ໃນວັນທີ 16 ກຸມພາ 2016, ທີ່ ສະໜາມບິນສາກົນສະຫວັນນະເຂດ, ແຂວງສະຫວັນນະເຂດ, ໄດ້ມີການຈັດພິທີມອບ-ຮັບສິ່ງເສດເຫຼືອຂອງທະຫານອາເມລິກາ ທີ່ເສຍຊິີວິດໃນປາງສົງຄາມຢູ່ລາວ ຊຶ່ງແມ່ນຜົນຈາກການປະຕິບັດງານຮ່ວມລາວ-ອາເມລິກາ ໃນການຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາໃນປາງສົງຄາມຢູ່ລາວ ຄັ້ງທີ 2 ປະຈໍາປີ 2016-2017 ຢູ່ ກໍລະນີ 1368, ຢູ່ເຂດບ້ານຜານົບ, ເມືອງບົວລະພາ, ແຂວງຄໍາມ່ວນ, ເຊິ່ງໄດ້ພົບເຫັນຊິ້ນສ່ວນຈຳນວນໜຶ່ງ.
ເປັນກຽດເຂົ້າຮ່ວມໃນພິທີມອບ-ຮັບໃນຄັ້ງນີ້, ຕາງໜ້າໃຫ້ແກ່ລັດຖະບານ ແຫ່ງ ສາທາລະນະລັດ ປະຊາທິປະ ໄຕປະຊາຊົນລາວ ແມ່ນ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານ MIA, ເປັນຜູ້ກ່າວມອບ ແລະ ຕາງໜ້າໃຫ້ແກ່ລັດຖະບານ ສະຫະລັດ ອາເມລິກາ ແມ່ນທ່ານ ນາງ Rena Bitter, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະລັດ ອາເມລິກາ ປະຈຳ ສປປ ລາວ, ເປັນຜູ້ກ່າວຮັບ.
ໃນພິທີ່ດັ່ງກ່າວ ຍັງມີທ່ານຮອງເຈົ້າແຂວງຄຳມ່ວນ, ເຈົ້າໜ້າທີ່ຂັ້ນສູງຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ, ພະນັກງານທ້ອງຖິ່ນທີ່ກ່ຽວຂ້ອງຂອງແຂວງສະຫວັນນະເຂດ ແລະ ພະນັກງານວິຊາການລາວ-ອາເມລິກາ ທີ່ເຮັດວຽກງານຕົວຈິງໃນພາກສະໜາມຈໍານວນໝຶ່ງ ເຂົ້າຮ່ວມນໍາ.
ໂດຍສືບຕໍ່ປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ຄອບຄົວກໍ່ຄືຍາດພີ່ນ້ອງຂອງຜູ້ຫາຍສາບສູນໃນປາງສົງຄາມຢູ່ລາວ ແລະ ອີງຕາມການຮ້ອງຂໍຂອງລັດຖະບານອາເມລິກາໃນການແກ້ໄຂບັນຫາດັ່ງກ່າວ, ໃນໄລຍະເວລາ 30 ປີ ທີ່ຜ່ານມາການຮ່ວມມືສອງຝ່າຍລາວ-ອາເມລິກາ ໃນການດໍາເນີນການສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາ ທີ່ເສຍຊີວິດໃນປາງສົງຄາມຢູ່ລາວໄດ້ຮັບຜົນເປັນກ້າວໆມາ ໂດຍໄດ້ຄົ້ນພົບ 50% ຂອງຈໍານວນຜູ້ຫາຍສາບສູນທັງໝົດ, ຊຶ່ງອີງຕາມຕົວເລກທີ່ຝ່າຍອາເມລິກາແຈ້ງຝ່າຍລາວຊາບ, ທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ ທັງໝົດມີ 573 ຄົນ. ນັບແຕ່ສອງຝ່າຍໄດ້ມີການຮ່ວມມືກັນມາ ແຕ່ປີ 1985 ຈົນເຖິງປັດຈຸບັນ, ລັດຖະບານລາວ ໄດ້ມອບສິ່ງເສດເຫຼືອທະຫານອາເມລິກາທີ່ເສຍຊີວິດຢູ່ລາວແລ້ວຈຳນວນ 273 ຄົນ, ເພື່ອສົ່ງຄືນໃຫ້ແກ່ຄອບຄົວຂອງພວກກ່ຽວ ນໍາໄປທໍາພິທີທາງສາດສະໜາຕາມການຮ້ອງຂໍຂອງປະຊາຊົນອາເມລິກາ, ສ່ວນອີກ 300 ຄົນທີ່ຍັງເຫຼືອ ແມ່ນຈະໄດ້ຮ່ວມກັນສືບຕໍ່ສໍາຫຼວດ ແລະ ຂຸດຄົ້ນໃນການປະຕິບັດງານຄັ້ງຕໍ່ໄປ.
ການທີ່ທັງສອງຝ່າຍ ລາວ-ອາເມລິກາ ໄດ້ຮັບຜົນສຳເລັດອັນດີດັ່ງກ່າວໃນວຽກງານການສໍາຫຼວດ ແລະ ຂຸດຄົ້ນ ກໍຍ້ອນຄວາມເອົາໃຈໃສ່ຢ່າງຈິງໃຈຂອງລັດຖະບານ, ເຈົ້າໜ້າທີ່ຂອງລາວທຸກໆຂັ້ນແຕ່ສູນກາງຈົນຮອດທ້ອງຖິ່ນ ແລະ ການຮ່ວມມືອັນດີຂອງປະຊາຊົນບັນດາເຜົ່າ.
ໂດຍປະຕິບັດຕາມການຕົກລົງເຫັນດີຂອງສອງນາຍົກລັດຖະມົນຕີລາວແລະກຳປູເຈຍ, ຄັ້ງວັນທີ 23 ພະຈິກ 2016 ທີ່ ຊຽມຣຽບ, ຣາຊະອານາຈັກ ກໍາປູເຈຍ, ໃນວັນທີ 27 ມັງກອນ 2017, ຄະນະປະຕິບັດງານຮ່ວມລາວ-ກໍາປູເຈຍ; ກໍາປູເຈຍ-ລາວ, ຊຶ່ງຝ່າຍລາວ ນຳໂດຍ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ຄະນະປະຕິບັດງານຮ່ວມຝ່າຍກຳປູເຈຍ ນຳໂດຍ ທ່ານ ລອງ ວິຊະໂລ, ຮອງລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ໂດຍມີທ່ານຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ບັນດາການນໍາຂອງແຂວງ, ຜູ້ຕາງໜ້າຈາກບັນດາກະຊວງ ແລະ ຂະແໜງການທີ່ກ່ຽວຂ້ອງຂອງລາວ ແລະ ກຳປູເຈຍ ໄດ້ຮ່ວມກັນສຳຫຼວດພູມີປະເທດຕົວຈິງແລະປຶກສາຫາລືກັນ ກ່ຽວກັບຈຸດທີ່ຈະກໍ່ສ້າງຂົວຂ້າມເຊລຳເພົາແລະ ໄດ້ເຫັນດີເປັນເອກະພາບກັນກໍານົດຈຸດທີ່ຈະສ້າງຂົວດັ່ງກ່າວ ຢູ່ລະຫວ່າງບໍລິເວນບ້ານເວີນຍາງ, ເມືອງມຸນລະປະໂມກ, ແຂວງຈໍາປາສັກ (ລາວ) ແລະ ຕາແສງທ່າເປືອຍ, ແຂວງເພຣຍວິເຮຍ (ກໍາປູເຈຍ) ຊຶ່ງມີໄລຍະຫ່າງຈາກປາກເຊລໍາເພົາປະມານ 1500 ແມັດ.
ການລົງສຳຫຼວດຢູ່ພື້ນທ່ີ່ຕົວຈິງໃນຄັ້ງນີ້ ເປັນການປະຕິບັດຕາມເຈດຕະນາລົມແລະຄວາມມຸ້ງມາດປາດຖະ ໜາຂອງລັດຖະບານສອງປະເທດລາວແລະກຳປູເຈຍທີ່ຢາກຈະຂະຫຍາຍຕາໜ່າງການເຊື່ອມໂຍງ ເພື່ອເອື້ອອຳນວຍຄວາມສະດວກໃຫ້ແກ່ການໄປມາຫາສູ່ກັນ, ສົ່ງເສີມການແລກປ່ຽນການຄ້າ, ການທ່ອງທ່ຽວ ລະຫວ່າງສອງປະເທດ, ພ້ອມທັງເປັນການເພີ່ມທະວີການຮ່ວມມື ຊ່ວຍເຫຼືອຊຶ່ງກັນ ແລະ ກັນ ທັງໃນລະດັບສູນກາງແລະ ທ້ອງຖິ່ນເພື່ອຍົກລະດັບຊີວິດການເປັນຢູ່ຂອງປະຊາຊົນ ຢູ່ຕາມບໍລິເວນຊາຍແດນໃຫ້ນັບມື້ດີຂຶ້ນກວ່າເກົ່າ.
ອີງໃສ່ຜົນການສຳຫຼວດພື້ນທີ່ຕົວຈິງ, ສອງຝ່າຍໄດ້ປຶກສາຫາລືແລະ ແລກປ່ຽນຄວາມເຫັນນໍາກັນຢ່າງກົງໄປກົງມາ ເພື່ອເຮັດໃຫ້ຂົວດັ່ງກ່າວໄດ້ຮັບການກໍ່ສ້າງໂດຍໄວ ແລະ ຮັບປະກັນທາງດ້ານສິດຜົນປະໂຫຍດຂອງທັງສອງຝ່າຍ, ພ້ອມທັງຈະນໍາເອົາຜົນຂອງການສໍາຫຼວດພື້ນທີ່ຕົວຈິງຄັ້ງນີ້ ລາຍງານຂັ້ນເທິງຂອງຕົນໃຫ້ການຊີ້ນໍາ. ການພົບປະແລະ ການສຳຫຼວດພື້ນທີ່ຕົວຈິງໃນຄັ້ງນີ້ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດ, ມິດຕະພາບທີ່ດີນຳກັນແລະໄດ້ລົງນາມບົດບັນທຶກຮ່ວມກັນເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ.
ໃນວັນທີ 20 ມັງກອນ 2017, ທີ່ ສະຖານເອກອັກຄະລັດຖະທູດ ຫວຽດນາມ ປະຈຳ ສປປ ລາວ, ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ນຳເອົາກະຕ່າດອກໄມ້ ເຂົ້າອວຍພອນ ທ່ານ ຫງວຽນ ບາ ຮຸ່ງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສປປ ລາວ, ເນື່ອງໃນໂອກາດ ບຸນປີໃໝ່ ເຊິ່ງເປັນບຸນປະເພນີຂອງປະຊາຊົນຫວຽດນາມ.
ໃນໂອກາດນີ້, ທ່ານ ນາງ ຄຳເພົາ ເອີນທະວັນ ໄດ້ຕາງໜ້າໃຫ້ຄະນະນຳກະຊວງການຕ່າງປະເທດ ພ້ອມດ້ວຍພະນັກງານ ໄດ້ອວຍພອນໄຊອັນປະເສີດ ແດ່ທ່ານເອກອັກຄະລັດຖະທູດ ພ້ອມດ້ວຍຄອບຄົວ ແລະ ພະນັກງານ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນການປະຕິບັດໜ້າທີ່ວຽກງານອັນມີກຽດຂອງທ່ານ.