ໃນຕອນເຊົ້າຂອງວັນທີ 08 ທັນວາ 2020, ກະຊວງການຕ່າງປະເທດ ຮ່ວມກັບ ຫ້ອງການປະສານງານອົງການສະຫະປະຊາຊາດ ປະຈຳ ສປປ ລາວ ແລະ ຄູ່ຮ່ວມພັດທະນາ ໄດ້ຈັດຕັ້ງກອງປະຊຸມແບບຄະນະສົນທະນາ (Panel Discussion) ໃນຫົວຂໍ້ “ການຮັບມືກັບການແຜ່ລະບາດຂອງພະຍາດ ໂຄວິດ-19 ທີ່ຕິດພັນກັບບັນຫາສິດທິມະນຸດ” ເນື່ອງໃນໂອກາດວັນຄົບຮອບ 72 ປີ ຂອງການຮັບຮອງເອົາຖະແຫຼງການສາກົນ ວ່າດ້ວຍ ສິດທິມະນຸດ (Universal Declaration of Human Rights)ຫຼື ວັນສິດທິມະນຸດສາກົນ (ວັນທີ 10 ທັນວາ 1948–10 ທັນວາ 2020). ກອງປະຊຸມດັ່ງກ່າວໄດ້ຮັບກຽດເຂົ້າຮ່ວມ ແລະ ກ່າວເປີດຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຮອງປະທານຄະນະກຳມະການແຫ່ງຊາດວ່າດ້ວຍສິດທິມະນຸດ, ມີບັນດາຜູ້ຕາງໜ້າຈາກພາກລັດ, ສະຖານທູດຕ່າງປະເທດ ປະຈຳ ສປປ ລາວ, ອົງການຈັດຕັ້ງສາກົນ, ອົງການຈັດຕັ້ງທີ່ມີສ່ວນຮ່ວມທາງສັງຄົມ, ຕະຫຼອດຮອດຄູ-ອາຈານ ແລະ ນັກສຶກສາ ຈາກມະຫາວິທະຍາໄລແຫ່ງຊາດລາວ ເຂົ້າຮ່ວມຫຼາຍກວ່າ 100 ຄົນ.
ໃນວາລະກ່າວເປີດກອງປະຊຸມ, ທ່ານ ທອງຜ່ານ ສະຫວັນເພັດ ໄດ້ເນັ້ນໃຫ້ເຫັນເຖິງຄວາມໝາຍສໍາຄັນຂອງການຮັບຮອງເອົາຖະແຫຼງການສາກົນ ວ່າດ້ວຍ ສິດທິມະນຸດ ທີ່ເປັນເອກະສານສາກົນສະບັບທໍາອິດທີ່ຮັບຮູ້ສິດ ແລະ ກຽດສັກສີ ຂອງຄວາມເປັນມະນຸດທຸກຄົນ ໂດຍບໍ່ມີການຈໍາແນກບົນພື້ນຖານຕ່າງໆ ແລະ ຖະແຫຼງການດັ່ງກ່າວ ໄດ້ກາຍເປັນພື້ນຖານສໍາຄັນໃນການພັດທະນາກົດໝາຍສິດທິມະນຸດສາກົນ ໂດຍສະເພາະແມ່ນການຮັບເອົາສົນທິສັນຍາຫຼັກດ້ານສິດທິມະນຸດຂອງ ສປຊ ຈໍານວນ 09 ສະບັບ. ພ້ອມກັນນັ້ນ, ຍັງໄດ້ຍົກໃຫ້ເຫັນນະໂຍບາຍຂອງລັດຖະບານ ແລະ ຄວາມຄືບໜ້າໃນການຈັດຕັ້ງປະຕິບັດການສົ່ງເສີມ ແລະ ປົກປ້ອງສິດທິມະນຸດຢູ່ ສປປ ລາວ. ໃນບົດກ່າວເປີດຍັງໄດ້ຍົກໃຫ້ເຫັນບັນດາປະເທດຕ່າງໆ ໄດ້ປະເຊີນໜ້າກັບສິ່ງທ້າທາຍໃໝ່ຂອງການແຜ່ລະບາດຂອງເຊື້ອພະຍາດໂຄວິດ-19 ເຮັດໃຫ້ບັນດາປະເທດຕ່າງໆໄດ້ສຸມໃສ່ແກ້ໄຂ ເພື່ອເຮັດໃຫ້ປະຊາຊົນໄດ້ຊົມໃຊ້ສິດທິມະນຸດທາງດ້ານເສດຖະກິດ-ສັງຄົມ ແລະ ວັດທະນະທຳຂອງເຂົາເຈົ້າໄດ້ຢ່າງເຕັມສ່ວນ. ນອກຈາກ ນັ້ນ, ທ່ານ ນາງ ຊາຣາ ເຊເກັນເນັດ, ຜູ້ປະສານງານຫ້ອງການອົງການສະຫະປະຊາຊາດ ແລະ ທ່ານ ນາງ Ina Marčiulionytė, ເອກອັກຄະລັດຖະທູດ, ຜູ້ຕາງໜ້າສະຫະພາບເອີຣົບ ປະຈໍາ ສປປ ລາວ ຍັງໄດ້ກ່າວຄໍາເຫັນຕໍ່ກອງປະຊຸມ ໂດຍກ່າວຢໍ້າຄືຶນເຖິງບົດບາດຄວາມສໍາຄັນຂອງຖະແຫງການດັ່ງກ່າວ ໃນການສົ່ງເສີມ ແລະ ປົກປ້ອງສິດທິມະນຸດໃນທົ່ວໂລກ ແລະ ຄວາມຈໍາເປັນໃນການນໍາໃຊ້ມາດຕະການທີ່ມີຄວາມດຸ່ນດ່ຽງໃນການຮັບມືກັບການແຜ່ລະບາດຂອງພະຍາດໂຄວິດ-19 ໂດຍການຄໍານຶ່ງເຖິງການຮັບປະກັນສິດທິມະນຸດດ້ານຕ່າງໆຂອງປະຊາຊົນ.
ໃນວາລະກອງປະຊຸມແບບຄະນະສົນທະນາ ຊຶ່ງປະກອບມີນັກວິທະຍາກອນຈາກ ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ, ອົງການອະນາໄມໂລກ, ອົງການຈັດຕັ້ງສາກົນເພື່ອຊາວອົບພະຍົບ ແລະ ສະມາຄົມສົ່ງເສີມສຸຂະພາບຄອບຄົວ ໄດ້ຮ່ວມກັນສົນທະນາ ແລະ ເພື່ອແລກປ່ຽນບົດຮຽນຂອງຂະແໜງການຕົນໃນການຮັບມືກັບສິ່ງທ້າທາຍຂອງການແຜ່ລະບາດຂອງເຊື້ອພະຍາດຈຸນລະໂຮກໂຄວິດ-19 ເພື່ອຮັບປະກັນໃຫ້ປະຊາຊົນໄດ້ຊົມໃຊ້ສິດທິມະນຸດຂອງເຂົາເຈົ້າ.
ພິທີລະນຶກເຖິງວັັນສິດທິມະນຸດສາກົນ ຢູ່ ສປປ ລາວ ຄັ້ງນີ້ ຍັງເປັນການສ້າງໂອກາດໃຫ້ອົງການຈັດຕັ້ງຕ່າງໆຂອງພາກລັດ, ສະຖານທູດຕ່າງປະເທດ, ອົງການຈັດຕັ້ງສາກົນ, ນັກຮຽນນັກສຶກສາ ແລະ ອົງການຈັດຕັ້ງທີ່ມີສ່ວນຮ່ວມອື່ນໆໃນສັງຄົມ ໄດ້ເຂົ້າໃຈເຖິງແນວທາງນະໂຍບາຍ, ກົນໄກ ແລະ ມາດຕະການຂອງສາກົນ ກໍຄືຂອງລັດຖະບານ ສປປ ລາວ ໃນການຮັບມືກັບການແຜ່ລະບາດຂອງພະຍາດ ໂຄວິດ-19 ເພື່ອຮັບປະກັນການຊົມໃຊ້ສິດທິມະນຸດຂອງພົນລະເມືອງ. ກອງປະຊຸມແບບຄະນະສົນທະນາ ເພື່ອລະນຶກເຖິງວັນສິດທິມະນຸດສາກົນ ຄົບຮອບ 72 ປີ ແມ່ນໄດ້ຮັບການສະໜັບສະໜູນຈາກແຜນງານການມີສ່ວນຮ່ວມຂອງປະຊາຊົນໃນວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (CEGGA).