ໃນວັນທີ 12 ກໍລະກົດ 2022, ທີ່ ແຂວງຈໍາປາສັກ, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້: “ການແລກປ່ຽນ ແລະ ຖອດຖອນບົດຮຽນ ໃນການຈັດຕັ້ງປະຕິບັດ ຂໍ້ລິເລີ່ມ ຫນຶ່ງແລວ ຫນຶ່ງເສັ້ນທາງ ຮ່ວມກັບບັນດາກະຊວງ/ຂະແໜງການຂອງສູນກາງ ແລະ ແຂວງພາກໃຕ້ ຂອງ ສປປ ລາວ” ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໂດຍມີຜູ້ຕາງໜ້າຈາກບັນດາກະຊວງ/ຂະແໜງການທີ່ກ່ຽວຂ້ອງ ຂອງສູນກາງ ແລະ ບັນດາແຂວງພາກໃຕ້ ຂອງ ສປປ ລາວ ເຂົ້າຮ່ວມ.
ໃນຕອນເຊົ້າຂອງວັນທີ 11 ກໍລະກົດ 2022, ທີ່ ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບ ແລະ ຍື່ນສານແຕ່ງຕັ້ງຂອງ ທ່ານ ນາງ ກ່ຽວ ທິ ຮັ່ງ ຟຸກ, ກົງສຸນໃຫຍ່ ເເຫ່ງ ສສ ຫວຽດນາມ ປະຈຳ ນະຄອນຫຼວງພະບາງ, ໃນໂອກາດທີ່ໄດ້ຮັບການແຕ່ງຕັ້ງໃຫ້ມາ ປະຕິບັດໜ້າທີ່ເປັນກົງສຸນໃຫຍ່ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານ ຮອງລັດຖະມົນຕີ ໂພໄຊ ໄຂຄຳພິທູນ ກໍ່ໄດ້ສະເເດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ນາງ ກ່ຽວ ທິ ຮັ່ງ ຟຸກ ທີ່ໄດ້ຮັບການແຕ່ງຕັ້ງໃຫ້ມາປະຕິບັດໜ້າທີ່ເປັນ ກົງສຸນໃຫຍ່ ແຫ່ງ ສສ. ຫວຽດນາມ ປະຈຳ ນະຄອນຫຼວງພະບາງ. ພ້ອມດຽວກັນນີ້, ທ່ານ ຮອງລັດຖະມົນຕີ ກໍ່ໄດ້ຕີລາຄາສູງ ແລະ ສະແດງຄວາມເຊື່ອໝັ້ນວ່າ ທ່ານ ກົງສຸນໃຫ່ຍ ຈະປະຕິບັດວຽກງານດ້ວຍຄວາມເອົາໃຈໃສ່ ແລະ ຫ້າວຫັນໃນການປະກອບສ່ວນເຂົ້າໃນການຊຸກຍູ້ສົ່ງເສີມການພົວພັນຮ່ວມມື ລະຫວ່າງ ບັນດາແຂວງພາກເໜືອ ຂອງ ລາວ ກັບ ບັນດາແຂວງຂອງ ສສ.ຫວຽດນາມ ກໍ່ຄືພັດທະນາ ເສດຖະກິດສັງຄົມຢູ່ ສປປ ລາວ ໃຫ້ນັບມື້ຈະເລີນຮຸ່ງເຮືອງຍິ່ງຂຶ້ນ. ພິເສດແມ່ນ ປີນີ້ເປັນປີທີ່ທັງສອງພັກ, ສອງລັດ ແລະ ປະຊາຊົນທັງສອງຊາດ ລາວ-ຫວຽດນາມ ອ້າຍນ້ອງກຳລັງຮ່ວມກັນຈັດບັນດາກິດຈະກຳຕ່າງໆ ເພື່ອຮ່ວມກັນສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມກໍຄື ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຄົບຮອບ 60 ປີ ແລະ ຫວັງວ່າ ທ່ານ ກົງສຸນໃຫ່ຍ ຈະປະກອບສ່ວນຢ່າງໝົດຈິດໝົດໃຈເພື່ອໃຫ້ສອງວັນປະຫວັດສາດນີ້ມີຂະບວນຝົດຟື້ນ, ທັງໃຫ້ມີເນື້ອໃນ ແລະ ຄວາມໝາຍເລິກເຊິ່ງ.
ໃນຂະນະດຽວກັນ, ທ່ານ ກົງສູນໃຫ່ຍ ກໍ່ໄດ້ສະແດງຄວາມຂອບໃຈຕໍ່ ທ່ານ ຮອງລັດຖະມົນຕີ ທີ່ໄດ້ໃຫ້ກຽດຕ້ອນຮັບ ແລະ ໂອ້ລົມໃນຄັ້ງນີ້, ພ້ອມທັງ ຍິນດີຈະສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດໃຫ້ນັບມື້ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວຢ່າງບໍ່ຢຸດຢັ້ງ.
ໃນວັນທີ 5-6 ກໍລະກົດ ທີ່ ລອນດອນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ອັງກິດ ຄັ້ງທີ 1 (1st ASEAN-UK Senior Officials’ Meeting) ພາຍໃຕ້ການເປັນປະທານຮ່ວມຂອງ ບຣູໄນ ແລະ ອັງກິດ. ເຂົ້າຮ່ວມກອງປະຊຸມຄັ້ງນີ້ ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຜູ້ຕາງໜ້າຈາກບັນດາປະເທດສະມາຊິກອາຊຽນ ແລະ ຮອງເລຂາທິການໃຫຍ່ອາຊຽນ.