ໃນວັນທີ 06 ກໍລະກົດ 2022 ທີ່ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າພົບປະ ຂອງ ທ່ານ ນ. ດຣ.ເພຍ ຣີເບວໂຣ ບຼິດໂຕ (Dr. Pia Rebello Brittto), ຜູ້ຕາງໜ້າອົງການ ສປຊ ກອງທຶນສໍາລັບເດັກ (UNICEF) ປະຈໍາ ສປປ ລາວ. ຈຸດປະສົງຂອງການພົບປະດັ່ງກ່າວແມ່ນເພື່ອປຶກສາຫາລື ແລະ ທົບທວນຄືນ ກ່ຽວກັບການຮ່ວມມືລະຫວ່າງ ສປປ ລາວ ແລະ ອົງການ UNICEF. ໃນໄລຍະຜ່ານມາ, ລັດຖະບານ ແຫ່ງ ສປປ ລາວ ແລະ ອົງການ UNICEF ມີການຮ່ວມມືທີ່ດີຕໍ່ກັນ ແລະ ໄດ້ຮ່ວມກັນຈັດຕັ້ງປະຕິບັດແຜນງານການຮ່ວມມືຫລາຍສະບັບ ເຊິ່ງສາມາດບັນລຸໄດ້ຜົນສຳເລັດ ແລະ ຄວາມຄືບຫນ້າທີ່ສຳຄັນໃນຫລາຍດ້ານກ່ຽວກັບເດັກນ້ອຍເຊັ່ນ: ການສຶກສາ, ສາທາລະນະສຸກ, ການປົກປ້ອງສິດທິເດັກ, ໂພຊະນາການ, ສະຫວັດດີການຂອງແມ່ ແລະ ເດັກ ແລະ ສຸຂະພິບານເປັນຕົ້ນ. ປະຈຸບັນ, ສປປ ລາວ ແລະ ອົງການ UNICEF ກໍາລັງຮ່ວມກັນຈັດຕັ້ງປະຕິບັດແຜນງານຮ່ວມມື ໄລຍະປີ 2022-2026 ຄາດຄະເນງົບປະມານທີ່ອົງການຈະໄປລະດົມທຶນ ເພື່ອມານໍາໃຊ້ໃນແຜນງານດັ່ງກ່າວແມ່ນປະມານ 100 ລ້ານ ໂດລາສະຫະລັດ.

ໃນໂອກາດດັ່ງກ່າວ, ທ່ານຮອງລັດຖະມົນຕີ ໄດ້ສະແດງຄວາມຂອບໃຈ ຕໍ່ອົງການ UNICEF ທີ່ໄດ້ໃຫ້ການຊ່ວຍເຫລືອ ແລະ ເຮັດວຽກຮ່ວມກັບ ລັດຖະບານ ສປປ ລາວ ໃນການສົ່ງເສີມການປົກປ້ອງສິດຂອງເດັກ ແລະ ພັດທະນາເດັກນ້ອຍໃນ ສປປ ລາວ, ລວມທັງການລະດົມຂົນຂວາຍການຊ່ວຍເຫລືອວັກຊີນຕ້ານພະຍາດໂຄວິດ 19 ແລະ ເຄື່ອງຊ່ວຍເຫລືອອຸປະກອນການແພດຕ່າງໆ ໃນໄລຍະ 2 ປີທີ່ຜ່ານໃຫ້ແກ່ ສປປ ລາວ, ພ້ອມທັງໄດ້ຊ່ວຍປະສານງານການມອບ-ຮັບເຄື່ອງຊ່ວຍເຫລືອ ແລະ ວັກຊີນດັ່ງກ່າວ ທັງໃນຂອບຫລາຍຝ່າຍ (COVAX) ແລະ ຂອບສອງຝ່າຍ.

ພ້ອມດຽວກັນນີ້, ທັງສອງຝ່າຍກໍ່ຍັງໄດ້ປຶກສາຫາລືກ່ຽວກັບການກະກຽມເຂົ້າຮ່ວມກອງປະຊຸມເວທີການເມືອງລະດັບສູງ (HLPF) ທີ່ຈະຈັດຂື້ນໃນລະຫວ່າງວັນທີ 13 – 18 ກໍລະກົດ 2022 ທີ່ນິວຢອກ, ສະຫະລັດອາເມລິກາ ເຊິ່ງແມ່ນທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ຈະນໍາພາຄະນະຜູ້ແທນລາວ ເຂົ້າຮ່ວມ. ຈຸດປະສົງເປົ້າໝາຍໃນການເຂົ້າຮ່ວມກອງປະຊຸມຂອງຄະນະຜູ້ແທນ ສປປ ລາວ ໃນຄັ້ງນີ້ ເພື່ອລາຍງານສະພາບການຈັດຕັ້ງປະຕິບັດ ປພຍ ຂອງ ສປປ ລາວ ໃນໄລຍະປີທີ່ຜ່ານມາ ແລະ ທັດສະນະຂອງ ສປປ ລາວ ກ່ຽວກັບການຈັດຕັ້ງປະຕິບັດວຽກງານດັ່ງກ່າວ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19. ນອກຈາກນີ້, ກໍ່ເພື່ອເປັນການແລກປ່ຽນບົດຮຽນອັນດີກັບບັນດາປະເທດຕ່າງໆ ເພື່ອກະກຽມໃຫ້ແກ່ການຮ່າງບົດລາຍງານແຫ່ງຊາດແບບສະໝັກໃຈ (VNR) ສະບັບທີ 3 ຂອງ ສປປ ລາວ ໃນປີ 2024.