ໃນຕອນເຊົ້າຂອງ ວັນທີ 14 ສິງຫາ 2018, ທີ່ສະໜາມບິນສາກົນ, ແຂວງຫຼວງພະບາງ ໄດ້ມີການຈັດພິທີມອບ-ຮັບ ສິ່ງເສດເຫຼືອຂອງທະຫານອາເມລິກາ ທີ່ໄດ້ເສຍຊິີວິດໃນປາງສົງຄາມຢູ່ລາວ ທີ່ຖືກຄົ້ນພົບຈາກການປະຕິບັດງານຮ່ວມໃນພາກສະໜາມ ລະຫວ່າງ ຄະນະວິຊາການລາວ-ອາເມລິກາ ຄັ້ງທີ 5 ປະຈໍາສົກປີ 2017-2018, ຢູ່ ເຂດແຂວງອຸດົມໄຊ ແລະ ຫົວພັນ.
ເປັນກຽດເຂົ້າຮ່ວມໃນພິທີມອບ-ຮັບໃນຄັ້ງນີ້, ຕາງໜ້າໃຫ້ແກ່ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານ MIA,ເປັນຜູ້ກ່າວມອບ ແລະ ຕາງໜ້າໃຫ້ແກ່ລັດຖະບານ ສະຫະລັດ ອາເມລິກາ ແມ່ນ ທ່ານ ນາງ Rena Bitter, ເອກອັກຄະລັດຖະທູດ ສະຫະລັດ ອາເມລິກາ ປະຈໍາ ສປປ ລາວ, ເປັນຜູ້ກ່າວຮັບ, ໂດຍຊ້ອງໜ້າພາກສ່ວນທີ່ກ່ຽວຂ້ອງຂອງທັງສອງຝ່າຍທີ່ເຂົ້າຮ່ວມເປັນສັກຂີພະຍານ.
ໂດຍສືບຕໍ່ປະຕິບັດນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ຄອບຄົວກໍ່ຄືຍາດພີ່ນ້ອງ ຂອງທະຫານອາເມລິກາຜູ້ຫາຍສາບສູນໃນປາງສົງຄາມຢູ່ລາວ ແລະ ອີງຕາມການຮ້ອງຂໍຂອງລັດຖະບານອາເມລິກາໃນການແກ້ໄຂບັນຫາດັ່ງກ່າວ, ເລີ່ມແຕ່ປີ 1985 ເປັນຕົ້ນມາ ຄະນະວິຊາສອງຝ່າຍ ລາວ-ອາເມລິກາ ໄດ້ຮ່ວມກັນດໍາເນີນການສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ ທັງໝົດມີ 573 ຄົນ.ມາຮອດປະຈຸບັນ, ລັດຖະບານລາວ ໄດ້ມອບສິ່ງເສດເຫຼືອທະຫານອາເມລິກາທີ່ໄດ້ເສຍຊີວິດຢູ່ລາວທີ່ໄດ້ຮັບການສັນນະສູດແລ້ວຈຳນວນ 282 ຄົນ ໃຫ້ແກ່ຝ່າຍ ອາເມລິກາ ແລະ ຍັງອີກ 291 ຄົນ ທີ່ຍັງເຫຼືອແມ່ນຈະໄດ້ຮ່ວມກັນສືບຕໍ່ຄົ້ນຫາໃນຕໍ່ໜ້າ.
ເມື່ອມໍ່ໆມານີ້, ລັດຖະບານສະຫະລັດອາເມລິກາໄດ້ຂໍຮ້ອງໃຫ້ລັດຖະບານ ສປປ ລາວ ຊ່ວຍເຫຼືອໃນການຊອກຫາຜູ້ທີ່ຫາຍສາບສູນໃນປາງສົງຄາມຢູ່ລາວໃຫ້ໄວກວ່າເກົ່າ. ຕໍ່ບັນຫານີ້, ໂດຍເຫັນໄດ້ຄວາມສໍາຄັນຂອງວຽກງານມະນຸດສະທໍານີ້, ລັດຖະບານລາວໄດ້ໃຫ້ ແລະ ກຽມພ້ອມທີ່ຈະໃຫ້ການຮ່ວມມືໃນການປະຕິບັດງານຮ່ວມສອງຝ່າຍເພື່ອຊອກຄົ້ນ ໃນການເອົາສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນດັ່ງກ່າວສົ່ງຄືນໃຫ້ຄອບຄົວຂອງພວກກ່ຽວເທົ່າທີ່ຈະສາມາດເຮັດໄດ້. ສະນັ້ນ, ໃນໄລຍະ 2017-2018 ນີ້ ຝ່າຍລາວໄດ້ປະຕິບັດນະໂຍບາຍຕໍ່ລັດຖະບານອາເມລິກາ ຄື: ໄດ້ອະນຸຍາດໃຫ້ເພີ້ມການປະຕິບັດງານຮ່ວມລາວ-ອາເມລິກາ ໃນພາກສະໜາມຈາກ 4 ຄັ້ງ ຂື້ນເປັນ 5 ຄັ້ງຕໍ່ປີ, ລວມທັງໄດ້ຜ່ອນສັ້ນຜ່ອນຍາວຫຼາຍບັນຫາຕາມເງື່ອນໄຂ ແລະ ຄວາມສາມາດຕົວຈິງຂອງຝ່າຍລາວ ເພື່ອເຮັດໃຫ້ການຮ່ວມມືດ້ານມະນຸດສະທໍາດັ່ງກ່າວ ລະຫວ່າງ ສປປ ລາວ-ສະຫະລັດ ອາເມລິກາ ໄດ້ຮັບການຈັດຕັ້ງປະຕິບັດໃຫ້ດີຂື້ນເປັນກ້າວໆ.
ການຮ່ວມມືສອງຝ່າຍ ລາວ- ສະຫະລັດ ອາເມລິກາໃນດ້ານນີ້ ໄດ້ຮັບຜົນສໍາເລັດເປັນຢ່າງດີ ກໍ່ຍ້ອນມີການຮ່ວມມືຂອງລັດຖະບານ, ເຈົ້າໜ້າທີ່ທຸກຂັ້ນນັບແຕ່ສູນກາງລົງຮອດທ້ອງຖິ່ນ ກໍ່ຄືການຮ່ວມມືອັນດີຂອງປະຊາຊົນບັນດາເຜົ່າ, ອັນເປັນການສ່ອງແສງຢ່າງຈະແຈ້ງເຖິງນະໂຍບາຍມະນຸດສະທໍາອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ລັດຖະບານ ແລະ ປະຊາຊົນອາເມລິກາ, ໂດຍສະເພາະຕໍ່ຄອບຄົວຍາດຕິພີ່ນ້ອງຜູ້ທີ່ຫາຍສາບສູນໃນປາງສົງຄາມຢູ່ລາວ.