ໃນຕອນບ່າຍຂອງວັນທີ 1 ທັນວາ ນີ້, ຢູ່ທີ່ ສຳນັກງານສະຖານເອກອັກຄະລັດຖະທູດ ແຫ່ງ ສປປ ລາວ, ບາງກອກ, ປະເທດໄທ, ໄດ້ຈັດປາຖະກະຖາເລົ່າມູນເຊື້ອສອງວັນປະຫວັດສາດ ວັນຊາດ 2 ທັນວາ ຄົບຮອບ 41 ປີ ( 2 ທັນວາ 1975 - 2 ທັນວາ 2016), ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົຍຮອບ 96 ປີ ( 13 ທັນວາ 1920 - 13 ທັນວາ 2016). ໃຫ້ກຽດເຜີຍແຜ່ໂດຍ ທ່ານ ຫລີ ບຸນຄ້ຳ, ເອກອັກຄະລັດຖະທູດ ແຫ່ງ ສປປ ລາວ ປະຈຳຣາຊາອານາຈັກໄທ, ມີພະນັກງານສະຖານທູດ ແລະ ຕາງໜ້ານັກສຶກສາລາວ ທີ່ພວມສຶກສາຢູ່ໃນປະເທດໄທ ເຂົ້າຮ່ວມ 60 ກວ່າຄົນ.

ທ່ານເອກອັກຄະລັດຖະທູດ ຫລີ ບຸນຄ້ຳ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງ ວັນຊາດ 2 ທັນວາ ເຊິ່ງເປັນຂີດໝາຍແຫ່ງໄຊຊະນະອັນຫຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ຂອງຊາດລາວ, ອັນໄດ້ໄຂສັງກາດໃໝ່ໃຫ້ ແກ່ປະຊາຊົນລາວບັນດາເຜົ່າໄດ້ມີອິດສະລະພາບ ແລະ ຄວາມເປັນເຈົ້າຂອງປະເທດຊາດຢ່າງແທ້ຈິງ, ປະເທດຊາດມີເອກະລາດ ທີ່ສົມບູນ, ມີອະທິປະໄຕຢ່າງຄົບຖ້ວນເທົ່າທຽມກັບປະເທດອື່ນໆ ໃນເວທີປະຊາຄົມໂລກ.

ທ່ານທູດ ຍັງໄດ້ຍົກໃຫ້ເຫັນຜົນສຳເລັດອັນພົ້ນເດັ່ນແຫ່ງການພັດທະນາເສດຖະກິດ-ສັງຄົມ ໂດຍລວມໃນໄລຍະຜ່ານມາ ທີ່ມີທັງກາລະໂອກາດເອື້ອອຳນວຍ ແລະ ສິ່ງທ້າທາຍຫລາຍຢ່າງ. ໃນ 1 ປີ ຜ່ານມາ, ພາຍໃຕ້ການນຳພາອັນຖືກຕ້ອງຂອງພັກ-ລັດ, ປວງຊົນລາວບັນດາເຜົ່າສາມາດຜ່ານຜ່າອຸປະສັກນາໆປະການ, ເຮັດສຳເລັດໜ້າທີ່ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ເສດຖະກິດສືບຕໍ່ຂະຫຍາຍຕົວ, ປະເທດຊາດມີສະຖຽນລະພາບທາງການເມືອງ, ຊິວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂຶ້ນ, ຄວາມທຸກຍາກນັບມື້ຫລຸດລົງ, ຄວາມສາມັກຄີພາຍໃນເປັນປືກແຜ່ນແໜ້ນໜ້າ, ບົດບາດຂອງຊາດໃນເວທີ ພາກພື້ນ-ສາກົນ ນັບມື້ນັບສູງເດັ່ນຂຶ້ນ.

ທ່ານທູດໄດ້ຍົກໃຫ້ເຫັນຊິວິດ ແລະ ການເຄື່ອນໄຫວຂອງ ປະທານ ໄກສອນ ພົມວິຫານ ທີ່ຕິດພັນກັບພາລະກິດຕໍ່ສູ້ປະຕິວັດກູ້ຊາດເປັນເວລາຍາວນານ ຕ້ານຈັກກະພັດຜູ້ຮຸກຮານ. ທ່ານເປັນຜູ້ນຳທີ່ແສນເຄົາລົບຮັກຂອງປວງຊົນລາວບັນດາເຜົ່າ. ຕະຫລອດໄລຍະຊິວິດຂອງເພີ່ນແມ່ນເຕັມໄປດ້ວຍຄວາມເສຍສະລະເພື່ອຊາດ ແລະ ເພື່ອປະຊາຊົນ. ຮຽກຮ້ອງໃຫ້ບັນດາສະຫາຍສະມາຊິກພັກ, ພະນັກງານ, ນັກສຶກສາ ຈົ່ງຮ່ຳຮຽນເອົາແບບຢ່າງຄຸນສົມບັດອັນຍອດຍິ່ງຂອງ ປະທານ ໄກສອນ ພົມວິຫານ ເພື່ອໃຫ້ກາຍເປັນພະນັກງານຜູ້ດີເດັ່ນ ນຳເອົາຜົນປະໂຫຍດສູງສຸດມາສູ່ປະເທດຊາດ ແລະ ປະຊາຊົນ.

ກ່ອນໜ້ານີ້ ໃນວັນທີ 27 ພະຈິກ, ສາມອົງການຈັດຕັ້ງມະຫາຊົນຂອງສະຖານທູດລາວ ທີ່ ບາງກອກ ກໍ່ໄດ້ຈັດຂະບວນການອອກແຮງງານລວມ ແລະ ແຂ່ງຂັນກິລາ ເພື່ອຂ່ຳນັບຮັບຕ້ອນ ວັນຊາດທີ 2 ທັນວາ ຄົບຣອບ 41 ປີ ຢ່າງເປັນຂະບວນຟົດຟຶ້ນ.