ໃນຕອນບ່າຍ ຂອງວັນທີ 11 ພະຈິກ 2016 ຜ່ານມາ ທີ່ສະໂມສອນຂອງມະຫາວິທະຍາໄລຈຳປາສັກ, ກະຊວງການຕ່າງປະເທດ, ກົມອົງການຈັດຕັ້ງສາກົນ ໄດ້ຈັດກອງປະຊຸມເຜີຍແຜ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ແລະ ເອກະສານນິຕິກຳ ກ່ຽວກັບການຄຸ້ມຄອງອົງການຈັດຕັ້ງສາກົນທີ່ບໍ່ສັງກັດລັດຖະບານ (INGOs) ໃຫ້ແກ່ພະນັກງານຄູອາຈານແລະນັກສຶກສາຈຳນວນ500 ກວ່າທ່ານຈາກມະຫາວິທະຍາໄລຈຳປາສັກ
ພາຍໃຕ້ການເປັນປະທານຂອງທ່ານທອງຜ່ານ ສະຫວັນເພັດ, ຮອງລັດຖະມົນຕີ, ກະຊວງການຕ່າງປະເທດທັງເປັນຫົວໜ້າກອງເລຂາຄະນະຊີ້ນຳລະດັບຊາດເພື່ອຕິດຕາມການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໂດຍມີທ່ານ ປອ. ບຸນມີ ພອນສະຫວັນ,ອະທິການບໍດີມະຫາວິທະຍາໄລຈຳປາສັກ ໃຫ້ກຽດເປັນປະທານຮ່ວມ. ກອງປະຊຸມໄດ້ຮັບຟັງການບັນລະຍາຍໂດຍວິທະຍາກອນຈາກກົມອົງການຈັດຕັ້ງສາກົນ, ກະຊວງການຕ່າງປະເທດກ່ຽວກັບເປົ້າຫມາຍການພັດທະນາແບບຍືນຍົງ ແລະ ການເຊື່ອມສານເປົ້າໝາຍດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ກໍຄືຍຸດທະສາດການພັດທະນາເສດຖະກິດ-ສັງຄົມ ຮອດປີ 2025 ແລະ ວິໄສທັດ ປີ 2030 ຂອງ ສປປ ລາວ ເພື່ອໃຫ້ຜູ້ເຂົ້າຮ່ວມທັງຫມົດມີຄວາມຮັບຮູ້ ແລະ ເຂົ້າໃຈກ່ຽວກັບເປົ້າຫມາຍການພັດທະນາຂອງສາກົນ ແລະ ຂອງປະເທດເຮົາ.
ໃນວັນທີ 25 ກັນຍາ 2015, ຜູ້ນຳຂອງ 193 ປະເທດສະມາຊິກອົງການ ສະຫະປະຊາຊາດ, ລວມທັງພະນະທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ ລາວ ໄດ້ເຂົ້າກອງປະຊຸມສຸດຍອດ ອົງການສະຫະປະຊາຊາດ ເພື່ອຮັບຮອງເອົາວາລະການພັດທະນາໃໝ່ຂອງສາກົນທີ່ເປັນປະຫວັດສາດ ທີ່ເອີ້ນວ່າ "ຫັນປ່ຽນໂລກຂອງພວກເຮົາ: ວາລະ 2030 ເພື່ອການພັດທະນາແບບຍືນຍົງ", ເຊິ່ງລວມເຖິງເປົ້າຫມາຍການພັດທະນາແບບຍືນຍົງທີກວມເອົາດ້ານເສດຖະກິດ, ສັງຄົມແລະສິ່ງແວດລ້ອມລວມທັງໝົດ 17 ເປົ້າໝາຍຄື:
1. ລຶບລ້າງຄວາມທຸກຍາກທຸກຮູບແບບໃນທົ່ວໂລກ;
2. ລຶບລ້າງຄວາມອຶດຫິວ, ບັນລຸການຄ້ຳປະກັນສະບຽງອາຫານແລະປັບປຸງດ້ານໂພຊະນາການແລະສົ່ງເສີມການກະສິກຳແບບຍືນຍົງ;
3. ຮັບປະກັນການມີສຸຂະພາບທີ່ດີແລະສົ່ງເສີມຊີວິດການເປັນຢູ່ທີ່ດີຂອງທຸກຄົນທຸກເກນອາຍຸ;
4. ຮັບປະກັນການສຶກສາທີ່ມີຄຸນນະພາບ, ເທົ່າທຽມກັນແລະທົ່ວເຖີງແລະສົ່ງເສີມກາລະໂອກາດໃນການຮຽນຮູ້ຕະຫຼອດຊີວິດສຳລັບໝົດທຸກຄົນ;
5. ບັນລຸຄວາມສະເໝີພາບລະຫວ່າງຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງແລະເດັກຍິງທຸກຄົນ;
6. ຮັບປະກັນໃຫ້ມີນ້ຳໃຊ້ແລະການບໍລິຫານນ້ຳແບບຍືນຍົງແລະສຸຂະອະນາໄມສຳລັບໝົດທຸກຄົນ;
7. ຮັບປະກັນການເຂົ້າເຖີງພະລັງງານທີ່ທັນສະໄໝ, ຍືນຍົງ, ເຊື່ອຖືໄດ້ແລະລາຄາບໍ່ແພງສຳລັບໝົດທຸກຄົນ;
8. ສົ່ງເສີມການຂະຫຍາຍຕົວທາງດ້ານເສດຖະກິດທີ່ຕໍ່ເນື່ອງ, ທົ່ວເຖີງແລະຍືນຍົງ, ການມີວຽກເຮັດງານທຳທີ່ມີປະສິດທິຜົນແລະເຕັມສ່ວນແລະວຽກທີ່ມີຄຸນຄ່າສຳລັບໝົດທຸກຄົນ;
9. ສ້າງພື້ນຖານໂຄງລ່າງທີ່ໝັ້ນຄົງທົນທານ, ສົ່ງເສີມການຫັນເປັນອຸດສາຫະກຳແບບຍືນຍົງແລະທົ່ວເຖີງແລະສົ່ງເສີມນະວັດຕະກຳ;
10. ຫຼຸດຜ່ອນຄວາມບໍ່ສະເໝີພາບຢູ່ພາຍໃນປະເທດແລະລະຫວ່າງປະເທດ;
11. ສ້າງຕົວເມືອງແລະທີ່ພັກພາອາໃສຂອງປະຊາຊົນໃຫ້ທົ່ວເຖີງ, ປອດໄພ, ໝັ້ນຄົງທົນທານແລະຍືນຍົງ;
12. ຮັບປະກັນຮູບແບບການອຸປະໂພກບໍລິໂພກ ແລະການຜະລິດໃຫ້ມີຄວາມຍືນຍົງ;
13. ເອົາມາດຕະການອັນຮີບດ່ວນເພື່ອແກ້ໄຂບັນຫາການປ່ຽນແປງດິນຟ້າອາກາດແລະຮັບມືຜົນກະທົບຈາກບັນຫາດັ່ງກ່າວ;
14. ອະນຸລັກແລະຊົມໃຊ້ມະຫາສະມຸດ, ທະເລແລະຊັບພະຍາກອນທາງທະເລແບບຍືນຍົງເພື່ອການພັດທະນາແບບຍືນຍົງ;
15. ປົກປ້ອງ, ຟື້ນຟູແລະສົ່ງເສີມການນຳໃຊ້ລະບົບນິເວດແບບຍືນຍົງ, ຄຸ້ມຄອງປ່າໄມ້ແບບຍືນຍົງ, ຕ້ານການກາຍເປັນທະເລຊາຍ, ຢຸດຕິແລະຟື້ນຟູການເສື່ອມໂຊມຂອງດິນແລະຢຸດການສູນເສຍຊີວະນາໆພັນ;
16. ສົ່ງເສີມໃຫ້ສັງຄົມມີຄວາມສະຫງົບສຸກແລະກວມລວມເພື່ອການພັດທະນາແບບຍືນຍົງ, ໃຫ້ທຸກຄົນສາມາດເຂົ້າເຖີງຄວາມຍຸຕິທຳແລະ ສ້າງສະຖາບັນມີປະສິດທິພາບ, ມີຄວາມຮັບຜິດຊອບແລະທົ່ວເຖີງໃນທຸກລະດັບ;
17. ສ້າງຄວາມເຂັ້ມແຂງໃຫ້ແກ່ການຈັດຕັ້ງປະຕິບັດແລະຟື້ນຟູການເປັນຄູ່ຮ່ວມສາກົນເພື່ອການພັດທະນາແບບຍືນຍົງ;
ນອກຈາກການຈັດຕັ້ງປະຕິບັດເປົ້າຫມາຍການພັດທະນາແບບຍືນຍົງຂອງສາກົນ ໃນ 15 ປີຕໍ່ຫນ້າ, ລັດຖະບານ ສປປ ລາວ ຍັງໄດ້ຮັບຮອງເອົາເປົ້າຫມາຍການພັດທະນາແບບຍືນຍົງ ທີ 18 “ຊີວິດທີ່ປອດໄພຈາກລະເບີດທີ່ຍັງບໍ່ທັນແຕກ” ຢ່າງເປັນທາງການໃນວັນທີ 7 ກັນຍາ 2016 ທີ່ຫໍປະຊຸມແຫ່ງຊາດ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ບັນ ກີ-ມູນ, ເລຂາທິການໃຫຍ່ອົງການສະຫະປະຊາຊາດ ໃນໂອກາດທີ່ເດີນທາງມາຮ່ວມກອງປະຊຸມສຸດຍອດອາຊຽນ-ອົງການ ສປຊ, ເຊິ່ງເປັນການສານຕໍ່ຄວາມພະຍາຍາມຈັດຕັ້ງປະຕິບັດເປົ້າຫມາຍສະຫັດສະຫວັດດ້ານການພັດທະນາ ທີ 9 ກ່ຽວກັບການແກ້ໄຂຜົນກະທົບຂອງລະເບີດທີ່ຍັງບໍ່ທັນແຕກ ຂອງຕົນໃນໄລຍະຜ່ານມາ.
ນອກຈາກນີ້, ກອງປະຊຸມຍັງໄດ້ຮັບຟັງການເຜີຍແຜ່ເອກະສານນິຕິກໍາທີ່ສໍາຄັນ ກ່ຽວກັບການຮ່ວມມືກັບອົງການຈັດຕັ້ງສາກົນທີ່ບໍ່ສັງກັດລັດຖະບານ ກໍ່ຄືການທີ່ລັດຖະບານເຮົາໃຫ້ຄວາມສຳຄັນຕໍ່ກັບອົງການຈັດ ຕັ້ງສາກົນທີ່ບໍ່ສັງກັດລັດຖະບານ, ເຊິ່ງຖືເປັນຄູ່ຮ່ວມງານຫນຶ່ງ ໃນຂະບວນການພັດທະນາມາແຕ່ດົນນານ. ອົງການດັ່ງກ່າວ ໄດ້ເຂົ້າມາໃຫ້ການຊ່ວຍເຫລືອແກ່ພວກເຮົາ ຕັ້ງແຕ່ກ່ອນປີ 1975 ແລະ ເພີ່ມຫລາຍຂຶ້ນນັບແຕ່ ສປປ ລາວ ໄດ້ດຳເນີນ ແລະ ຜັນຂະຫຍາຍແນວທາງການຕ່າງປະເທດ ພາຍໃຕ້ແນວທາງຈິດຕະນາການໃໝ່ຂອງພັກ ແຕ່ປີ 1986 ເປັນຕົ້ນມາ. ເພື່ອອຳນວຍຄວາມສະດວກ ກໍ່ຄືການຄຸ້ມຄອງການເຄື່ອນໄຫວຂອງອົງການດັ່ງກ່າວ, ລັດຖະບານ ໄດ້ອອກດຳລັດຂອງນາຍົກລັດຖະມົນຕີ ແລະ ຂໍ້ແນະນຳຂອງລັດຖະມົນຕີກະຊວງການຕ່າງປະເທດ ເພື່ອເປັນບ່ອນອີງໃຫ້ແກ່ອົງການຈັດຕັ້ງຕ່າງໆທີ່ກ່ຽວ ຂ້ອງໃນການເຮັດວຽກຮ່ວມກັນ.
ການຊ່ວຍເຫລືອຈາກ ອົງການຈັດຕັ້ງສາກົນທີ່ບໍ່ສັງກັດລັດຖະບານ ເຖິງວ່າຈະບໍ່ຫລາຍ, ແຕ່ກໍ່ເປັນປະໂຫຍດ ແລະ ເປັນການປະກອບສ່ວນອັນສຳຄັນເຂົ້າໃນແຜນພັດທະນາເສດ ຖະກິດ-ສັງຄົມຂອງ ສປປ ລາວ ແຕ່ລະໄລຍະ, ໂດຍສະເພາະໃນຂະແຫນງການສຶກສາ, ສາທາ, ກະສິກຳ, ແຮງງານ ແລະ ສະວັດດີການ ກໍຄືການເກັບກູ້ລະເບີດບໍ່ທັນແຕກທີ່ຕົກຄ້າງ ແລະ ວຽກງານໄພພິບັດ ອັນໄດ້ຊ່ວຍແກ້ໄຂຊີວິດການເປັນຢູ່ຂອງປະຊາຊົນໃນເຂດຊົນນະບົດ ແລະ ຫ່າງໄກສອກຫລີກໃຫ້ດີຂຶ້ນເທື່ອລະກ້າວ.
ປະຈຸບັນ ມີ 184 ອົງການຈັດຕັ້ງສາກົນທີ່ບໍ່ສັງກັດລັດຖະບານ ໄດ້ເຂົ້າມາໃຫ້ການຊ່ວຍເຫລືອແກ່ ສປປ ລາວ, ມີ 206 ໂຄງການ ທີ່ກຳລັງຈັດຕັ້ງປະຕິບັດຢູ່ໃນຂອບເຂດທົ່ວປະເທດ ແລະ ມີມູນຄ່າລວມປະມານ 230 ລ້ານ ໂດລາສະຫະລັດ.