ໃນຕອນເຊົ້າ ຂອງວັນທີ 10 ສິງຫາ 2018 ທີ່ສະໂມສອນກະຊວງຕປທກົມຈັດຕັ້ງ ແລະ ພະນັກງານ ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ແນະນຳບັນດານິຕິກຳກ່ຽວກັບ ການອອກບັດ ພະນັກງານ-ລັດຖະກອນ ໃຫ້ກຽດເປັນປະທານຮ່ວມໂດຍທ່ານ ແສງເພັດ ຮຸ່ງບຸນຍວງ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ວິໄຊ ພັນດານຸວົງ, ຮອງລັດຖະມົນຕີ ກະຊວງພາຍໃນ ທັງເປັນຫົວໜ້າຄະນະຊີ້ນໍາການອອກບັດ ພະນັກງານ-ລັດຖະກອນຂັ້ນສູນກາງ. ມີທ່ານຫົວໜ້າກົມຄຸ້ມຄອງລັດຖະກອນ ແລະ ຄະນະຮັບຜິດຊອບຈາກ ກະຊວງພາຍໃນ, ບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານ-ລັດຖະກອນ ກະຊວງການຕ່າງປະເທດເຂົ້າຮ່ວມທັງໝົດເກືອບ 500 ກ່ວາທ່ານ.

ຈຸດປະສົງຂອງການຈັດປະຊຸມດັ່ງກ່າວແມ່ນເພື່ອປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດ ຖະມົນຕີ ສະບັບເລກທີ 1098/ຫສນຍ, ລົງວັນທີ 27/11/2017 ແລະ ແຈ້ງການຂອງກະຊວງພາຍໃນສະບັບເລກທີ 157/ພນ, ລົງວັນທີ 7/12/2017 ກ່ຽວກັບການອອກບັດພະນັກງານ-ລັດຖະກອນ ເພື່ອເຜີຍແຜ່, ແນະນຳກ່ຽວກັບບັນດານິຕິກຳທີ່ກ່ຽວຂ້ອງໃຫ້ພະນັກງານ-ລັດຖະກອນກະຊວງການຕ່າງປະເທດໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນຂອງບັດພະນັກງານ-ລັດຖະກອນໃນການສະໜອງຂໍ້ມູນປະຫວັດພະນັກງານ-ລັດຖະກອນໃຫ້ຖືກຕ້ອງສອດຄ່ອງກັບລະບຽບການ. ບັດພະນັກງານ-ລັດຖະກອນຈະປະກອບມີ ບັດປະກັນສັງຄົມ, ບັດ ATM ລວມກັນໃນບັດດຽວທີ່ຈະໃຫ້ຄວາມສະດວກ ແລະ ທັນສະໄໝຂື້ນແລະ ແນະນຳໃຫ້ພະນັກງານ-ລັດຖະກອນມີຄວາມຮັບຮູ້ ເຂົ້າໃຈໃນການນຳໃຊ້ບັດໃຫ້ຖືກຕ້ອງຕາມລະບຽບກົດໝາຍ.

ນອກຈາກນັ້ນ, ທ່ານປະທານກອງປະຊຸມ ຍັງໄດ້ຍົກໃຫ້ເຫັນຄວາມສຳຄັນ ຂອງການອອກບັດໃຫ້ພະນັກງານ-ລັດຖະກອນ ທາງດ້ານຫຼັກການ ແລະ ເນື້ອໃນການຈັດຕັ້ງປະຕິບັດ ທີ່ຈະເປັນການຢັ້ງຢືນ ແລະ ກວດກາ ຈຳນວນພົນຜູ້ມີໜ້າ ຫຼື ບໍ່ມີໜ້າຕົວຈິງຂອງພະນັກງານ-ລັດຖະກອນ ແຕ່ລະກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ. ທັງເປັນການປັບປຸງຂໍ້ມູນປະຫວັດລັດຖະກອນໃຫ້ຖືກຕ້ອງ, ໃຫ້ສອດຄ່ອງກັບລະບຽບການ ໃນການຄຸ້ມຄອງພະນັກງານ-ລັດຖະກອນຕາມກົດໝາຍໃຫ້ມີຄວາມທັນສະໄໝ, ພ້ອມທັງການເບີກຈ່າຍເງິນເດືອນ, ເງິນອຸດໜູນ ແລະ ນະໂຍບາຍຕ່າງໆ ຖືກຕ້ອງຕາມຕົວຈິງ ແລະ ເພື່ອເປັນບ່ອນອີງໃຫ້ການຄຸ້ມຄອງພະນັກງານ-ລັດຖະກອນຂອງບັນດາກະຊວງ, ອົງການລັດທຽບເທົ່າກະຊວງ ຂັ້ນສູນກາງ, ຂັ້ນແຂວງ ແລະ ຂັ້ນເມືອງ ໃຫ້ມີຄວາມສະດວກ ແລະ ຄວາມເປັນເອກະພາບ ໃນການຈັດຕັ້ງປະຕິບັດຕົວຈິງ ໃນຂອບເຂດທົ່ວປະເທດ.