ໃນຕອນເຊົ້າຂອງວັນທີ 11 ພຶດສະພາ 2018, ຢູ່ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ພົນໂທ Bryan P. Fenton, ຮອງຜູ້ບັນຊາການກອງທັບ ສະຫະລັດ ອາເມລິກາ ປະຈຳຂົງເຂດພາກພື້ນປາຊີຟິກ ພ້ອມດ້ວຍຄະນະ, ໃນໂອກາດເດີນທາງມາເຄື່ອນໄຫວຢ້ຽມຢາມ ສປປ ລາວ ໃນລະຫວ່າງວັນທີ 10-11 ພຶດສະພາ 2018.

ໃນໂອກາດດັ່ງກ່າວນີ້, ທ່ານຮອງລັດຖະມົນຕີ ແສງເພັດ ຮຸ່ງບຸນຍວງ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ, ຊຶ່ງເປັນໂອກາດທີ່ສຳຄັນໃນການປຶກສາຫາລື ເພື່ອຊອກຊ່ອງທາງເພີ້ມທະວີການພົວພັນ ແລະ ຮ່ວມມືສອງຝ່າຍໃນຕໍ່ໜ້າ ພາຍຫຼັງທີ່ສອງປະເທດໄດ້ມີການຍົກລະດັບເປັນຄູ່ຮ່ວມມືແບບກວມລວມ, ໂດຍສະເພາະໃນວຽກງານຂຸດຄົ້ນຊອກຫາສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ(MIA), ການຊ່ວຍ ເຫຼືອດ້ານມະນຸດສະທາໍ. ນອກນັ້ນ, ຍັງໄດ້ປຶກສາຫາລືໃນບັນຫາທີ່ຕ່າງຝ່າຍມີຄວາມສົນໃຈຮ່ວມກັນຢ່າງກົງໄປກົງມາ ເພື່ອເປັນການເສີມຂະຫຍາຍການພົວພັນ-ຮ່ວມມື ລະຫວ່າງ ສອງປະເທດ. ໃນໂອກາດນີ້, ທ່ານຮອງລັດຖະມົນຕີ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ສະຫະລັດ ອາເມລິກາ ທີ່ໄດ້ໃຫ້ການຮ່ວມມືຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະວຽກງານເກັບກູ້ລູກລະເບີດທີ່ຍັງບໍ່ທັນແຕກ, ການສຶກສາ, ສາທາລະນະສຸກ, ການຄວບຄຸມ ແລະ ປາບປາມຢາເສບຕິດ ກໍຄື ໃນດ້ານການບັງຄັບໃຊ້ກົດໝາຍ ແລະ ອື່ນໆ.

ໃນລະຫວ່າງການເດີນທາງມາຢ້ຽມຢາມ ສປປ ລາວ ຄັ້ງນີ້, ທ່ານຮອງຜູ້ບັນຊາການກອງທັບ ສະຫະລັດ ອາເມລິກາ ປະຈຳຂົງເຂດພາກພື້ນປາຊີຟິກ ຍັງໄດ້ເຂົ້າຢ້ຽມຂ່ຳນັບ ທ່ານ ພົນຕີ ອ່ອນສີ ແສນສຸກ, ຮອງລັດຖະມົນຕີກະຊວງປ້ອງກັນປະເທດ ເພື່ອຮັດແໜ້ນການພົວພັນ ຮ່ວມມື ລະຫວ່າງ ສປປ ລາວ - ສະຫະລັດ ອາເມລິກາ ໃຫ້ແໜ້ນແຟ້ນຍິ່ງຂຶ້ນ. ທ່ານຮອງຜູ້ບັນຊາການ ແລະ ຄະນະຍັງໄດ້ໄປຢ້ຽມຢາມສະຖານທີ່ທາງດ້ານວັດທະນະທາໍຢູ່ນະຄອນຫຼວງວຽງຈັນ.