສະຖາບັນຄົ້ນຄວ້າຕ່າງໆຂອງລາວ (ສະຖາບັນຄົ້ນຄວ້າເສດຖະກິດແຫ່ງຊາດ; ສະຖາບັນຄົ້ນຄວ້າ, ອຸດສາຫະກຳ ແລະ ການຄ້າ; ແລະ ມະຫາວິທະຍາໄລແຫ່ງຊາດ) ລວມຜູ້ເຂົ້າຮ່ວມທັງໝົດ 30 ທ່ານ.