ໃນວັນທີ 15 ສິງຫາ 2018, ທີ່ກະຊວງການຕ່າງປະເທດ, ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ດາວ ວັນ ຮຽວ, ກົງສຸນໃຫຍ່ ແຫ່ງ ສສ. ຫວຽດນາມ ທີ່ ນະຄອນປາກເຊ, ແຂວງຈໍາປາສັກ, ໃນໂອກາດສໍາເລັດການປະຕິບັດໜ້າທີ່ການທູດຢູ່ ສປປ ລາວ.

ໃນຕອນເຊົ້າຂອງ ວັນທີ 14 ສິງຫາ 2018, ທີ່ສະໜາມບິນສາກົນ, ແຂວງຫຼວງພະບາງ ໄດ້ມີການຈັດພິທີມອບ-ຮັບ ສິ່ງເສດເຫຼືອຂອງທະຫານອາເມລິກາ ທີ່ໄດ້ເສຍຊິີວິດໃນປາງສົງຄາມຢູ່ລາວ ທີ່ຖືກຄົ້ນພົບຈາກການປະຕິບັດງານຮ່ວມໃນພາກສະໜາມ ລະຫວ່າງ ຄະນະວິຊາການລາວ-ອາເມລິກາ ຄັ້ງທີ 5 ປະຈໍາສົກປີ 2017-2018, ຢູ່ ເຂດແຂວງອຸດົມໄຊ ແລະ ຫົວພັນ.

ໃນຕອນເຊົ້າ ຂອງວັນທີ 10 ສິງຫາ 2018 ທີ່ສະໂມສອນກະຊວງຕປທກົມຈັດຕັ້ງ ແລະ ພະນັກງານ ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ແນະນຳບັນດານິຕິກຳກ່ຽວກັບ ການອອກບັດ ພະນັກງານ-ລັດຖະກອນ ໃຫ້ກຽດເປັນປະທານຮ່ວມໂດຍທ່ານ ແສງເພັດ ຮຸ່ງບຸນຍວງ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ວິໄຊ ພັນດານຸວົງ, ຮອງລັດຖະມົນຕີ ກະຊວງພາຍໃນ ທັງເປັນຫົວໜ້າຄະນະຊີ້ນໍາການອອກບັດ ພະນັກງານ-ລັດຖະກອນຂັ້ນສູນກາງ. ມີທ່ານຫົວໜ້າກົມຄຸ້ມຄອງລັດຖະກອນ ແລະ ຄະນະຮັບຜິດຊອບຈາກ ກະຊວງພາຍໃນ, ບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານ-ລັດຖະກອນ ກະຊວງການຕ່າງປະເທດເຂົ້າຮ່ວມທັງໝົດເກືອບ 500 ກ່ວາທ່ານ.