ໃນວັນທີ 18 ພຶດສະພາ 2018, ທ່ານ ທອງຜ່ານ ສະຫວັນເພັດ, ຮອງລັດຖະມົນຕິກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ແລະ ທ່ານ ອີກໍ ມໍກູລອບ (Igor V. Morgulov), ຮອງລັດຖະມົນຕິກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງລັດເຊຍ ໄດ້ເປັນປະທານຮ່ວມ ກອງປະຊຸມເຈົ້າໜ້າທີ່ອາວຸໂສອາຊຽນ-ລັດເຊຍ ຄັ້ງທີ 15 ທີ່ ມົດສະກູ, ສະຫະພັນລັດເຊຍ.
ກອງປະຊຸມໄດ້ທົບທວນຄືນຄວາມຄືບໜ້າຂອງການຮ່ວມມືອາຊຽນ-ລັດເຊຍ ໃນໄລຍະ 1 ປີຜ່ານມາ ໂດຍສະເພາະແມ່ນ ຄວາມຄືບໜ້າຂອງການຈັດຕັ້ງຜັນຂະຫຍາຍຜົນກອງປະຊຸມສຸດຍອດສະເຫຼີມສະຫຼອງການພົວພັນ ອາຊຽນ-ລັດເຊຍ ຄົບຮອບ 20 ປີ ຈັດຂຶ້ນໃນວັນທີ 19-20 ພຶດສະພາ 2016 ທີ່ ໂຊຈິ, ລັດເຊຍ ແລະ ການຈັດຕັ້ງປະຕິບັດແຜນປະຕິບັດງານ ອາຊຽນ-ລັດເຊຍ 2016-2020. ກອງປະຊຸມໄດ້ ສະແດງຄວາມເພິ່ງພໍ່ໃຈຕໍ່ຄວາມຄືບໜ້າຂອງການຈັດຕັ້ງປະຕິບັດ ບັນດາຂໍ້ສະເໜີແນະຂອງໜ່ວຍງານຜູ້ຊົງຄຸນວຸດທິ ອາຊຽນ-ລັດເຊຍ ແລະ ໄດ້ປຶກສາຫາລື ກ່ຽວກັບ ທິດທາງສຳລັບການຮ່ວມມືໃນຕໍ່ໜ້າ ທີ່ກວມເອົາຂົງເຂດການເມືອງຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ກອງປະຊຸມໄດ້ເຫັນດີເພີ່ມທະວີການຮ່ວມມືລະຫວ່າງອາຊຽນ ແລະ ລັດເຊຍ ໃນຂົງເຂດຕ່າງໆ ເປັນຕົ້ນແມ່ນການຕ້ານການກໍ່ການຮ້າຍ, ການຄ້າ ແລະ ການລົງທຶນ, ພະລັງງານ ແລະ ບໍ່ແຮ່, ວິທະຍາສາດ ແລະ ເຕັກໂນໂລຊີ ແລະ ການສຶກສາ ລວມທັງການສົ່ງເສີມ ການຮ່ວມມືລະຫວ່າງອາຊຽນ ແລະ ສະຫະພັນຢູເຣເຊຍເພື່ອການຮ່ວມມືດ້ານເສດຖະກິດ (EAEU) ລວມທັງການສ້າງສັນຍາການຄ້າເສລີຮ່ວມກັນ ແລະ ການຮ່ວມມືລະຫວ່າງອາຊຽນ ແລະ ອົງການຮ່ວມມືຊາງໄຮ (SCO) ແລະ ຂົງເຂດອື່ນໆ ທີ່ອາຊຽນ ແລະ ລັດເຊຍ ມີຄວາມສົນໃຈຮ່ວມກັນ ແນໃສ່ປະກອບສ່ວນເຂົ້າໃນການກ້າວໄປສູ່ການຍົກລະດັບການພົວພັນອາຊຽນ-ລັດເຊຍ ເປັນຄູ່ຮ່ວມຍຸດທະສາດໃນຕໍ່ໜ້າ.
ໃນໂອກາດນີ້, ກອງປະຊຸມ ໄດ້ແລກປ່ຽນຄຳຄິດຄຳເຫັນ ກ່ຽວກັບ ບັນຫາພາກພື້ນ ແລະ ສາກົນທີ່ມີຄວາມສົນໃຈ ແລະ ຄວາມເປັນຫ່ວງຮ່ວມກັນ. ກອງປະຊຸມຍັງໄດ້ກະກຽມໃຫ້ແກ່ກອງປະຊຸມລັດຖະມົນຕີີການຕ່າງປະເທດ ອາຊຽນ-ລັດເຊຍ ຊຶ່ງຈະຈັດຂຶ້ນໃນເດືອນ ສິງຫາ 2018 ທີ່ ສິງກະໂປ.
ປັດຈຸບັນ ສປປ ລາວ ເຮັດໜ້າທີ່ເປັນປະເທດປະສານງານ ສຳລັບການພົວພັນ ອາຊຽນ-ລັດເຊຍ ໃນໄລຍະ 3 ປີ ເຊິ່ງຈະສືບຕໍ່ໜ້າທີ່ດັ່ງກ່າວຈົນເຖິງ ເດືອນສິງຫາ 2018.