ວັນທີ 30 ພະຈິກ 2016, ກະຊວງການຕ່າງປະເທດ ໄດ້ຈັດພິທີປາຖະກາຖາລະນຶກວັນສາກົນການໃຊ້ຄວາມຮຸນແຮງຕໍ່ແມ່ຍິງ (25 ພະຈິກ) ໃຫ້ກຽດເຜີຍແຜ່ໂດຍ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ໂດຍມີຜູ້ຕາງໜ້າຈາກຄະນະກຳມາທິການເພື່ອຄວາມກ້າວໜ້າແມ່ຍິງ, ບັນດາຄະນະກົມ, ຄະນະພະແນກ ແລະ ພະນັກງານ-ລັດຖະກອນ ພາຍໃນກະຊວງ ເຂົ້າຮ່ວມຫລາຍກວ່າ 400 ຄົນ.

ທ່ານນາງ ຄຳເພົາ ເອີນທະວັນ ໄດ້ຍົກໃຫ້ເຫັນປະຫວັດຄວາມເປັນມາ, ການຮັບຮອງວັນສາກົນຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ແລະ ສະພາບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ຢູ່ໃນພາກຟື້ນ, ສາກົນ ແລະ ຢູ່ໃນ ສປປ ລາວ ໂດຍສະເພາະແມ່ນການໃຊ້ຄວາມຮຸນແຮງ ຕໍ່ຮ່າງກາຍ, ຕໍ່ຈິດໃຈ, ທາງເພດ ແລະ ຕໍ່ຊັບສິນ ຫລື ເສດຖະກິດ ແລະ ທັດສະນະຂອງ ສປປ ລາວ ກ່ຽວກັບຄວາມຮຸນແຮງຕໍ່ແມ່ຍິງ ໂດຍສະເພາະແມ່ນແນວທາງຂອງພັກ, ດ້ານນິຕິກຳ, ບັນດາແຜນພັດທະນາເສດຖະກິດ-ສັງຄົມ 5 ປີ ແລະ ແຜນຍຸດທະສາດ, ພັນທະຂອງ ສປປ ລາວ ຕໍ່ສົນທິສັນຍາສາກົນ ແລະ ຜົນສຳເລັດບາງດ້ານໃນການຈັດຕັ້ງປະຕິບັດວຽກງານຕ້ານການໃຊ້ຄວາມຮຸນແຮງຕໍ່ແມ່ຍິງໃນ ສປປ ລາວ ໃນໄລຍະຜ່ານມາ, ນອກນັ້ນ ທ່ານຮອງລັດຖະມົນຕີ ຍັງຍົກໃຫ້ເຫັນເນື້ອໃນສານຂອງທ່ານຮອງນາຍົກລັດຖະມົນຕີ ແຫ່ງ ສປປ ລາວ, ປະທານຄະນະກຳມາທິການເພື່ອຄວາມກ້າວໜ້າແມ່ຍິງ, ແມ່ ແລະ ເດັກແຫ່ງຊາດ ເນື່ອງໃນໂອກາດ ວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ເຊິ່ງເຮັດໃຫ້ບັນດາຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ເນື້ອໃນວັນດັ່ງກ່າວ ຫລາຍຂຶ້ນ.
    ທ່ານນາງ ຄຳເພົາ ເອີນທະວັນ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ, ໃຫ້ການຊ່ວຍເຫລືອແກ່ຜູ້ທີ່ຖືກເຄາະຮ້າຍຈາກການໃຊ້ຄວາມຮຸນແຮງ, ໃຫ້ຄຳປຶກສາ, ຊ່ວຍເຫລືອທາງດ້ານກົດໝາຍ ແລະ ເພີ່ມທະວີໃນການໂຄສະນາເຜີຍແຜ່ ເຮັດໃຫ້ສັງຄົມມີຄວາມເຂົ້າໃຈຢ່າງເລິກເຊິ່ງວ່າຄວາມຮຸນແຮງຕໍ່ແມ່ຍິງເປັນສິ່ງທີ່ສັງຄົມຮັບບໍ່ໄດ້, ສ້າງເງື່ອນໄຂເຮັດໃຫ້ແມ່ຍິງໃນຄອບຄົວ ໃຫ້ເຂົ້າເຖິງການສຶກສາ ເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຍົກສູງຄຸນນະພາບຊີວິດການເປັນຢູ່ໃຫ້ດີຂຶ້ນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.