ໃນວັນທີ 16 ທັນວາ 2020, ທີ່ ກະຊວງການຕ່າງປະເທດ, ໄດ້ມີພິທີລົງນາມຈົດໝາຍ ແລກປ່ຽນ ລະຫວ່າງ ສປປ ລາວ ແລະ ຍີ່ປຸ່ນ (Exchange Notes) ເພື່ອຜັນຂະຫຍາຍ ສັນຍາວ່າດ້ວຍການຮ່ວມມື ດ້ານເຕັກນິກ-ວິຊາການ ລະຫວ່າງ ອາຊຽນ-ຍີ່ປຸນ ທີ່ໄດ້ລົງນາມກັນ ໃນເດືອນພຶດສະພາ ຜ່ານມາ. ຕາງໜ້າຝ່າຍລາວ ຮ່ວມລົງນາມ ຄັ້ງນີ້ແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ແລະ ຕາງໜ້າຝ່າຍຍີ່ປຸ່ນ ແມ່ນ ທ່ານ ທາເກວາກະ ເຄໂຊ(TAKEWAKA Keizo),ເອກອັກຄະລັດຖະທູດ ຍີ່ປຸ່ນ ປະຈໍາ ສປປ ລາວ ແລະ ມີບັນດາພະນັກງານກ່ຽວຂ້ອງ ຂອງທັງສອງຝ່າຍ ເຂົ້າຮ່ວມຢ່າງພ້ອມພຽງ.
ທີ່ ຫ້ອງວ່າການແຂວງ ຄຳມ່ວນ
ທີ່ ຫ້ອງວ່າການແຂວງ ບໍລິຄຳໄຊ
ທີ່ ຫ້ອງວ່າການແຂວງສະຫວັນນະເຂດ
ໃນລະຫວ່າງວັນທີ 8-11 ທັນວາ 2020, ທ່ານ ທອງສະຫວັນ ພົມວິຫານ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດ ໄດ້ລົງເຄື່ອນໄຫວເຮັດວຽກຢູ່ແຂວງບັນດາແຂວງພາກກາງ ເຊັ່ນ ແຂວງ ບໍລິຄຳໄຊ, ແຂວງ ຄຳມ່ວນ ແລະ ແຂວງ ສະຫວັນນະເຂດຊຶ່ງໄດ້ຮັບການຕ້ອນຮັບຈາກການນຳບັນດາແຂວງດັ່ງກ່າວ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ.
ໃນໂອກາດນີ້, ທ່ານຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດໄດ້ໃຫ້ກຽດເຜີຍແຜ່ສະພາບການທີ່ພົ້ນເດັ່ນໃນພາກພື້ນ, ສາກົນ ແລະ ວຽກງານຊາຍແດນ, ໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດ ອ້ອມຂ້າງແຂວງດັ່ງກ່າວ ໄດ້ຮັບຮູ້ ແລະ ເຂົ້າໃຈຕໍ່ບັັນຫາດັ່ງກ່າວຢ່າງເລິກເຊິ່ງ, ໂດຍສະເພາະສະພາບການທີ່ພົ້ນເດັ່ນຂອງພາກພື້ນ ແລະ ສາກົນ ແມ່ນຍັງເປັນທ່າອ່ຽງລວມຢູ່ຕໍ່ກັບວຽກງານເສີມສ້າງສັນຕິພາບ, ການຮ່ວມມືເພື່ອການພັດທະນາ ແລະ ການເຊື່ອມໂຍງສາກົນ ຊຶ່ງມີຜູ້ເຂົ້າຮ່ວມຮັບຟັງທັງໝົດ 500 ກວ່າຄົນ. ສໍາລັບວຽກງານສໍາຫຼວດ ແລະ ປັກຫຼັກໝາຍຊາຍແດນກັບບັນດາປະເທດເພື່ອນບ້ານ ເຫັນວ່າ ມີຄວາມຄືບໜ້າຫຼາຍສົມຄວນ, ໂດຍສະເພາະໄດ້ສໍາເລັດການສໍາຫຼວດ ແລະ ປັກຫຼັກໝາຍຊາຍແດນກັບ 3 ປະເທດ ຄື: ສສ. ຫວຽດນາມ ໄດ້ກໍ່ສ້າງຫຼັກ ໝາຍຮ່ວມກັນ ທັງໝົດ 1.002 ຫຼັກໝາຍ ໃນລວງຍາວຂອງເສັ້ນຊາຍແດນ 2.337 ກິໂລແມັດ; ສປ.ຈີນ ໄດ້ປັກຫຼັກໝາຍຮ່ວມກັນຈໍານວນ 102 ຫຼັກໝາຍໃນລວງຍາວຂອງເສັ້ນຊາຍແດນ 508 ກິໂລແມັດ ແລະ ສສ. ມຽນມາ ໄດ້ປັກຫຼັກ ໝາຍນໍາກັນທັງໝົດ 172 ຫຼັກໝາຍ ຢູ່ສອງຟາກແມ່ນໍ້າຂອງເບື້ອງລະ 86 ຫຼັກໝາຍ ໃນລວງຍາວຂອງເສັ້ນຊາຍແດນ 236 ກິໂລແມັດ. ສ່ວນຊາຍແດນ ສປປ ລາວ ກັບຣາຊາອານາຈັກກໍາປູເຈຍ ມາເຖິງປະຈຸບັນແມ່ນສໍາເລັດໄປແລ້ວຈໍານວນ 86% ຂອງເສັ້ນຊາຍແດນທັງໝົດປະມານ 535 ກິໂລແມັດ, ຊຶ່ງສາມາດປັກຫຼັກໝາຍຊາຍແດນຮ່ວມກັນໄດ້ທັງໝົດ 126 ຫຼັກໝາຍ ແລະ ຍັງມີຈຸດຄົງຄ້າງຈຳນວນໜຶ່ງ ທີ່ຈະສືບຕໍ່ຮ່ວມກັນແກ້ໄຂຕໍ່ໄປ. ສຳລັບຊາຍແດນ ສປປ ລາວ ກັບຣາຊາອານາຈັກໄທ ໄດ້ສໍາເລັດການສຳຫຼວດ ແລະ ປັກຫຼັກໝາຍຊາຍແດນໃນພູມີປະເທດຕົວຈິງສຳເລັດ 211 ຫຼັກ ໝາຍ ໃນລວງຍາວຂອງເສັ້ນຊາຍແດນ 676ກິໂລແມັດ ເທົ່າກັບ 93% ຂອງເສັ້ນຊາຍແດນທາງບົກ 735 ກິໂລແມັດ ຫຼືເທົ່າກັບ 37% ຂອງເສັ້ນຊາຍແດນທັງໝົດທີ່ມີລວງຍາວປະມານ 1.835 ກິໂລແມັດ. ໃນນີ້ ຍັງມີຈຸດຄົງຄ້າງຮ່ວມກັນ 14 ບໍລິເວນ, ຊຶ່ງຈະໄດ້ສືບຕໍ່ປຶກສາຫາລືຊອກຫາວິທີແກ້ໄຂຮ່ວມກັນ. ສໍາລັບຊາຍແດນທາງນໍ້າ ແມ່ນຍັງຢູ່ໃນການດໍາເນີນການຖ່າຍທອດເສັ້ນຊາຍແດນ ຈາກແຜນທີ່ຝຣັ່ງ-ສະຫຍາມ ປີ 1929-1931 ລົງໃສ່ແຜນທີ່ສະບັບໃໝ່ ປີ 2008 ມາດຕາສ່ວນ 1:25.000 ຕາມວິທີການທາງດ້ານເຕັກນິກຂອງແຕ່ລະຝ່າຍ.
ໃນລະຫວ່າງວັນທີ 10-12 ທັນວາ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນບັນດາທູຕານຸທູດອາຊຽນ (ບຣູໄນ ດາຣູຊາລາມ, ກຳປູເຈຍ, ອິນໂດເນເຊຍ, ມາເລເຊຍ, ມຽນມາ, ຟິລິບປິນ, ສິງກະໂປ ແລະ ໄທ) ປະຈຳ ສປປ ລາວ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ. ການຢ້ຽມຢາມຄັ້ງນີ້ ແມ່ນເປັນໜຶ່ງໃນກິດຈະກໍາທີ່ສະເໜີຢູ່ກອງປະຊຸມປຶກສາຫາລື ລະຫວ່າງ ກະຊວງການຕ່າງປະເທດ ແລະ ບັນດາທູດອາຊຽນປະຈໍາ ສປປ ລາວ (ASEAN Consultative Meeting), ເຊິ່ງບັນດາທູດອາຊຽນ ປະຈໍາ ສປປ ລາວ ໄດ້ມີຄວາມສົນໃຈເພື່ອມາຊອກຮູ້ສະພາບຈຸດພິເສດ ກໍຄືການພັດທະນາເສດຖະກິດ-ສັງຄົມ, ທ່າແຮງ ແລະ ຂໍ້ມູນການລົງທຶນຂອງແຂວງສະຫວັນນະເຂດ.