ໃນວັນທີ 5-6 ກໍລະກົດ ທີ່ ລອນດອນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ອັງກິດ ຄັ້ງທີ 1 (1st ASEAN-UK Senior Officials’ Meeting) ພາຍໃຕ້ການເປັນປະທານຮ່ວມຂອງ ບຣູໄນ ແລະ ອັງກິດ. ເຂົ້າຮ່ວມກອງປະຊຸມຄັ້ງນີ້ ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຜູ້ຕາງໜ້າຈາກບັນດາປະເທດສະມາຊິກອາຊຽນ ແລະ ຮອງເລຂາທິການໃຫຍ່ອາຊຽນ.

ກອງປະຊຸມຄັ້ງນີ້ແມ່ນກອງປະຊຸມຄັ້ງທໍາອິດ ຂອງເຈົ້າໜ້າທີ່ອາວຸໂສອາຊຽນ-ອັງກິດ ພາຍຫຼັງທີ່ອັງກິດ ໄດ້ຖືກຮັບຮອງເປັນຄູ່ເຈລະຈາອາຊຽນ ໃນປີ 2021​. ກອງປະຊຸມໄດ້ທົບທວນຄືນການຮ່ວມມືອາຊຽນ-ອັງກິດ ໃນໄລຍະຜ່ານມາ ເປັນຕົ້ນແມ່ນການຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແລະ ການຟື້ນຟູຮອບດ້ານພາຍຫຼັງການແຜ່ລະບາດ. ພ້ອມນີ້, ກໍໄດ້ປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ ໂດຍສະເພາະແມ່ນການເລັ່ງລັດການຮ່າງແຜນປະຕິບັດງານ ອາຊຽນ-ອັງກິດ ສໍາລັບໄລຍະ 2022-2026 ໃຫ້ສໍາເລັດໂດຍໄວ ເພື່ອເປັນພື້ນຖານສໍາລັບການຮ່ວມມືໃນຕໍ່ໜ້າ. ອາຊຽນ ແລະ ອັງກິດ ໄດ້ເຫັນດີສືບຕໍ່ເສີມຂະຫຍາຍການພົວພັນຮ່ວມມື ໃນຂະແໜງເສດຖະກິດ, ການຮັບປະກັນຕ່ອງໂສ້ການຜະລິດ, ການພັດທະນາແບບຍືນຍົງ, ການສຶກສາ, ການປ່ຽນແປງຂອງດິນຟ້າອາກາດ ແລະ ສິ່ງແວດລ້ອມ, ແລະ ຂົງເຂດອື່ນໆທີ່ສອງຝ່າຍມີທ່າແຮງ. ນອກຈາກນີ້, ກອງປະຊຸມຍັງໄດ້ແລກປ່ຽນຄໍາຄິດຄໍາເຫັນ ກ່ຽວກັບບັນຫາຕ່າງໆທີ່ພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໃນໂອກາດນີ້, ເຈົ້າໜ້າທີ່ອາວຸໂສອາຊຽນ-ອັງກິດ ຍັງໄດ້ປຶກສາຫາລືການກະກຽມຕ່າງໆ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ອັງກິດ ເຊິ່ງຈະຈັດຂຶ້ນເປັນຄັ້ງທໍາອິດ ຢູ່ພະນົມເປັນ, ກໍາປູເຈຍ ໃນຕົ້ນເດືອນສິງຫາ 2022 ນີ້.