ໃນຕອນ​ບ່າຍ​ຂອງ​ວັນ​ທີ 22 ທັນວາ 2016, ທີ່ ສະຖານທູດ​ເຢຍລະ​ມັນ ປະຈຳ ​ສປປ ລາວ, ທ່ານ ​ແສງ​ເພັດ ຮຸ່ງ​ບຸນ​ບວງ, ຮອງລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ​ໄດ້​ເຂົ້າຮ່ວມ​​ເຊັນ​ປື້ມ​ໄຫວ້​ອາ​ໄລຕໍ່ກັບ​ເຫດການ​ຄົນ​ຮ້າຍ​ຂັບ​ລົດ​ບັນທຸກ​ແລ່ນ​ບຸກ​ເຂົ້າທຳຮ້າຍ​ປະຊາຊົນ ​ໃນ​ງານ​ຕະຫຼາດຄຼິດສມາດຢູ່​ໃຈກາງ​ນະຄອນຫຼວງ​ແບກ​ແລັງ, ປະ​ເທດ​ ​ເຢຍລະ​ມັນ ​ໂດຍ​ມີ​ເນື້ອ​ໃນ​ວ່າ:

​

“ພວກຂ້າພະເຈົ້າ ໄດ້ຮັບຊາບຂ່າວດ້ວຍ​ຄວາມ​ເສົ້າ​ໂສກ ​ກ່ຽວກັບ ​ເຫດການ​ສະ​ຫຍອງ​ຂວັນ​ທີ່​ເກີດ​ຂຶ້ນຈາກ​ການກໍ່ການ​ກະທຳ​ທີ່​​ໂຫດຮ້າຍປ່າ​ເຖື່ອນຕໍ່ກັບ​ເຫດການ​ຄົນ​ຮ້າຍ​​ຂັບ​ລົດ​ບັນທຸກແລ່ນ​ບຸກ​ເຂົ້າ​ທຳຮ້າຍປະຊາຊົນ ​ໃນ​ງານ​ຕະຫຼາດຄຼິດສມາດຢູ່​ໃຈກາງ​ນະຄອນຫຼວງ​ແບກ​ແລັງ, ​ໃນ​ວັນ​ທີ 19 ທັນວາ 2016, ຊຶ່ງ​ເຮັດ​ໃຫ້​ມີ​ຜູ້​ເສຍ​ຊີວິດ ​ແລະ ບາດ​ເຈັບ​ເປັນ​ຈຳນວນຫຼວງຫຼາຍ. ສປປ ລາວ ກ່າວ​ປະນາມຢ່າງແຂງແຮງຕໍ່ການກະທຳດັ່ງກ່າວຂອງກຸ່ມກໍ່ການຮ້າຍ.

ໃນ​ນາມ​ລັດ​ຖະ​ບານ ແຫ່ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ​ແລະ ປະຊາຊົນລາວ, ພວກ​ຂ້າພະ​​ເຈົ້າຂໍ​ສະ​ແດງ​ຄວາມ​ເສົ້າສະຫຼົດ​ໃຈ ​ແລະ ສະ​ແດງ​ຄວາມ​ເຫັນ​ໃຈ​ຢ່າງ​ສຸດຊຶ້ງມາ​ຍັງ​ລັດຖະບານ ແຫ່ງ ສາທາລະນະລັດ ສະຫະພັນ ເຢຍລະມັນ​ແລະ ປະຊາຊົນເຢຍລະມັນ ກໍ​ຄື​ຕໍ່ຄອບຄົວ​ຂອງ​ຜູ້​ທີ່​ໄດ້​ຮັບ​ເຄາະ​ຮ້າຍຈາກ​ເຫດການ​ກະທຳ​ຮຸນ​ແຮງ​ດັ່ງກ່າວ.”