ຄະ​ນະ​ກໍາ​ມາ​ທິ​ການ​ລະ​ຫວ່າງ​ລັດ​ຖະ​ບານ​ອາ​ຊຽນ ວ່າ​ດ້ວຍ ​ສິດ​ທິ​ມະ​ນຸດ (ASEAN Intergovern-mental Commission on Human Rights ຫຼື AICHR) ໄດ້​ຈັດ​ກອງ​ປະ​ຊຸມ ຄັ້ງທີ 22 ​ຂຶ້ນ ​ລະ​ຫວ່າງ ວັນ​ທີ 23-25 ພະຈິກ 2016 ທີ່ ແຂວງ ຫຼວງພະບາງ, ສປປ ລາວ ​ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ພູ​ໂຂງ ສີ​ສຸ​ລາດ, ຫົວ​ໜ້າ​ກົມ​ສົນ​ທິ​ສັນ​ຍາ​ ແລະ ກົດ​ໝາຍ, ກະ​ຊວງ​ການ​ຕ່າງ​ປະ​ເທດ, ປະ​ທານ​ຄະ​ນະ​ກຳ​ມາ​ທິ​ການ​ລະ​ຫວ່າງ​ລັດ​ຖະ​ບານ​ອາ​ຊຽນ​ວ່າ​ດ້ວຍ​ສິດ​ທິ​ມະ​ນຸດ ສຳລັບ​ປີ 2016 ໂດຍ​ມີ​ຜູ້​ຕາງ​ໜ້າ​ຂອງ​ປະ​ເທດ​ສະ​ມາ​ຊິກ​ອາ​ຊຽນ ແລະ ເຈົ້າ​ໜ້າ​ທີ່​ກອງ​ເລ​ຂາອາ​ຊຽນ​ເຂົ້າ​ຮ່ວມ.

ກອງ​ປະ​ຊຸມ​ໄດ້​ປຶກສາ​ຫາລື​ໃນ​ຫຼາຍຫົວ​ຂໍ້ ​ເປັນຕົ້ນ​ແມ່ນການ​ລາຍ​ງານ​ກ່ຽວກັບຈັດ​ຕັ້ງ​ບັນດາ​ກິດຈະກຳ​ຕ່າງໆໃນປີ 2016 ​ເຊັ່ນ:ກອງ​ປະຊຸ​ມປຶກສາ​ຫາລືກ່ຽວກັບ​ແງ່​ມຸມ​ສິດທິ​ມະນຸດ​ໃນ​ການຈັດຕັ້ງປະຕິບັດ​ສົນທິສັນ ຍາ​ອາຊຽນວ່າ​ດ້ວຍ​ການ​ຕ້ານ​ການ​ຄ້າ​ມະນຸດ ​ລະຫວ່າງ​ ຄະນະ​ກຳມາ​ທິການ​ລະຫວ່າງ​ລັດຖະບານ​ອາຊຽນວ່າ​ດ້ວຍ​ສິດທິ​ມະນຸດ ​ແລະ ​ເຈົ້າໜ້າທີ່​ອາວຸ​ໂສ​ອາຊຽນວ່າ​ດ້ວຍ​ການຕ້ານອາ​ຊະ​ຍາ​ກຳ​ຂ້າມ​ຊາດ (SOMTC), ກອງ​ປະຊຸມ​ລະດັບ​ພາກພື້ນກ່ຽວກັບ​ການ​ຜັນ​ຂະຫຍາຍສິດທິ​ຂອງ​ຄົນ​ພິການ ​ເຂົ້າ​ໃນ​ປະຊາ​ຄົມ​ອາຊຽນ​, ​ແລະ ການ​ຝຶກອົບຮົມ​ກ່ຽວກັບ​ສິດ​ຂອງ​ຄົນ​ພິການ, ສິດທິມະນຸດ ​ແລະຄວາມຮັບຜິດຊອບຕໍ່ສັງຄົມຂອງບໍລິສັດ ແລະ ກິດຈະກໍາອື່ນໆ ທີ່ຄະນະກຳມາທິການໄດ້ຈັດຕັ້ງປະຕິບັດ​ໃນ 1 ປີຜ່ານມາ. ກອງ​ປະຊຸມ​ຍັງ​ໄດ້ປຶກສາ​ຫາລື​ກ່ຽວກັບ​ແຜນບູລິ​ມະ​ສິດໃນ​ປີ 2017 ເຊິ່ງ​ລວມ​ມີ​ການ​ຈັດ​ກອງ​ປະ​ຊຸມ​ສຳ​ມະ​ນາ ແ​ລ​ະ ການ​ເຮັດ​ບົດ​ສຶກ​ສາ​ຄົ້ນ​ຄວ້າ​ໃນ​ຫົວ​ຂໍ້​ຕ່າງໆ​ເຊັ່ນ: ສິດ​ທິ​ມະ​ນຸດ​ກັບ​ສິ່ງ​ແວດ​ລ້ອມ, ສິດ​ທິ​ໃນ​ການ​​ໄດ້​ຮັບ​ການສຶກ​ສາ, ສິດທິ​ຂອງ​ຄົນ​ພິການ,ການ​ເຂົ້າ​ເຖິງ​ຄວາມ​ຍຸ​ຕິ​ທຳ ແລະ ການ​ຊ່ວຍ​ເຫຼືອ​ດ້ານ​ກົດ​ໝາຍ, ການປະຕິບັດກົດໝາຍ ສາກົນດ້ານສິດທິມະນຸດໂດຍອົງການຕຸລາການ ແລະ ອື່ນໆ. ​ໃນມື້ສຸດທ້າຍຂອງກອງປະຊຸມຄັ້ງນີ້ ໄດ້ມີການມອບ-ຮັບການເປັນປະທານຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ຂອງ ສປປ ລາວ ​ໃຫ້ແກ່ຟີລິບປິນ ລະຫວ່າງ ທ່ານ ພູ​ໂຂງ ສີ​ສຸລາ​ດ, ປະທານ​ຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ ປີ 2016 ​ແລະ ທ່ານ ນາງ​ ເບ​ລິນ​ດາ ເອັມ ອານເຕ, ເອກອັກຄະລັດຖະທູດ ຟີ​ລິບ​ປິນ ປະຈຳ ສປປ ລາວ ​ໃນ​ນາມ​ຜູ້ຕາງໜ້າ​ຊົ່ວຄາວ​ຂອງ​ຟີ​ລິບ​ປິນ ປະຈຳ ຄະນະ​ກຳມາ​ທິການ​ລະຫວ່າງ​ລັດຖະບານ​ອາ​ຊຽນ ວ່າ​ດ້ວຍ ສິດທິ​ມະນຸດ, ການ​ເປັນ​ປະທານ​ຂອງ​ຟີ​ລິບ​ປິນຈະ​ເລີ່​ມຂຶ້ນ​ແຕ່​ມື້​ວັນ​ທີ 1 ມັງກອນ ຫາ 31 ທັນວາ 2017

ຄະ​ນະ​ກຳ​ມາ​ທິ​ການ​ລະ​ຫວ່າງ​ລັດ​ຖະ​ບານ​ອາ​ຊຽນ ​ວ່າ​ດ້ວຍ​ ສິດ​ທິ​ມະ​ນຸດ ຖືກສ້າງ​ຕັ້ງ​ຂຶ້ນ ໃນປີ 2009​ພາຍ​ໃຕ້​ກົດ​ບັດ​ອາ​ຊຽນ ​ເປັນ​ອົງ​ກອນຫຼັກ​ໃນ​ການ​ສົ່ງ​ເສີມ​ການຮ່ວມ​ມື​​ດ້ານ​ສິດ​ທິ​ມະ​ນຸດ​ໃນ​ອາ​ຊຽນ​, ​ການ​ປະ​ຕິ​ບັດ​ຖະ​ແຫຼງ​ການ​ອາ​ຊຽນ ​ວ່າ​ດ້ວຍ​ ສິດ​ທິ​ມະ​ນຸດ, ບັນ​ດາ​ຖະ​ແຫຼງ​ການ​ອື່ນໆທີ່​ກ່ຽວ​ຂ້ອງ​ຂອງ​ອາ​ຊຽນ​ ກໍ​ຄື ພັນ​ທະ​ພາຍ​ໃຕ້​ສົນ​ທິ​ສັນ​ຍາ, ສັນ​ຍາ​ທີ່​ບັນ​ດາ​ປະ​ເທດ​ອາຊຽນ​ເປັນ​ພາ​ຄີ ບົນ​ພື້ນ​ຖານ​ສະ​ພາບ​ເງື່ອນ​ໄຂ ແລະ ຈຸດ​ພິ​ເສດ​ຂອງ​ພາກ​ພື້ນ ແລະ ຂອງ​ແຕ່​ລະ​ປະ​ເທດ​​ສະ​ມາ​ຊິກ. ​