ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສເວທີພາກພື້ນອາຊຽນຂອງ ສປປ ລາວ ໄດ້ສືບຕໍ່ນຳພາຄະນະຜູ້ແທນລາວເຂົ້າຮ່ວມກອງປະຊຸມເຈົ້າໜ້າທີ່ອາວຸໂສເວທີພາກພື້ນອາຊຽນ (ASEAN Regional Forum Senior Officials’ Meeting), ໃນວັນທີ 7 ມິຖຸນາ 2018, ທີ່ ສິງກະໂປ.
ກະຊວງການຕ່າງປະເທດ ຈັດພິທີເປີດສູນຄົ້ນຄວ້າແມ່ນ້ຳຂອງສາກົນ ໃນ ສປປ ລາວ ( Global Center for Mekong Studies of Laos: GCMS-Laos), ໃນວັນທີ 6 ມິຖຸນາ 2018, ຢູ່ສະຖາບັນການຕ່າງປະເທດ, ໂດຍການເປັນປະທານໃນການຕັດແຖບຜ້າ ຂອງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ຫວັງ ເວີນທຽນ (Wang Wentian), ເອກອັກຄະລັດຖະທູດແຫ່ງ ສປ ຈີນ ປະຈຳ ສປປ ລາວ, ມີຜູ້ຕ່າງໜ້າຈາກກອງເລຂາສູນຄົ້ນຄວ້າແມ່ນ້ຳຂອງ ສປ ຈີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ພາຍຫຼັງເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ແລະ ກອງປະຊຸມອື່ນໆທີ່ກ່ຽວຂ້ອງ ທີ່ ສິງກະໂປ, ໃນວັນທີ 8 ມິຖຸນາ 2018, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ສືບຕໍ່ນຳພາຄະນະຜູ້ແທນລາວເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ຈີນ ຄັ້ງທີ 24 ພາຍໃຕ້ການເປັນປະທານຮ່ວມຂອງສິງກະໂປ ແລະ ສປ ຈີນ ເພື່ອທົບທວນຄືນການຮ່ວມມືອາຊຽນ-ຈີນ ໃນໄລຍະຜ່ານມາ ແລະ ວາງທິດທາງການຮ່ວມມືສຳລັບຊຸມປີຕໍ່ໜ້າ.