ໃນຕອນເຊົ້າວັນທີ 1 ສິງຫາ 2018, ທ່ານທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ, ໄດ້ສືບຕໍ່ນຳພາຄະນະຜູ້ແທນລາວເຂົ້າຮ່ວມກອງປະຊຸມ ຫົວໜ້າເຈົ້າໜ້າທີ່ ອາວຸໂສ ອາຊຽນ ບວກສາມ (ຈີນ, ສ. ເກົາຫລີ, ຍີ່ປຸ່ນ). ກອງປະຊຸມໄດ້ປຶກສາຫາລື ແລະ ທົບທວນຄືນການຈັດຕັ້ງປະຕິບັດແຜນວຽກການຮ່ວມມືອາຊຽນບວກສາມ ໄລຍະປີ (2018-2020) ແລະ ການຈັດຕັ້ງປະຕິບັດບັນດາຂໍ້ສະເໜີແນະຂອງໜ່ວຍງານວິໄສທັດອາຊີຕາເວັນອອກ II (EAVG II), ຊຶ່ງເຫັນວ່າ ມີຄວາມຄືບໜ້າຫຼາຍດ້ານ. ໃນໂອກາດນີ້, ກອງປະຊຸມ ໄດ້ເຫັນດີເພີ່ມທະວີການຮ່ວມມືໃນດ້ານຕ່າງໆເຊັ່ນ ການສົ່ງເສີມການຄ້າ, ການເງິນ, ການເຊື່ອມຈອດ ແລະ ການຮັດແຄບຄວາມແຕກໂຕນ, ການປ່ຽນແປງດິນຟ້າອາກາດ ແລະ ໄພພິບັດທຳມະຊາດ, ແລະ ການຄ້ຳປະກັນສະບຽງອາຫານ ຢູ່ໃນພາກພື້ນ. ກອງປະຊູມ ຍັງໄດ້ປຶກສາຫາລືຂໍ້ລິເລີ່ມ ເພື່ອສົ່ງເສີມວັດທະນະທໍາຂອງ ອາຊຽນບວກສາມ (Cultural Cities) ແລະ ຖືໂອກາດນີ້, ຄະນະຜູ້ແທນລາວ ກໍ່ໄດ້ແຈ້ງຕໍ່ກອງປະຊຸມຊາບກ່ຽວກັບແຜນການຈັດກອງປະຊຸມເວທີອາຊີຕາເວັນອອກ (EAF) ລະຫວ່າງວັນທີ 29-30 ສິງຫາ 2018 ທີ່ ຫຼວງພະບາງ ໂດຍຈະແມ່ນ ສປປ ລາວ ແລະ ສ.ເກົາຫຼີ ເປັນປະທານຮ່ວມ ເພື່ອສືບຕໍ່ປຶສາຫາລືທິືດທາງການຮ່ວມມືອາຊຽນບວກສາມໃນຕໍ່ໜ້າ.
ໃນວັນທີ 31 ກໍລະກົດ 2018 ທີ່ ສິງກະໂປ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ,ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ພ້ອມດ້ວຍຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ຊຶ່ງຈັດຂຶ້ນໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 51 ພາຍໃຕ້ການເປັນປະທານຂອງ ສິງກະໂປ.
ໃນວັນທີ 23 ກໍລະກົດ 2018, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຍື່ນໜັງສືແຕ່ງຕັ້ງ ແລະ ຢ້ຽມຂໍ່ານັບ ຂອງ ທ່ານ ນິໂຄຣາ, ເພື່ອດຳລົງຕຳແໜ່ງເປັນຫົວໜ້າຫ້ອງການທະນາຄານໂລກ ປະຈຳ ສປປ ລາວ ຜູ້ໃໝ່ ພ້ອມດ້ວຍຄະນະ ເນື່ອງໃນໂອກາດເດີນທາງມາປະຕິບັດວຽກງານ ຢູ່ ສປປ ລາວ.