ໃນໂອກາດຢ້ຽມຢາມ ສປປ ລາວ ຢ່າງເປັນທາງການ, ໃນວັນທີ 23 ພະຈິກ 2018, ທີ່ ສຳນັກງານນາຍົກລັດຖະມົນຕີ, ທ່ານ ນາງ ສຸດສະມາ ຊະວາຣາດ, ລັດຖະມົນຕີກະຊວງການຕ່າງປະເທດ ແຫ່ງ ສ.ອິນເດຍ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ຊຶ່ງໃນໂອກາດດັ່ງກ່າວ, ທ່ານ ນາງ ສຸດສະມາ ຊະວາຣາດ ກໍໄດ້ສະແດງຄວາມຍິນດີ ແລະ ຂອບໃຈ ຕໍ່ການຕ້ອນຮັບອັນອົບອຸ່ນຂອງ ພະນະທ່ານ ນາຍົກລັດຖະມົນຕີ ແລະ ໄດ້ລາຍງານຜົນສຳເລັດຂອງກອງປະຊຸມຄະນະກຳມາທິການຮ່ວມ ວ່າດ້ວຍ ການຮ່ວມມື ລາວ-ອິນເດຍ ຄັ້ງທີ 9 ໃຫ້ ພະນະທ່ານ ນາຍົກລັດຖະມົນຕີ ຊາບ.
ໃນລະຫວ່າງ ວັນທີ 22-26 ພະຈິກ 2018, ກະຊວງການຕ່າງປະເທດ ໄດ້ຈັດກອງປະຊຸມດຳເນີນການທາບທາມການສ້າງແຜນກຳນົດພະນັກງານນຳພາ-ຄຸ້ມຄອງ ຂອງກະຊວງການຕ່າງປະເທດ ຂື້ນ ໂດຍການເປັນປະທານ ຂອງ ທ່ານ ສະເຫຼີມໄຊ ກົມມະສິດ, ເລຂາຄະນະບໍລິຫານງານພັກກະຊວງ, ກຳມະການສູນກາງພັກ, ລັດຖະມົນຕີ ກະຊວງການຕ່າງປະເທດ, ມີຄະນະພັກກະຊວງ, ຮອງລັດຖະມົນຕີ, ຄະນະພັກຮາກຖານ, ຄະນະໜ່ວຍພັກ, ບັນດາຄະນະຫ້ອງການ, ຫົວໜ້າກົມ, ຮອງຫົວໜ້າກົມ ແລະ ຫົວໜ້າພະແນກ ພາຍໃນກະຊວງການຕ່າງປະເທດ ແລະ ແຂກຖືກເຊີນຈາກ ຄະນະຈັດຕັ້ງສູນກາງພັກ ຈຳນວນໜຶ່ງ ເຂົ້າຮ່ວມ ໂດຍມີຜູ້ເຂົ້າທັງໝົດ ປະມານ 200 ກວ່າ ສະຫາຍ, ຊຶ່ງຈັດຂື້ນທີ່ ກະຊວງການຕ່າງປະເທດ.
ໃນວັນທີ 20 ພະຈິກ 2018, ທີ່ ໂຮງແຮມແລນມາກ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງບັນດາເຈົ້າໜ້າທີ່ອາວຸໂສ ຈາກປະເທດສະມາຊິກ ຟີແລັກ (FEALAC 36 ປະເທດ), ຄະນະກຳມາທິການວຽກເສດຖະກິດ ແລະ ສັງຄົມ ສຳລັບພາກພື້ນ ອາຊີ-ປາຊີຟິກ ຂອງ ສປຊ ແລະ ຄະນະກຳມາທິການເສດຖະກິດ ສຳລັບພາກພື້ນອາເມລິກາລາຕິນ ແລະ ຄາລິບຽນ ຂອງ ສປຊ ໃນໂອກາດເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ຟີແລັກ ຄັ້ງທີ 19, ໃນລະຫວ່າງວັນທີ 19-21 ພະຈິກ 2018, ທີ່ ນະຄອນຫຼວງວຽງຈັນ.