ເພື່ອເປັນການສະເຫລີມສະຫລອງວັນສ້າງຕັ້ງອາຊຽນ ຄົບຮອບ 49 ປີ ແລະ ການຮັດແໜ້ນຄວາມສາມັກຄີ ລະຫວ່າງ ປະເທດອາຊຽນດ້ວຍກັນ ໃນວັນທີ 31 ຕຸລາ 2016 ທີ່ຜ່ານມາ, ສຳນັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈຳຫ້ອງການ ສປຊ ແລະ ອົງການຈັດຕັ້ງສາກົນອື່ນໆ ທີ່ ເຊີແນວ ໃນນາມປະທານອາຊຽນ ປີ 2016 ໄດ້ຮ່ວມກັບບັນດາສຳນັກງານຜູ້ຕາງໜ້າຖາວອນ ຂອງບັນດາປະເທດອາຊຽນອື່ນໆ ທີ່ ເຊີແນວ ໄດ້ຈັດພິທີເປີດງານວາງສະແດງຮູບແຕ້ມອາຊຽນ ປີ 2016 ຂຶ້ນຢ່າງເປັນທາງການ ທີ່ ຫ້ອງການ ສປຊ (Palais des Nations), ຊຶ່ງຮູບແຕ້ມທີ່ນຳມາສະແດງໃນງານດັ່ງກ່າວນີ້ ແມ່ນໄດ້ມາຈາກການປະກອບສ່ວນຂອງ 10 ປະເທດອາຊຽນ ມີຈຳນວນທັງໝົດ 34 ຮູບ ທີ່ມີເນື້ອໃນທີ່ສ່ອງແສງເຖິງຄວາມຫລາກຫລາຍຂອງວັດທະນະທຳ, ຮີດຄອງປະເພນີ, ທຳມະຊາດອັນສວຍສົດງົດງາມ ແລະ ຊີວິດການເປັນຢູ່ຊອງປະຊາຊົນອາຊຽນ. ໃນມື້ພິທີເປີດງານ ທ່ານ ບໍວອນທັດ ດວງຈັກ, ຮອງຫົວໜ້າສຳນັກງານ, ອຸປະທູດຊົ່ວຄາວ ສຳນັກງານຜູ້ຕາງໜ້າ ສປປ ລາວ ປະຈຳຫ້ອງການ ສປຊ ທີ່ ເຊີແນວ ໃນນາມປະທານຄະນະກຳມະການອາຊຽນ ທີ່ ເຊີແນວ (ASEAN Geneva Committee) ໄດ້ເຂົ້າຮ່ວມ ແລະ ກ່າວເປີດພິທີດັ່ງກ່າວຮ່ວມກັບ ທ່ານ Michael Mooler, ຫົວໜ້າຫ້ອງການ ສປຊ ທີ່ ເຊີແນວ, ຊຶ່ງມີບັນດາ ທູຕານຸທູດ ຂອງປະເທດອາຊຽນ, ບັນດາແຂກທີ່ຖືກເຊີນ ແລະ ຜູ້ເຂົ້າຊົມຈາກພາກສ່ວນຕ່າງໆຫລາຍກວ່າ 200 ທ່ານ ເຂົ້າຮ່ວມ. ການຈັດງານສະແດງຮູບແຕ້ມໃນຄັ້ງນີ້ ເປັນສ່ວນໜຶ່ງຂອງກິດຈະກຳຂອງຄະນະກຳມະການອາຊຽນ ທີ່ ເຊີແນວ ປະຈຳປີ 2016 ແລະ ງານວາງສະແດງດັ່ງກ່າວ ໄດ້ດຳເນີນໄປເປັນເວລາ 2 ອາທິດ ເລີ່ມແຕ່ວັນທີ 31 ຕຸລາ ຫາ 11 ພະຈິກ 2016 ຈຶ່ງສຳເລັດ.
ໃນວັນທີ 23-24 ພະຈິກ 2016 ກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໄດ້ຈັດກອງປະຊຸມທາບທາມເພື່ອລະດົມຄວາມຄິດເຫັນໃສ່ຮ່າງກົດໝາຍວ່າດ້ວຍສົນທິສັນຍາ ແລະ ສັນຍາສາກົນຂຶ້ນ ທີ່ຫ້ອງວ່າການແຂວງຈຳປາສັກ, ໂດຍມີທ່ານ ສົມຄິດ ວັນຄຳ, ຮອງຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ, ບັນດາຫົວໜ້າກົມ, ຮອງກົມ ໃນຄະນະຊີ້ນຳການສ້າງກົດໝາຍວ່າດ້ວຍສົນທິສັນຍາ, ຜູ້ຕາງໜ້າຈາກຫ້ອງວ່າການປົກຄອງແຂວງ, ພະແນກການຕ່າງປະເທດແຂວງ ແລະ ພະແນກການທີ່ກ່ຽວຂ້ອງຈາກແຂວງຈຳປາສັກ ແຂວງ ສະຫວັນນະເຂດ, ແຂວງ ສາລະວັນ, ແຂວງ ເຊກອງ ແລະ ແຂວງ ອັດຕະປື.
ວັນທີ 23 ພະຈິກ 2016, ໃນນາມ ສປປ ລາວ ເປັນປະທານໝູນວຽນອາຊຽນ, ສະຖານເອກອັກຄະລັດ ຖະທູດ ແຫ່ງ ສປປ ລາວ ປະຈຳ ສາທາລະນະລັດ ສິງກະໂປ ໄດ້ຮັບກຽດເປັນເຈົ້າພາບ ຈັດງານສະເຫຼີມສະຫຼອງພົບປະສັງສັນ (ASEAN GALA NIGTH), ໂດຍມີບັນດາສະຖານເອກອັກຄະລັດຖະທູດ ພ້ອມດ້ວຍພະນັກງານສະຖານທູດ ຂອງບັນດາປະເທດສະມາຊິກອາຊຽນ, ການນຳກະຊວງການຕ່າງປະເທດ ສິງກະໂປ ແລະ ປະເທດຄູ່ຮ່ວມເຈລະຈາອາຊຽນ ເຂົ້າຮ່ວມ 400 ກວ່າຄົນ. ຈຸດປະສົງຂອງການຈັດງານດັ່ງກ່າວແມ່ນ ພົບປະ ສັງສັນ, ສາ້ງຄວາມສາມັກຄີ, ເຜີຍແຜ່, ແລກປ່ຽນບົດຮຽນ ແລະ ສົ່ງເສີມ ສີລະປະວັດທະນະທຳຂອງບັນດາ ປະເທດສະມາຊິກອາຊຽນດ້ວຍກັນຕາມປະເພນີທີ່ໄດ້ຈັດຂຶ້ນທຸກໆປີ.