ໃນວັນທີ 8 ກຸມພາ 2017, ທີ່ ສະຖານເອກອັກຄະລັດຖະທູດ ຣັດເຊຍ ປະຈຳ ສປປ ລາວ, ທ່ານ ທ່ຽງ ບຸບຜາ, ອະດີດເອກອັກຄະລັດຖະທູດວີສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະພັນ ຣັດເຊຍ ໄດ້ຮັບຫລຽນຍ້ອງຍໍຂອງກະຊວງການຕ່າງປະເທດ ຣັດເຊຍ, ຊຶ່ງເປັນກຽດມອບໂດຍ ທ່ານ ມີຄາອີນ ບາຣານນົບ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະພັນ ຣັດເຊຍ ປະຈໍາ ສປປ ລາວ, ໂດຍມີ ທ່ານ ບຸນເຫລືອ ພັນດານຸວົງ, ຫົວໜ້າຫ້ອງການກະຊວງການຕ່າງປະເທດ ພ້ອມດ້ວຍຄະນະ ແລະ ຕາງໜ້າກົມພາຍໃນກະຊວງການຕ່າງປະເທດ ແລະ ລວມທັງ ພະນັກງານສະຖານທູດ ຣັດເຊຍ ເຂົ້າຮ່ວມເປັນສັກຂີພິຍານໃນພິທີມອບຫຼຽນດັ່ງກ່າວ.
ການມອບຫລຽນຍ້ອງຍໍຂອງກະຊວງການຕ່າງປະເທດ ຣັດເຊຍ ໃຫ້ແກ່ ທ່ານ ທ່ຽງ ບຸບຜາ ໃນຄັ້ງນີ້ ແມ່ນຜົນງານຂອງຜູ້ກ່ຽວໃນໄລຍະປະຕິບັດໜ້າທີ່ການທູດຢູ ຣັດເຊຍ ແຕ່ປີ 2011-2016 ທີ່ໄດ້ການປະກອບສ່ວຍຢ່າງຕັ້ງໜ້າເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ມີມາແຕ່ຍາວນານ ລະຫວ່າງ ລາວ-ຣັດເຊຍ ມີບາດກ້າວຂະຫຍາຍຕົວຕໍ່ເນື່ອງຕະຫລອດມາ ອັນພົ້ນເດັ່ນແມ່ນການຊຸກຍູ້ໃຫ້ມີການແລກ ປ່ຽນການຢ້ຽມຢາມໄປມາຫາສູ່ກັນ ລະຫວ່າງ ການນໍາຂັ້ນສູງຂອງ ສປປ ລາວ ແລະ ສະຫະພັນ ຣັດເຊຍ ຢ່າງເປັນປົກກະຕີ, ຊຶ່ງມາໃນໄລຍະໃໝ່ ການພົວພັນຮ່ວມມືຂອງສອງປະເທດ ລາວ-ຣັດເຊຍ ໄດ້ກ້າວຂຶ້ນສູ່ລະດັບໃໝ່ ເປັນປະເທດຄູ່ຮ່ວມມືຍຸດທະສາດນໍາກັນ.
ຄຽງຄູ່ກັບການຮ່ວມມືທາງດ້ານການເມືອງແລ້ວ ທ່ານ ທ່ຽງ ບຸບຜາ ຍັງມີບົດບາດປະກອບສ່ວນຊຸກຍູ້ການຮ່ວມມືດ້ານເສດຖະກິດ-ການຄ້າ, ການທ່ອງທ່ຽວ, ການສືກສາ-ວັດທະນະທໍາ ແລະ ດ້ານອື່ນໆ. ຕໍ່ຜົນງານ ແລະ ຄຸນ ງາມຄວາມດີ ໃນການປະກອບສ່ວນຢ່າງຫ້າວຫັນດັ່ງກ່າວ ກະຊວງການຕ່າງປະເທດ ແຫ່ງ ສະຫະພັນ ຣັດເຊຍ ຈຶ່ງໄດ້ມອບຫຼຽນຍ້ອງຍໍ ໃຫ້ແກ່ ທ່ານ ທ່ຽງ ບຸບຜາ, ອະດີດເອກອັກຄະລັດຖະທູດວີສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະພັນ ຣັດເຊຍ ໃນໂອກາດຈົບການປະຕິບັດໜ້າທີ່ການທູດຂອງຕົນ ຢູ່ຣັດເຊຍ.
ໃນວັນທີ 02 ກຸມພາ 2017, ທ່ານ ຫລີ ບຸນຄໍ້າ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກໄທ ພ້ອມດ້ວຍພະນັກງານສະຖານທູດລາວ ໄດ້ເຂົ້າອວຍພອນ ທ່ານ ຫງວຽນ ຕັດ ຖັງ, ເອກອັກຄະລັດຖະທູດ ແຫ່ງ ສສ. ຫວຽດນາມ ປະຈໍາ ຣາຊະອານາຈັກໄທ ເນື່ອງໃນໂອກາດປີໃໝ່ຂອງປະຊາຊົນຫວຽດນາມ.
ໃນວັນທີ 14 ມັງກອນ 2017, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກ ກໍາປູເຈຍ ຮ່ວມກັບຫ້ອງການທີ່ປຶກສາທູດຝ່າຍທະຫານ ໄດ້ຈັດການແຂ່ງຂັນກິລາບານເຕະມິດຕະພາບ ເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 68 ປີ (20 ມັງກອນ 1949 - 20 ມັງກອນ 2017) ໂດຍມີ ພະນະທ່ານ ປຣະສິດ ໄຊຍະສິດ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ຣາຊະອານາຈັກ ກໍາປູເຈຍ ພ້ອມດ້ວຍພັນລະຍາ ເປັນກຽດເຂົ້າຮ່ວມຊົມການແຂ່ງຂັນ ພ້ອມດ້ວຍພະນັກງານສະຖານທູດລາວ, ຫ້ອງການທີ່ປຶກສາທູດຝ່າຍທະຫານ ແລະ ນັກສຶກສາລາວເຂົ້າຮ່ວມທັງໝົດ ຈໍານວນ 75 ຄົນ, ການແຂ່ງຂັນແມ່ນໄດ້ດຳເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະ ຄວາມສາມັກຄີອັນແໜ້ນແຟ້ນ ແລະ ໃນວັນທີ 18 ມັງກອນ 2017, ຢູ່ຫ້ອງການທີ່ປຶກສາທູດຝ່າຍຫານ ແຫ່ງ ສປປ ລາວ ທ່ານ ພົນຕີ ພາດ ວິປົນໂສເພຍ, ຫົວໜ້າກົມພົວພັນຕ່າງປະເທດ, ຕາງໜ້າໃຫ້ກະຊວງປ້ອງກັນປະເທດ ແຫ່ງຣາຊະອານາຈັກ ກໍາປູເຈຍ ພ້ອມດ້ວຍຄະນະ ກໍໄດ້ເຂົ້າອວຍພອນ ທ່ານ ພັນເອກ ໂສວັດ ວັນຕິສຸກ, ທີ່ປຶກສາທູດຝ່າຍທະຫານ ແຫ່ງ ສປປ ລາວ ແລະ ຄະນະ, ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 68 ປີ ເພື່ອເປັນການຮັດແໜ້ນສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງຊາດ, ສອງກອງທັບ ລາວ-ກໍາປູເຈຍ ທີ່ມີມູນເຊື້ອມາແຕ່ດົນນານແລ້ວນັ້ນ ໃຫ້ນັບມື້ນັບແໜ້ນແຟ້ນ ແລະ ຈະເລີນງອກງາມຍິ່ງໆຂຶ້ນ.