ໃນຕອນເຊົ້າຂອງວັນທີ 27 ມິຖຸນາ 2022, ທີ່ ກະຊວງການຕ່າງປະເທດ, ທ່ານ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ຫງວຽນ ດັງ ຮຸງ, ກົງສຸນໃຫຍ່ ເເຫ່ງ ສສ ຫວຽດນາມ ປະຈຳ ນະຄອນຫຼວງພະບາງ, ໃນໂອກາດສຳເລັດການປະຕິບັດໜ້າທີ່ກົງສຸນໃຫຍ່ ຢູ່ ສປປ ລາວ.

ໃນໂອກາດດັ່ງກ່າວ, ທ່ານຮອງລັດ​ຖະ​ມົນ​ຕີ​ ຕິ່ງ ສຸກສັນ ໄດ້ສະເເດງຄວາມຊົມເຊີຍທີ່ ທ່ານ ຫງວຽນ ດັງ ຮຸງ ໄດ້ສຳເລັດການປະຕິບັດໜ້າທີ່ເປັນ ກົງສຸນໃຫຍ່ ແຫ່ງ ສສ. ຫວຽດນາມ ປະຈຳ ນະຄອນຫຼວງພະບາງ ດ້ວຍຜົນສຳເລັດອັນຈົບງາມ ໃນຕະຫຼອດໄລຍະເວລາ 3 ປີ ຜ່ານມາ ແລະ ຊົມເຊີຍຕໍ່ຜົນງານໃນການປະກອບສ່ວນຢ່າງຕັ້ງໜ້າໃນການເສີມຂະຫຍາຍຮັດເເໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ເເລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ເເລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ກໍ່ຄື ການເປັນຂົວຕໍ່ໃນການເສີມຂະຫຍາຍການພົວພັນຮ່ວມມື ລະຫວ່າງ ບັນດາແຂວງພາກເໜືອຂອງລາວ ແລະ ບັນດາແຂວງຂອງຫວຽດນາມ ໃນການຈັດຕັ້ງປະຕິບັດບັນດາຂອບການຮ່ວມມືໃນດ້ານຕ່າງໆ. ພ້ອມດຽວກັນນີ້, ທ່ານຮອງລັດຖະມົນຕີ ໄດ້ສະແດງຄວາມເຊື່ອຫມັ້ນຢ່າງໜັກແໜ້ນວ່າ ພາຍຫຼັງກັບຄືນປະເທດ, ທ່ານ ຫງວຽນ ດັງ ຮຸງ ຈະສືບຕໍ່ນຳໃຊ້ປະສົບການ ແລະ ຄວາມສາມັກຄີຮັກແພງ ເພື່ອປະກອບສ່ວນເຂົ້າໃນການຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ໃຫ້ນັບມື້ຈະເລີນງອກງາມຍິ່ງໆຂຶ້ນ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ. ພ້ອມນີ້, ທ່ານ ຮອງ​ລັດຖະມົນຕີ ກໍ​ໄດ້​ລາຍ​ງານ​ຫຍໍ້​ກ່ຽວກັບການ​ສ້າງ​ຂະ​ບວນການສໍາລັບ​​ກິດຈະ​ກໍາທີ່ສອງ​ຊາດ​ເຫັນ​ດີ​ຮ່ວມ​ກັນຈັດ ​ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ​ ເພື່ອສະ​ເຫລີ​ມສະຫລອງ​ປີ​ສາມັກຄີ​ມິດ​ຕະພາບ ລາວ-ຫວຽດນາມ, ຫວຽດນາມ-ລາວ ​ເພື່ອລະນຶກ​ເຖິງ​ສອງ​ວັນ​ປະຫວັດສາດອັນ​ສໍາຄັນ​ຂອງ​ສອງຊາດ​ ຄື: ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ຄົບຮອບ 45 ປີ (18/7/1977 - 18/7/2022) ​ແລະ ວັນ​ສ້າງຕັ້ງສາຍ​ພົວພັນ​ການ​ທູດ ລາວ-ຫວຽດນາມ ຄົບຮອບ 60 ປີ (5/9/1962 – 5/9/2022) ​ໃຫ້​ມີ​ບັນຍາກາດ​ຟົດຟື້ນ ​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ​ອັນ​ອົບ​ອຸ່ນ. ສຸດ​ທ້າຍ​ນີ້, ທ່ານ ຮອງລັດຖະມົນຕີ ໄດ້ອວຍພອນໃຫ້ ທ່ານ ຫງວຽນ ດັງ ຮຸງ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ອັນໃໝ່ຍິ່ງໃຫຍ່ກວ່າເກົ່າ.

ໃນຂະນະດຽວກັນ, ທ່ານ ຫງວຽນ ດັງ ຮຸງ ກໍໄດ້ສະແດງຄວາມຂອບໃຈເປັນຢ່າງສູງຕໍ່ ລັດຖະບານ ແລະ ປະຊາຊົນລາວ ກໍຄື ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ກົງສຸນໃຫຍ່ ຢູ່ ສປປ ລາວ ໃນຄັ້ງນີ້ ຈົນໄດ້ຮັບຜົນສໍາເລັດອັນຈົບງາມ. ພ້ອມດຽວກັນນີ້, ທ່ານ ຫງວຽນ ດັງ ຮຸງ ກໍ່ໄດ້ສະແດງຄວາມຍິນດີ ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດໃຫ້ນັບມື້ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວຢ່າງບໍ່ຢຸດຢັ້ງ.