ໃນວັນທີ 09 ກຸມພາ 2017, ທ່ານ ຄໍາອິນ ຄິດຈະເດດ, ໄດ້ເຂົ້າຍື່ນສານຕາຕັ້ງຕໍ່ ທ່ານ Michael Moller, ຜູ້ອໍານວຍການໃຫຍ່ ຫ້ອງການ ສປຊ ທີ່ ເຊີແນວ, ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ຫ້ອງການ ສປຊ ແລະ ອົງການຈັດຕັ້ງສາກົນອື່ນໆ.
ວັນທີ 18 ກຸມພາ 2017 ນີ້, ທ່ານ ຫລີ ບຸນຄໍ້າ, ເອກອັກຄະລັດຖະທູດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກໄທ ໄດ້ໃຫ້ກຽດເຂົ້າຮ່ວມງານສືບສານປະເພນີວັດທະນະທໍາໄທພວນ ແລະ ທອດຜ້າປ່າສາມາຄີ ຄັ້ງທີ 59 ປະຈໍາປີ 2017, ຈັດຂຶ້ນທີ່ໂຮງຮຽນບ້ານຫລັບມິນພວນ, ຕຳບົນຈອມຈັນ, ອຳເພີວຽງສາ, ຈັງຫວັດນ່ານ ໂດຍມີ ທ່ານ ໄພສານ ວິມົນລັດ, ຜູ້ວ່າຣາຊາການຈັງຫວັດນ່ານ, ອຳນາດການປົກຄອງທຸກຂັ້ນຕະຫລອດຮອດພໍ່ແມ່ປະຊາຊົນຊາວຈັງຫວັດນານ ແລະ ຊາວໄທພວນຈາກ 23 ຈັງຫວັດຂອງ ປະເທດໄທເຂົ້າຮ່ວມຫລາຍກວ່າ 3000 ຄົນ.
ໃນຕອນເຊົ້າວັນທີ 14 ກຸມພາ 2017, ທີ່ ພະລາຊະວັງດຸສິດ, ສະໜາມເສືອປ່າ, ຣາຊະອານາຈັກໄທ; ທ່ານເອກອັກຄະລັດຖະທູດ ຫລີ ບຸນຄ້ຳ ພ້ອມດ້ວຍຄະນະ ໄດ້ເດີນທາງເຂົ້າຮ່ວມເປັນປະທານ ໃນພິທີເປີດຊຸດຝຶກອົບຮົມເຕັກໂນໂລຊີທາງການແພດ ແລະ ສາທາລະນະສຸກ ສຳລັບບຸກຄະລາກອນການແພດ ຈາກ ສປປ ລາວ. ເຂົ້າຮ່ວມໃນງານດັ່ງກ່າວປະກອບດ້ວຍ ທ່ານສາດສະດາຈານ ກຽດຕິມະສັກ ໄກສິດ ຕັນຕິສິຣິນ, ທີ່ປຶກສາໂຄງການ ຕາມພະຣາດຊະດຳລິ ສົມເດັດພະເທບ ພະຣັດຣາຊະສຸດາ ສະຫຍາມບໍຣົມຣາຊະກຸມມາຣີ, ນາງ ຈິດກະເສມ ຕັນຄີຣີ, ຮອງອະທິບໍດີກົມຄວາມຮ່ວມມືລະຫວ່າງປະເທດ, ກະຊວງການຕ່າງປະເທດ ແຫ່ງ ຣາຊະອານາຈັກໄທ, ທ່ານ ຮອງສາດສະດາຈານ ປຣີຊາ ສຸນທະຣານັນ, ຮອງອະທິການບໍດີ ມະຫາວິທະຍາໄລມະຫິດົນ.