ໃນວັນທີ 04 ມີນາ 2020, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC) ໄດ້ຈັດກອງປະຊຸມປຶກສາຫາລື ການເມືອງ-ຄວາມໝັ້ນຄົງ ລາວ ແລະ ຍີ່ປຸ່ນ ຄັ້ງທີ 3 ລະດັບຫົວໜ້າກົມ-ຮອງຫົວໜ້າກົມ ລະຫວ່າງ ກະຊວງການຕ່າງປະເທດ ແລະ ກະຊວງປ້ອງກັນປະເທດ ສປປ ລາວ ແລະ ຍີ່ປຸ່ນ, ຊຶ່ງຝ່າຍລາວແມ່ນ ທ່ານ ບຸນທະນົງສັກ ຈັນທະລາດ, ຮັກສາການຫົວໜ້າກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງປະເທດແຫ່ງ ສປປ ລາວ ເປັນຫົວໜ້າຄະນະ ແລະ ຝ່າຍຍີ່ປຸ່ນແມ່ນ ທ່ານ ISHIKAWA Hiroshi, ຫົວໜ້າກົມອາຊີຕາເວັນອອກສ່ຽງໃຕ້ ແລະ ຕາເວັນຕົກສ່ຽງໃຕ້, ກະຊວງການຕ່າງປະເທດ ແຫ່ງ ຍີ່ປຸ່ນ ເປັນຫົວໜ້າຄະນະ.

ໃນຕອນບ່າຍຂອງ ວັນທີ 19 ກຸມພາ 2020, ທີ່ ນະຄອນຫລວງປຣາກ, ທ່ານ ພົມມາ ບຸດທະວົງ, ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ມີໂລດສ ຊີແມນ, ປະທານາທິບໍດີ ແຫ່ງ ສາທາລະນະລັດ ເຊັກ, ເພື່ອດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ເຊັກ, ຊຶ່ງມີສຳນັກງານສະຖານທູດ ຕັ້ງຢູ່ນະຄອນຫລວງແບກແລງ, ສາທາລະນະລັດ ສະຫະພັນ ເຢຍລະມັນ.

ໃນວັນທີ 22 ກຸມພາ 2020,​ ກອງປະຊຸມໃຫ່ຍຄັ້ງ ທີ III ຂອງໜ່ວຍພັກສະຖານເອກອັກຄະລັດຖະທູດ ສປປ ລາວ ປະຈຳ ສາທາລະນະລັດ ເກົາຫຼີ ທີ່ ເຊອູນ​ ໄດ້ໄຂຂື້ນຢ່າງເປັນທາງການ, ໂດຍການເປັນປະທານ ຂອງ ສະຫາຍ ທ່ຽງ ບຸບຜາ ຄະນະບໍລິຫານງານພັກກະຊວງການຕ່າງປະເທດ, ເລຂາໜ່ວຍພັກສະຖານເອກອັກຄະລັດຖະທູດລາວ ປະຈຳ ສ. ເກົາຫຼີ, ​ເຊີ່ງມີສະມາຊິກພັກເຂົ້າຮ່ວມ ທັງໝົດ 21 ສະຫາຍ, ຍິງ 03 ສະຫາຍສຳຮອງ 03 ສະຫາຍ ແລະ ຕາງໜ້າຈາກ 3 ອົງການຈັດຕັ້ງມະຫາຊົນເຂົ້າຮ່ວມ.