ເນື່ອງໃນໂອກາດວັນຊາດທີ 2 ທັນວາ ຄົບຮອບ 41 ປີ (2 ທັນວາ 1975 - 2 ທັນວາ 2016) ທີ່ໄດ້ວຽນບັນຈົບຄົບຮອບມາອີກວາລະໜຶ່ງ. ໃນວັນທີ 3 ທັນວາ 2016, ສະຖານກົງສຸນໃຫຍ່ ແຫ່ງ ສປປ ລາວ ທີ່ ນະຄອນຊຽງໄຮ້, ໄດ້ຈັດຕັ້ງພິທີໂຮມຊຸມນຸມ ເພື່ອສະເຫຼີມສະຫຼອງວັນຊາດຂຶ້ນ, ທີ່ ມະຫາວິທະຍາໄລຕົ່ງຫົວ, ນະຄອນຊຽງໄຮ້ ເຊິ່ງມີບັນດາພະນັກງານປະຈຳສະຖານກົງສຸນໃຫຍ່ ແລະ ນັກສຶກສາລາວທີ່ຢູ່ນະຄອນຊຽງໄຮ້ ແລະ ເຂດໃກ້ຄຽງອ້ອມຂ້າງ ເຂົ້າຮ່ວມປະມານ 300 ກວ່າຄົນ.
ໃນໂອກາດນີ້, ເພື່ອເປັນການປຸກລະດົມຂົນຂວາຍດ້ານແນວຄິດການເມືອງ ໃຫ້ບັນດານັກສຶກສາລາວມີນ້ຳໃຈຮັກເຊື້ອແພງຊາດ ປະກອບສ່ວນຢ່າງຫ້າວຫັນໃນການພັດທະນາປະເທດຊາດ ໃນນາມເປັນໜໍ່ແໜງຂອງປະເທດຊາດ, ທ່ານ ນາງ ສີສະໄໝ ຫຼວງຈັນດາວົງ, ກົງສຸນໃຫຍ່ ໄດ້ໃຫ້ກຽດຂຶ້ນເລົ່າປະຫວັດມູນເຊື້ອຄວາມເປັນມາ ແລະ ຄວາມໝາຍສຳຄັນຂອງວັນຊາດ 2 ທັນວາ ຊີ້ໃຫ້ເຫັນຄວາມສຳຄັນຂອງວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດທີ່ ປວງຊົນລາວບັນດາເຜົ່າໄດ້ມີອິດສະຫຼະພາບ, ໄດ້ເປັນເຈົ້າຂອງປະເທດຊາດຢ່າງແທ້ຈິງ, ເປັນວັນທີ່ປະເທດລາວ ໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ທ່ານຍັງໄດ້ກ່າວເຖິງການສ້າງສາພັດທະນາປະເທດຊາດຕະຫຼອດໄລຍະ 41 ປີ ຜ່ານມາ ແລະ ທິດທາງ ເພື່ອສືບຕໍ່ເສີມຂະຫຍາຍມູນເຊື້ອ ວັນທີ 2 ທັນວາ ເຂົ້າໃນການສ້າງສາພັດທະນາປະເທດຊາດ. ພ້ອມນັ້ນ, ໃນວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 96 ປີ (13/12/1920-13/12/2016), ທ່ານກົງ ສຸນໃຫຍ່ ຍັງໄດ້ເລົ່າປະຫວັດ ແລະ ຄຸນງາມຄວາມດີຂອງ ປະທານ ໄກສອນ ພົມວິຫານ, ຜູ້ນຳອັນແສນເຄົາລົບຮັກຂອງ ປະຊາຊົນລາວບັນດາເຜົ່າ.
ພິທີສະເຫຼີມສະຫຼອງວັນຊາດ ແຫ່ງ ສປປ ລາວ ຄົບຮອບ 41 ປີນີ້ ເຊິ່ງເປັນຄວາມໝາຍລ້ຳຄ່າ ທີ່ປຸກລະດົມນ້ຳໃຈເຮັດໃຫ້ບັນດານັກສຶກສາທັງໝົດທີ່ເຂົ້າຮ່ວມ ແມ່ນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ວັນສຳຄັນດັ່ງກ່າວ ພ້ອມ ທັງເປັນແຮງບັນດານໃຈໃຫ້ຕັ້ງໜ້າສຶກສາຮ່ຳຮຽນໃຫ້ປະສົບຜົນສຳເລັດ ເພື່ອນຳເອົາວິຊາຄວາມຮູ້ທີ່ໄດ້ຮຽນມາ ໄປປະກອບສ່ວນເຂົ້າໃນການສ້າງສາພັດທະນາປະເທດຊາດຕໍ່ໄປ.
ໃນພິທີຄັ້ງນີ້ ຍັງມີການສະແດງສິລະປະຂອງນັກສຶກສາ ເຊິ່ງເປັນການເຮັດໃຫ້ງານສະເຫຼີມສະຫຼອງມີບັນຍາກາດອັນເຕັມໄປດ້ວຍຄວາມຟົດຟື້ນມ່ວນຊື່ນ, ມີເນື້ອໃນ ແລະ ໄດ້ຮັບຜົນສຳເລັດຢ່າງຈົບງາມ.