ໃນຕອນບ່າຍຂອງວັນທີ 5 ກໍລະກົດ 2022, ທີ່ ກະຊວງການຕ່າງປເທດ, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ Nadav Eshcar, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ອິດສະຣາແອນ ປະຈໍາ ສປປ ລາວ, ເຊິ່ງມີສໍານັກງານຕັ້ງຢູ່ ຮ່າໂນ້ຍ ສສ. ຫວຽດນາມ, ໃນໂອກາດທີ່ທ່ານໄດ້ສຳເລັດການປະຕິບັດໜ້າທີ່ການທູດ ຢູ່ ສປປ ລາວ.
ໃນໂອກາດນີ້, ທ່ານຮອງລັດຖະມົນຕີ ໂພໄຊ ໄຂຄຳພິທູນ ໄດ້ສະແດງຄວາມຍິນດີຕ້ອນຮັບ ເເລະ ຊົມເຊີຍ ທ່ານທູດ Nadav Eshcar, ທີ່ໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ ຕະຫຼອດໄລຍະ ເກືອບ 5 ປີ (09/2017-07/2022) ດ້ວຍຜົນສໍາເລັດຢ່າງຈົບງາມ. ພ້ອມນີ້, ກໍໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ອິດສະຣາແອນ ຕະຫຼອດໄລຍະ 29 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສອງປະເທດ (6 ທັນວາ 1993), ເຊິ່ງໃນປີ 2023 ຈະມາເຖິງນີ້ ເເມ່ນຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດຮ່ວມກັນ, ທີ່ສອງຝ່າຍ ຈະຮ່ວມກັນຈັດບັນດາກິດຈະກໍາຕ່າງໆເພື່ອສະເຫຼີມສະຫຼອງວັນດັ່ງກ່າວ ເເລະ ທັງເປັນການເພີ່ມທະວີສາຍພົວພັນມິດຕະພາບລະຫວ່າງສອງປະເທດລາວ-ອິດສະຣາເເອນ ໃຫ້ຂະຫຍາຍຕົວຍິ່ງຂຶ້ນ. ພ້ອມດຽວກັນນັ້ນ, ທ່ານຮອງລັດຖະມົນຕີ ກໍໄດ້ສະເເດງຄວາມຊົມເຊີຍ ເເລະ ຕີລາຄາສູງຕໍ່ການປະຕິບັດໜ້າທີ່ຢ່າງຫ້າວຫັນຂອງທ່ານທູດໃນການຮັດເເໜ້ນ ເເລະ ເສີມຂະຫຍາຍສາຍພົວພັນມິດຕະພາບ ເເລະ ການຮ່ວມມືອັນດີ ລະຫວ່າງ ສປປ ລາວ-ອິດສະຣາເເອນ ໃຫ້ນັບມື້ໄດ້ຮັບການຂະຫຍາຍຕົວເປັນກ້າວໆມາ, ເປັນຕົ້ນແມ່ນຊຸກຍູ້ໃຫ້ມີການໄປມາຫາສູ່ກັນຂອງຄະນະຜູ້ເເທນສອງປະເທດ, ຊຸກຍູ້ລັດຖະບານອິສະຣາເເອນ ໃຫ້ການຊ່ວຍເຫຼືອເເກ່ ສປປ ລາວ ໃນຫຼາຍດ້ານເຊັ່ນ: ການພັດທະນາຊັບພະຍາກອນມະນຸດ, ການສຶກສາ ເເລະ ການພັດທະນາຂະເເໜງກະສິກຳ. ເເລະ ການຊ່ວຍເຫຼືອດ້ານອື່ນໆ. ພ້ອມທັງໄດ້ອວຍພອນໃຫ້ທ່ານທູດ Nadav Eshcar ຈົ່ງປະສົບຜົນສໍາເລັດໃນການປະຕິບັດໜ້າທີ່ວຽກງານອັນໃໝ່ ເເລະ ເດີນທາງກັບຄືນປະເທດດ້ວຍຄວາມສະຫວັດດີພາບ.
ໃນຂະນະດຽວກັນ, ທ່ານ Nadav Eshcar ກໍໄດ້ສະແດງຄວາມຂອບໃຈເປັນຢ່າງສູງຕໍ່ ລັດຖະບານ ແລະ ປະຊາຊົນລາວ ກໍຄື ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ຈົນໄດ້ຮັບຜົນສໍາເລັດອັນຈົບງາມ. ພ້ອມດຽວກັນນີ້, ທ່ານທູດ Nadav Eshcar ກໍ່ໄດ້ສະແດງຄວາມຍິນດີ ຈະສືບຕໍ່ເສີມຂະຫຍາຍການພົວພັນຮ່ວມມືລະຫວ່າງ ສອງປະເທດໃຫ້ນັບມື້ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວຢ່າງບໍ່ຢຸດຢັ້ງ.