ໃນລະຫວ່າງວັນທີ 10-12 ທັນວາ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ   ໄດ້ນຳພາຄະນະຜູ້ແທນບັນດາທູຕານຸທູດອາຊຽນ (ບຣູໄນ ດາຣູຊາລາມ, ກຳປູເຈຍ, ອິນໂດເນເຊຍ, ມາເລເຊຍ, ມຽນມາ, ຟິລິບປິນ, ສິງກະໂປ ແລະ ໄທ) ປະຈຳ ສປປ ລາວ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ. ການຢ້ຽມຢາມຄັ້ງນີ້ ແມ່ນເປັນໜຶ່ງໃນກິດຈະກໍາທີ່ສະເໜີຢູ່ກອງປະຊຸມປຶກສາຫາລື ລະຫວ່າງ ກະຊວງການຕ່າງປະເທດ ແລະ ບັນດາທູດອາຊຽນປະຈໍາ ສປປ ລາວ (ASEAN Consultative Meeting), ເຊິ່ງບັນດາທູດອາຊຽນ ປະຈໍາ ສປປ ລາວ ໄດ້ມີຄວາມສົນໃຈເພື່ອມາຊອກຮູ້ສະພາບຈຸດພິເສດ ກໍຄືການພັດທະນາເສດຖະກິດ-ສັງຄົມ, ທ່າແຮງ ແລະ ຂໍ້ມູນການລົງທຶນຂອງແຂວງສະຫວັນນະເຂດ.

ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ບັນດາທູຕານຸທູດອາຊຽນ ປະຈຳ ສປປ ລາວ ພ້ອມດ້ວຍຄະນະ

ພົບປະກັບທ່ານ ທ່ອນແກ້ວ ພຸດທະໄກຍະລາດ, ຮອງເຈົ້າແຂວງສະຫວັນນະເຂດ

ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ແລະ ບັນດາທູຕານຸທູດອາຊຽນ ປະຈຳ ສປປ ລາວ ພ້ອມດ້ວຍຄະນະ ໄດ້ພົບປະກັບ ທ່ານ ທ່ອນແກ້ວ ພຸດທະໄກຍະລາດ, ຮອງເຈົ້າແຂວງສະຫວັນນະເຂດ, ຜູ້ຊີ້ນໍາວຽກງານເສດຖະກິດ, ເຊິ່ງທ່ານຮອງເຈົ້າແຂວງ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ຄະນະນຳກະຊວງການຕ່າງປະເທດ ແລະ ຄະນະທູຕານຸທູດ ທີ່ລົງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ ໃນຄັ້ງນີ້, ພ້ອມທັງແຈ້ງສະພາບການຈັດຕັ້ງແຜນພັດທະນາເສດຖະກິດ-ສັງຄົມ, ທ່າແຮງບົ່ມຊ້ອນທີ່ສຳຄັນ ເປັນຕົ້ນກະສິກຳ, ອຸດສາຫະກຳປຸງແຕ່ງ, ການຂຸດຄົ້ນພະລັງງານ-ບໍ່ແຮ່ ແລະ ການບໍລິການ, ເປັນແຂວງຍຸດທະສາດທີ່ນັກລົງທຶນຕ່າງປະເທດຈໍານວນຫຼາຍໃຫ້ຄວາມສົນໃຈ, ມີເຂດເສດຖະກິດພິເສດສະຫວັນ-ເຊໂນ ແລະ ແຫ່ງອື່ນໆ ທີ່ຮອງຮັບ ແລະ ອໍານວຍຄວາມສະດວກ ໃຫ້ແກ່ນັກລົງທຶນຕ່າງປະເທດ. ປັດຈຸບັນ, ປະເທດທີ່ເຂົ້າມາລົງທຶນຢູ່ແຂວງຫຼາຍທີ່ສຸດແມ່ນ: ສປ ຈີນ, ຣາຊະອານາຈັກໄທ ແລະ ສສ ຫວຽດນາມ ຕາມລຳດັບ.

ໃນໂອກາດນີ້, ທ່ານ ນາງ ເບລິນດາ ແອນເຕ, ເອກອັກຄະລັດຖະທູດຟີລິບປິນ ປະຈຳ ສປປ ລາວ ໃນຖານະປະເທດປະສານງານ ແລະ ທູດອາວຸໂສ ກໍໄດ້ຕາງໜ້າໃຫ້ແກ່ບັນດາທູຕານຸທູດອາຊຽນ ສະແດງຄວາມຍິນດີ ແລະ ຂອບໃຈເປັນຢ່າງຍິ່ງ ມາຍັງທ່ານຮອງເຈົ້າແຂວງສະຫວັນນະເຂດ ແລະ ພາກສ່ວນທີ່ກ່ຽວຂ້ອງ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໄດ້ແລກປ່ຽນຂໍ້ມູນທີ່ເປັນປະໂຫຍດ ກ່ຽວກັບສະພາບຈຸດພິເສດ, ທ່າແຮງ ແລະ ສະພາບການພັດທະນາເສດຖະກິດ-ສັງຄົມຂອງແຂວງ ໂດຍລວມ ແລະ ເນັ້ນຢໍ້າກ່ຽວກັບການພັດທະນາ-ສົ່ງເສີມວິສາຫະກິດຂະໜາດນ້ອຍ ແລະ ກາງ (SME)ທີ່ປຽບຄືດັ່ງກະດູກສັນຫຼັງ ຂອງການພັດທະນາເສດຖະກິດ ຂອງປະເທດຊາດ.

ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ບັນດາທູຕານຸທູດອາຊຽນ ປະຈຳ ສປປ ລາວ ພ້ອມດ້ວຍຄະນະ

ຢ້ຽມຢາມເຂດເສດຖະກິດພິເສດສະຫວັນ-ເຊໂນ

ຫຼັງຈາກນັ້ນ, ຄະນະທ່ານຮອງລັດຖະມົນຕີກະຊວງການຕ່າງປະເທດ ແລະ ບັນດາທູຕານຸທູດອາຊຽນ ກໍໄດ້ເດີນທາງໄປຢ້ຽມຢາມເຂດເສດຖະກິດພິເສດສະຫວັນ-ເຊໂນ, ເຊິ່ງໄດ້ຮັບຟັງການບັນຍາຍໂດຍຫຍໍ້ ກ່ຽວກັບເຂດເສດຖະກິດພິເສດສະຫວັນ-ເຊໂນ ແລະ ທ່ຽວຊົມບັນດາໂຮງຈັກໂຮງງານທີ່ສຳຄັນ ພາຍໃນເຂດເສດຖະກິດພິເສດ.

ຄະນະດັ່ງກ່າວ ຍັງໄດ້ມີໂອກາດໄປທ່ຽວຊົມສະຖານທີ່ທ່ອງທ່ຽວທາງດ້ານວັດທະນະທຳ ແລະ ປະຫວັດສາດ ທີ່ສໍາຄັນຂອງແຂວງ, ເຊິ່ງກໍໄດ້ສ້າງຄວາມປະທັບໃຈໃຫ້ແກ່ບັນດາທູຕານຸທູດອາຊຽນ ແລະ ເປັນການປະກອບສ່ວນອັນສຳຄັນໃຫ້ແກ່ພື້ນຖານ ເສດຖະກິດຂອງທ້ອງຖິ່ນນຳອີກດ້ວຍ.