ໃນວັນທີ 5 ທັນວາ 2016, ທີ່ກະຊວງການຕ່າງປະເທດ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ມອບສານແຕ່ງຕັ້ງໃຫ້ແກ່ ທ່ານ Gerard DELEVAUX, ກົງສູນກິດຕິມະສັກ ແຫ່ງ ສປປ ລາວ ປະຈຳ ສ ມາດາກາສະກາ.
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ທີ່ ທ່ານ Gerard DELEVAUX ໄດ້ຖືກແຕ່ງຕັ້ງໃຫ້ເປັນກົງສູນກິດຕິມະສັກ ແຫ່ງ ສປປ ລາວ ປະຈຳ ສ.ມາດາກາສະກາ, ເຊິ່ງເປັນຂີດໝາຍອັນດີໃຫ້ແກ່ການເສີມຂະຫຍາຍການພົວພັນຮ່ວມມື ສອງຝ່າຍ ລາວ-ມາດາກາສະກາ ໂດຍສະເພາະດ້ານເສດຖະກິດ-ການຄ້າ, ການທ່ອງທ່ຽວ ແລະ ອື່ນໆ. ພ້ອມດຽວກັນນັ້ນ, ທ່ານຮອງລັດຖະມົນຕີ ໄດ້ສະແດງຄວາມເຊື່ອໝັ້ນວ່າ ການປະຕິບັດວຽກງານ ເປັນກົງສູນກິດຕິມະສັກ ຂອງທ່ານ ຈະສືບຕໍ່ຮັດແໜ້ນການພົວພັນຮ່ວມມື ລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນ ແລະ ຂະຫຍາຍຕົວຍິ່ງໆຂຶ້ນ ເພື່ອນຳຜົນປະໂຫຍດມາສູ່ສອງປະເທດ ກໍຄື ປະຊາຊົນສອງຊາດໃນອະນາຄົດ.
ສປປ ລາວ ແລະ ສ ມາດາກາສະກາ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 27 ກຸມ ພາ 1980, ແຕ່ທັງສອງປະເທດ ຍັງບໍ່ທັນໄດ້ມີສຳນັກງານສະຖານທູດນຳກັນ.