ໂດຍຕອບສະໜອງຕາມການເຊື້ອເຊີນຂອງລັດຖະບານແຫ່ງ ສປປ ລາວ, ທ່ານ ນາງ Armida Salsiah Alisjahbana, ຜູ້​ຊ່ວຍ​ເລ​ຂາ​ທິ​ການ​ໃຫ​ຍ່ ອົງການສະຫະປະຊາຊາດ (ສ​ປ​ຊ) ແລະ ທັງເປັນເລ​ຂາ​​ບໍ​ລິ​ຫານ​ງານ​ຂອງ​ຄະ​ນະ​ກຳ​ມາ​ທິ​ການ​ເສດ​ຖະ​ກິດ-ສັງ​ຄົມ ສປຊ ປະ​ຈຳ ພາກ​ພື້ນ​ອາ​ຊີ-ປາ​ຊີ​ຟິກ (UNESCAP) ພ້ອມດ້ວຍຄະນະໄດ້ເດີນ​ທາງ​ມາຢ້ຽມຢາມ ສ​ປ​ປ ລາວ ຢ່າງ​ເປັນທາງການໃນໄລຍະວັນທີ 21-23 ເມສາ 2019, ຊຶ່ງເປັນການຢ້ຽມຢາມ ສປປ ລາວ ຄັ້ງທໍາອິດພາຍຫຼັງ​ທີ່​ທ່ານ​ໄດ້​ຖືກ​ເລືອກຕັ້ງ​ເປັນ​ເລ​ຂາ​ບໍ​ລິ​ຫານ​ງານ​ຄົນ​ໃໝ່​ຂອງ​ UNESCAP. ໃນ​ໂອ​ກາດ​ມາຢ້ຽມຢາມລາວໃນຄັ້ງນີ້, ທ່ານ​ Armida Salsiah Alisjahbana ໄດ້​ມີໂອກາດເຂົ້າ​ຢ້ຽ​ມ​ຂໍ່າ​ນັບບັນດານຳ​ຂັ້ນ​ສູງ​ຂອງ ສ​ປ​ປ ລາວ​ ​ເປັນຕົ້ນ ​ທ່ານ ສົມ​ດີ ດວງ​ດີ, ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ​ກະ​ຊ​ວງ​ການ​ເງິນ; ທ່ານ ສຸ​ພັນ ແກ້ວ​ມີ​ໄຊ, ລັດ​ຖະ​ມົນ​ຕີ​ກະ​ຊວງ​ແຜນ​ການ ແລະ ການ​ລົງ​ທຶນ ແລະ ທ່ານ ສະ​ເຫຼີມ​ໄຊ​ ກົມ​ມະ​ສິດ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ເພື່ອເປັນການຮັດແໜ້ນສາຍພົວພັນການຮ່ວມມືລະຫວ່າງ ສປປ ລາວ ແລະ UNESCAP ໃຫ້ແໜ້ນແຟ້ນຂຶ້ນກວ່າເກົ່າ.

ການ​ເດີນ​ທາງ​ມາຢ້ຽມ​ຢາມໃນ​ຄັ້ງ​ນີ້ ຖື​ເປັນຂີດໝາຍອັນສຳຄັນຂອງສາຍພົວພັນການຮ່ວມມື ລະຫວ່າງ ສປປ ລາວ ແລະ ອົງກອນດັ່ງກ່າວ. ໃນໂອກາດນີ້ໂດຍຕາງໜ້າໃຫ້ລັດຖະບານ ສປປ ລາວ, ທ່ານຮອງນາຍົກລັດຖະມົນຕີ ສົມດີ ດວງດີ ກໍ່ໄດ້ສະແດງຄວາມຂອບໃຈມາຍັງ UNESCAP ທີ່ໄດ້ປະກອບສ່ວນຊ່ວຍເຫຼືອທາງດ້ານເຕັກນິກວິຊາການ ແລະ ທຶນຮອນໃນການຍົກລະດັບບຸກຄະລາກອນຂອງລາວໃນຂົງເຂດການພັດທະນາເສດຖະກິດ-ສັງຄົມໃນດ້ານຕ່າງໆ ຂອງ ສປປ ລາວ, ໂດຍສະເພາະກໍ່ຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 05 ປີ ຄັ້ງທີ 8​ (2016-2020), ວິໄສທັດ 2030 ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ລວມທັງການຫລຸດພົ້ນອອກຈາກສະຖານະພາບປະເທດດ້ອຍພັດທະນາ.

ນອກ​ຈາກນັ້ນ, ທ່ານ Armida Salsiah Alisjahbana​ຍັງ​ໄດ້​ໄປ​ຢ້ຽມ​ຊົມ​ສູນ​ພື້ນ​ຟູ​ຜູ້​ເສຍ​ອົງ​ຄະ​ (ສູນ COPE) ແລະ ໄດ້​ທ່ຽວ​ຊົມ​ສະ​ຖານ​ທີ່​ທ່ອງ​ທ່ຽວ​ທີ່​ສຳ​ຄັນ​ໃນ​ນະ​ຄອນ​ຫຼ​ວງວຽງ​ຈັນ ກ່ອນ​ທີ່ຈະ​ເດີນ​ທາງ​ກັບ​ດ້ວຍ​ຄວາມ​ສ​ະ​ຫວັດ​ດີ​ພາບ.

ອົງກອນ UNESCAP ແມ່ນອົງກອນພາກພື້ນດ້ານການພັດທະນາຂອງອົງການ ສປຊ, ຊຶ່ງໄດ້ຖືກກໍ່ຕັ້ງຂື້ນໃນປີ 1947 ໂດຍມີສຳນັກງານໃຫ່ຍຕັ້ງຢູ່ບາງກອກ, ປະເທດໄທ ແລະ ມາຮອດປະຈຸບັນປະກອບມີ 53 ປະເທດສະມາຊິກ. ຄະນະກຳມາທິການດັ່ງກ່າວ ມີພາລະບົດບາດໃນການສະໜອງເຕັກນິກ, ວິຊາການ ແລະ ຍົກລະດັບບຸກຄະລາກອນຂອງບັນດາປະເທດສະມາຊິກໃນການແກ້ໄຂບັນຫາສິ່ງທ້າທາຍທາງດ້ານການສ້າງນະໂຍບາຍເສດຖະກິດມະຫາພາກ, ການຄ້າ-ການລົງທຶນ, ນະວັດຕະກຳ, ພະລັງງານ, ການຂົນສົ່ງ, ສະຖິຕິ, ເຕັກໂນໂລຊີການສື່ສານ, ການພັດທະນາສັງຄົມ ແລະ ສິ່ງແວດລ້ອມ.