ໃນລະຫວ່າງວັນທີ 3-6 ສິງຫາ 2018 ທີ່ຜ່ານມາ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານການສຳຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ, ທ່ານ ພົນຕີ ຄໍາສີ ວົງຄໍາຊາວ, ຫົວໜ້າຫ້ອງວ່າການກະຊວງປ້ອງກັນປະເທດ, ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ ໄດ້ເດີນທາງໄປຢ້ຽມຢາມການປະຕິບັດງານຮ່ວມ ລາວ-ອາເມລິກາ ໃນການສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ (MIA), ຄັ້ງທີ 5 ປະຈໍາສົກປີ 2017-2018, ຢູ່ເຂດບ້ານນາແທ່ນ ແລະ ບ້ານບັກ, ເມືອງວຽງໄຊ, ແຂວງຫົວພັນ. ການເດີນທາງໄປຢ້ຽມຢາມຂອງຄະນະດັ່ງກ່າວໃນຄັ້ງນີ້ ແມ່ນເພື່ອເປັນການຕິດຕາມ ແລະ ກວດກາການປະຕິບັດງານຂອງຄະນະວິຊາການຮ່ວມ ລາວ-ອາເມລິກາ ໃນການປະຕິບັດວຽກງານດ້ານມະນຸດສະທຳຮ່ວມກັນ ແລະ ທັງເປັນການສະແດງເຖິງຄວາມເອົາໃຈໃສ່ຊີ້ນໍານໍາພາຈາກເຈົ້າໜ້າທີ່ຂັ້ນສູງຂອງລັດຖະບານ ແຫ່ງ ສປປ ລາວ ໃນການແກ້ໄຂບັນຫາຜູ້ຫາຍສາບສູນໃນປາງສົງຄາມຢູ່ລາວຕາມການຮ້ອງຂໍຈາກລັດ ຖະບານອາເມລິກາ.

ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ MIA ໄດ້ພົບປະ ແລະ ໂອ້ລົມກັບບັນດາພະນັກງານວິຊາການປະຈໍາພາກສະໜາມຈາກ ກະຊວງການຕ່າງປະເທດ, ກະຊວງປ້ອງກັນປະເທດ ແລະ ອໍານາດການປົກຄອງທ້ອງຖິ່ນທີ່ຄ້າຍພັກເມືອງຊໍາເໜືອ, ແຂວງຫົວພັນ, ນອກນີ້, ຄະນະຍັງໄດ້ເຄື່ອນໄຫວຢ້ຽມ ຢາມການປະຕິບັດງານຕົວຈິງຢູ່ຈຸດຂຸດຄົ້ນ ແລະ ຮັບຟັງການລາຍງານສະພາບການປະຕິບັດວຽກງານຢູ່ແຕ່ລະຈຸດຂຸດຄົ້ນຈາກຫົວໜ້າພາກສະໜາມຝ່າຍລາວ ແລະ ຝ່າຍອາເມລິກາ, ຊຶ່ງເຫັນເປັນເອກະພາບກັນວ່າ ການຮ່ວມມືມີປະສິດທິຜົນ, ທັງນີ້, ກໍຍ້ອນພະນັກງານວິຊາການທັງສູນກາງ ແລະ ທ້ອງຖິ່ນ ພ້ອມດ້ວຍພໍ່ແມ່ປະຊາຊົນລາວໄດ້ປະກອບສ່ວນຢ່າງຕັ້ງໜ້າ ແລະ ມີຄວາມເອົາໃຈໃສ່ຕໍ່ການປະຕິບັດໜ້າທີ່ວຽກງານຂອງຕົນເປັນຢ່າງດີ. ໃນການຂຸດຄົ້ນຄັ້ງນີ້ໄດ້ພົບສິ້ນສ່ວນສິ່ງເສດເຫຼືອຂອງທະຫານອາເມລິກາຈໍານວນນື່ງຢູ່ເຂດບ້ານນາແທ່ນ, ເມືອງວຽງໄຊ, ແຂວງຫົວພັນ ແລະ ເຂດບ້ານສີບຸນເຮືອງ, ເມືອງຮຸນ, ແຂວງອຸດົມໄຊ, ຊຶ່ງຈະໄດ້ຈັດພິທີມອບ-ຮັບຢ່າງເປັນທາງການໃນອະນາຄົດອັນໃກ້ນີ້.

ລັດຖະບານກໍ່ຄືປະຊາຊົນລາວໄດ້ໃຫ້ ແລະ ຈະສືບຕໍ່ໃຫ້ການຮ່ວມມືເປັນຢ່າງດີໃນວຽກງານນີ້ກັບຝ່າຍສະຫະ ລັດ ແນໃສ່ນໍາເອົາສິ່ງເສດເຫຼືອຂອງທະຫານອາເມລິກາ ທີ່ເສຍຊີວິດໃນສົງຄາມຢູ່ລາວສົ່ງຄືນໃຫ້ຄອບຄົວຂອງພວກກ່ຽວເທົ່າທີ່ສາມາດຊອກຄົ້ນໄດ້. ການຮ່ວມມືໃນດ້ານນີ້ ໄດ້ຮັບຜົນສຳເລັດເປັນຢ່າງດີກໍ່ຍ້ອນມີການຮ່ວມມືຂອງລັດຖະບານລາວ, ເຈົ້າໜ້າທີ່ກ່ຽວຂ້ອງຂອງລາວທຸກໆຂັ້ນແຕ່ສູນກາງລົງຮອດທ້ອງຖິ່ນ ແລະ ການຮ່ວມມືອັນດີຂອງປະຊາຊົນບັນ ດາເຜົ່າ, ອັນເປັນການສະແດງໃຫ້ເຫັນເຖິງນະໂຍບາຍມະນຸດສະທຳອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ປະຊາຊົນອາເມລິກາ, ໂດຍສະເພາະຕໍ່ຄອບຄົວຍາດພີ່ນ້ອງຂອງຜູ້ທີ່ຫາຍສາບສູນໃນປາງສົງຄາມຢູ່ລາວ.