ໂດຍຕອບສະໜອງຕາມການເຊື້ອເຊີນຂອງ ພະນະທ່ານ Abdullah bin Zayed Al Nahyan, ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ຂອງ ສະຫະລັດ ອາຣັບ ເອມີເລດ, ຄະນະຜູ້ແທນ ແຫ່ງ ສປປ ລາວ ນໍາໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ຈະໄດ້ເດີນທາງເຂົ້າຮ່ວມກອງປະຊຸມລັດຖະມົນຕີຕ່າງປະເທດ ເວທີປຶກສາຫາລືຂອບການຮ່ວມມືອາຊີ ຫຼື ເອຊີດີ ຄັ້ງທີ 15 (15th Asia Cooperation Dialogue (ACD) Ministerial Meeting), ໃນລະຫວ່າງວັນທີ 14-17 ມັງກອນ 2017, ທີ່ ອາບູດາບີ, ປະເທດ ສະຫະລັດ ອາຣັບ ເອມີເລດ.
ໃນຕອນເຊົ້າຂອງວັນທີ 13 ມັງກອນ 2017, ທີ່ ສະຖານທູດເຢຍລະມັນ ປະຈຳ ລາວ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ນຳພາຄະນະເຂົ້າຮ່ວມເຊັນປື້ມໄຫວ້ອາໄລ ແດ່ດວງວິນຍານຂອງ ທ່ານ Roman Herzog, ອະດີດປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ (1994-1999) ທີ່ໄດ້ເຖິງແກ່ມໍລະນະກຳ ໃນວັນທີ 10 ມັງກອນ 2017.
ໃນຕອນບ່າຍຂອງວັນທີ 26 ທັນວາ 2016,ທີ່ສະໂມສອນໃຫ່ຍຂອງມະຫາວິທະຍາໄລ ສຸພານຸວົງ, ວິທະຍາເຂດບ້ານດອນເມືອງໃໝ່ທີ່ແຂວງຫຼວງພະບາງ, ກອງເລຂາຄະນະຊີ້ນຳລະດັບຊາດເພື່ອຕິດຕາມການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ຫຼື ປພຍໄດ້ຈັດກອງປະຊຸມເຜີຍແຜ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໃຫ້ແກ່ພະນັກງານຄູອາຈານແລະນັກສຶກສາຈາກມະຫາວິທະຍາໄລ ສຸພານຸວົງ, ເຊີ່ງມີຜູ້ເຂົ້າຮ່ວມທັງໝົດ ຈຳນວນ500 ກວ່າທ່ານ. ກອງປະຊຸມຄັ້ງນີ້ ຈັດຂຶ້ນພາຍໃຕ້ການເປັນປະທານຂອງ ທ່ານທອງຜ່ານສະຫວັນເພັດ, ຮອງລັດຖະມົນຕີກະຊວງການຕ່າງປະເທດໂດຍມີທ່ານຮສ. ວິໄຊຈັນສະຫວ່າງ,ຮັກສາການອະທິການບໍດີມະຫາວິທະຍາໄລສຸພານຸວົງ ເປັນປະທານຮ່ວມ. ກອງປະຊຸມດັ່ງກ່າວໄດ້ຮັບຟັງການບັນລະຍາຍໂດຍວິທະຍາກອນຈາກ ກົມອົງການຈັດຕັ້ງສາກົນ, ກະຊວງການຕ່າງປະເທດ ແລະ ກົມແຜນການ, ກະຊວງແຜນການ ແລະ ການລົງທຶນ ກ່ຽວກັບ ເປົ້າຫມາຍການພັດທະນາແບບຍືນຍົງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ກໍຄືຍຸດທະສາດການພັດທະນາ ຮອດປີ 2025 ແລະ ວິໄສທັດປີ 2030 ຂອງ ສປປ ລາວ ທີ່ໄດ້ເຊື່ອມສານເປົ້າໝາຍການພັດທະນາແບບຍືນຍົງເຂົ້າໃສ່ນຳ ທັງນີ້ກໍ່ເພື່ອໃຫ້ຜູ້ເຂົ້າຮ່ວມທັງຫມົດມີຄວາມຮັບຮູ້ ແລະ ເຂົ້າໃຈກ່ຽວກັບເປົ້າຫມາຍການພັດທະນາຂອງສາກົນ ແລະ ຂອງປະເທດເຮົາ.