ໃນຕອນເຊົ້າຂອງ ວັນທີ 26 ກໍລະກົດ 2022, ທີ່ ກະຊວງການຕ່າງປະເທດ ໄດ້ມີການຈັດພິທີປະດັບຫລຽນກາມິດຕະພາບໃຫ້ແກ່ ທ່ານ ນາງ ບີອາເຕ ດັດສ໌ເທວ (Ms. Beate Dastel), ຮອງຜູ້ຕາງໜ້າອົງການ UNICEF ປະຈໍາ ສປປ ລາວ ທີ່ມີຜົນງານອັນພົ້ນເດັ່ນໃນການປະກອບສ່ວນຢ່າງຫຼວງຫຼາຍໃນການຂົນຂວາຍການ ລະດົມທຶນຮອນ ແລະ ຊ່ວຍເຫຼືອເຕັກນິກວິຊາການໃຫ້ແກ່ ສປປ ລາວ ແລະ ໃນໂອກາດທີ່ທ່ານໄດ້ສິ້ນສຸດການປະຕິບັດໜ້າທີ່ ຢູ່ ສປປ ລາວ, ລັດຖະບານແຫ່ງ ສປປ ລາວ ຈຶ່ງໄດ້ຕົກລົງເຫັນດີຍ້ອງຍໍ ແລະ ມອບຫຼຽນກາມິດຕະພາບ ໃຫ້ແກ່ຜູ້ກ່ຽວ ຊຶ່ງຕາງໜ້າໃຫ້ລັດຖະບານ ສປປ ລາວ ເພື່ອປະດັບຫຼຽນດັ່ງກ່າວແມ່ນ ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ໂດຍມີຜູ້ຕາງໜ້າຈາກບັນດາກະຊວງ, ບັນດາກົມທີ່ກ່ຽວຂ້ອງຂອງກະຊວງການຕ່າງປະເທດ, ຂະແໜງການທີ່ກ່ຽວຂ້ອງຂອງ ສປປ ລາວ ແລະ ອົງການຈັດຕັ້ງສາກົນຕ່າງໆເຂົ້າຮ່ວມພິທີດັ່ງກ່າວຈໍານວນ 30 ທ່ານ. ທ່ານ ນາງ ບີອາເຕ ດັດສ໌ເທວ ໄດ້ຖືກແຕ່ງຕັ້ງ ໃຫ້ມາເປັນ ຮອງຜູ້ຕາງໜ້າອົງການ UNICEF ປະຈຳ ສປປ ລາວ ຕັ້ງແຕ່ປີ 2019, ໂດຍຕະຫຼອດໄລຍະຂອງການປະຕິບັດໜ້າທີ່ ທ່ານໄດ້ປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວ ວຽກງານການຊ່ວຍ ເຫຼືອຂອງອົງການ UNICEF ຕໍ່ ສປປ ລາວ, ກໍ່ຄືການຊຸກຍູ້ ແລະ ສະໜັບສະໜູນລັດຖະບານ ສປປ ລາວ ໃນວຽກງານການພັດທະນາເດັກນ້ອຍ, ສົ່ງເສີມໂພຊະນາການເດັກ, ການປັບປຸງການສຶກສາໃນຂັ້ນອະນຸບານ, ການເສີມຂະຫຍາຍ ແລະ ປັບປຸງການໃຫ້ບໍລິການ ເພື່ອປ້ອງກັນການແຜ່ລະບາດຂອງເຊື້ອພະຍາດຕິດແປດຕ່າງໆ, ນໍ້າສະອາດໃນເຂດຊຸມຊົນ ແລະ ສະຖານທີ່ການສຶກສາຕ່າງໆໃນເຂດຫ່າງໄກສອກຫຼີກ, ການຊ່ວຍເຫຼືອສຸກເສີນໃນເວລາເກີດ ແລະ ການຟື້ນຟູພາຍຫຼັງໄພພິບັດ ໂດຍສະເພາະແມ່ນການຊຸກຍູ້ວຽກງານການຈັດ ຕັ້ງປະຕິບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບແມ່ຍິງ ແລະ ເດັກນ້ອຍ, ກະກຽມຄວາມພ້ອມໃນການຮັບມື ເເລະ ຟື້ນຕົວຈາກ ໂຄວິດ-19 ເຊັ່ນ: ສະໜອງອຸປະກອນທາງການແພດ, ໂພຊະນາການ ແລະ ສຸຂາພິບານ ໃຫ້ແກ່ລັດຖະບານລາວ, ຊ່ວຍລະດົມ ແລະ ປະສານງານກັບລັດຖະບານ ແລະ ສາກົນ ໃນການຂົນສົ່ງ ແລະ ການມອບຮັບວັກຊີນ ຕ້ານໂຄວິດ 19 ໃຫ້ແກ່ ສປປ ລາວ ໂດຍຜ່ານໂຄງການ COVAX. ນອກນັ້ນ, ທ່ານ ນາງ ບີອາເຕ ຍັງໄດ້ປະກອບສ່ວນເຂົ້າໃນການສະໜັບສະໜູນ ແຜນງານຮ່ວມມືລະຫວ່າງ ສປປ ລາວ ແລະ ອົງການ UNICEF ໃນໄລຍະ 2017-2021 ເປັນເງິນຈໍານວນ 68 ລ້ານໂດລາສະຫະລັດ.

        ປັດຈຸບັນ, ອົງການ UNICEF ກຳລັງຈັດຕັ້ງປະຕິບັດແຜນງານການຮ່ວມມືການພັດທະນາຢູ່ ສປປ ລາວ ສຳລັບສົກປີ 2022-2026 ຊຶ່ງໄດ້ສຸມໃສ່ວຽກງານສຸຂະພາບແມ່ ແລະ ເດັກ ແລະ ໂພຊະນາການ, ວຽກງານສຶກສາແຜນງານນໍ້າ ແລະ ສຸຂະອະນາໄມ, ວຽກງານປົກປ້ອງເດັກ, ວຽກງານນະໂຍບາຍ, ວາງແຜນ, ຕິດຕາມ ແລະ ປະເມີນຜົນ, ວຽກງານໂຄສະນາ ແລະ ສື່ສານມວນຊົນ.

ໃນຕອນເຊົ້າຂອງວັນທີ 15 ກໍລະກົດ 2022, ທີ່ ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ສະຫາຍ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະ ໄປອວຍພອນ ສະຫາຍ ຫງວຽນ ບ໋າ ຮຸ່ງ, ເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ກໍ່ຄືວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022).

ຄະນະຜູ້ແທນ ສປປ ລາວ ນຳໂດຍທ່ານ ໂພໄຊ ໄຂຄຳພິທູນ, ຮອງລັດຖະມົນຕີການກະຊວງການຕ່າງປະເທດ ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ໄດ້ເຂົ້າຮ່ວມກອງປະຊຸມເວທີການເມືອງລະດັບສູງ ຂອງອົງການ ສປຊ (2022 High-Level Political Forum on Sustainable Development) ພາຍໃຕ້ຫົວຂໍ້: ການຟື້ນຟູຄືນໃໝ່ຈາກຜົນກະທົບຂອງພະຍາດໂຄວິດ-19 ຄຽງຄູ່ກັບການຊຸກຍູ້ການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງຢ່າງເຕັມສ່ວນ (Building back better from the coronavirus disease/COVID-19 while advancing the full implementation of the 2030 Agenda for Sustainable Development), ຊຶ່ງຈັດຂຶ້ນໃນລະຫວ່າງວັນທີ 05 - 18 ກໍລະກົດ 2022 ທີ່ສໍານັກງານໃຫຍ່ ອົງການສະຫະປະຊາຊາດ ທີ່ນິວຢອກ, ສ. ອາເມລິກາ. ຈຸດປະສົງຕົ້ນຕໍ ຂອງກອງປະຊຸມແມ່ນເພື່ອຕິດຕາມ ແລະ ທົບທວນຄືນການຈັດຕັ້ງປະຕິບັດວາລະ ປີ 2030 ເພື່ອການພັດທະນາແບບຍືນຍົງ (ປພຍ) ກໍຄືການທົບທວນຄືນບັນດາ 17 ເປົ້າໝາຍ, ໂດຍສະເພາະ 5 ປພຍ ຄື: ການສືກສາ​ (ປພຍ4), ຄວາມສະເໝີພາບລະຫວ່າງຍິງ-ຊາຍ (ປພຍ5), ອະນຸລັກ ແລະ ນໍາໃຊ້ສິ່ງທີ່ມີຊີວິດໃນນ້ໍາ (ປພຍ14), ອະນຸລັກ ແລະ ນໍາໃຊ້ສິ່ງທີ່ມີຊີວິດເທິງໜ້າດິນ (ປພຍ15) ແລະ ການຮ່ວມມື (ປພຍ17). ພ້ອມກັນນັ້ນ, ກອງປະຊຸມໄດ້ມີການນໍາສະເໜີບົດລາຍງານແບບສະໝັກໃຈ (VNR) ຂອງບັນດາປະເທດສະມາຊິກ,​ ຊຶ່ງປີນີ້ ມີ 45 ປະເທດ ໄດ້ຂຶ້ນນໍາສະເໜີບົດດັ່ງກ່າວ.ກອງປະຊຸມດັ່ງກ່າວ ໄດ້ແຍກອອກເປັນ 3 ພາກຄື: 1. ກອງປະຊຸມພາກທົ່ວໄປ, 2. ກອງປະຊຸມລະດັບລັດຖະມົນຕີ ແລະ 3. ກອງປະຊຸມຂັ້ນສູງ ຊຶ່ງມີບັນດາປາມຸກລັດ ແລະ ຫົວໜ້າລັດຖະບານຂອງປະເທດສະມາຊິກເຂົ້າຮ່ວມ.