ໂດຍປະຕິບັດຕາມຄໍາສັ່ງຂອງຄະນະເລຂາທິການສູນກາງພັກ, ເລກທີ 13/ຄລສພ, ລົງວັນທີ 17 ທັນວາ 2018.
ກອງປະຊຸມເຊື່ອມຊຶມ, ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໄດ້ຈັດຂຶ້ນທີ່ສູນຮ່ວມມືສາກົນ ແລະການຝຶກອົບຮົມ (ICTC) ເປັນເວລາ 2 ວັນ, ແຕ່ວັນທີ 17-18 ມັງກອນ 2019 ພາຍໃຕ້ການເປັນປະທານ ຂອງ ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ.
ຜູ້ເຂົ້າຮ່ວມກອງປະຊຸມຄັ້ງນີ້ ແມ່ນພະນັກງານການນຳ ແລະ ຄະນະບໍລິຫານງານພັກ ແລະ ຂັ້ນຫົວໜ້າກົມມາຈາກບັນດາກະຊວງ, ອົງການໃນຂົງເຂດເສດຖະກິດ-ການຕ່າງປະເທດ ຈໍານວນ ລວມທັງໝົດ 230 ສະຫາຍ.
ກອງປະຊຸມໄດ້ເຊື່ອມຊຶມ 2 ເອກະສານສໍາຄັນ ຄື: ໜຶ່ງ, ມະຕິກ່ຽວກັບການເພີ່ມທະວີການນໍາພາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ແນໃສ່ເຊື່ອມຊຶມ ແລະເປັນເອກະພາບໃນລະດັບສູງ ກັບທິດທາງ, ວິທີການ ແລະມາດຕະການທີ່ສູນກາງວາງອອກ; ສ້າງຄວາມຕັດສິນໃຈເດັດດ່ຽວ ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນຕໍ່ໜ້າ, ພ້ອມທັງຄົ້ນຄວ້າກໍານົດບັນດາມາດຕະການ ໃຫ້ເເທດກັບຕົວຈິງ ແລະມີປະສິດທິຜົນສູງ ເພື່ອແກ້ໄຂສະພາບການດັ່ງກ່າວ ສ້າງຂະບວນການຈັດຕັ້ງປະຕິບັດຢ່າງແຂງແຮງ, ທົ່ວເຖິງ ກໍ່ໃຫ້ເກີດການຫັນປ່ຽນຕົວຈິງ ທີ່ມີລັກສະນະບຸກທະລຸ ໃນທຸກຂົງເຂດວຽກງານ ເພື່ອຍູ້ແຮງດ້ານການພັດທະນາ ໃນດ້ານຕ່າງໆ ໃຫ້ບັນລຸຄາດໝາຍ ທີ່ກອງປະຊຸມໃຫຍ່ ຄັ້ງທີ X ຂອງພັກ ວາງອອກ; ແລະ ເອກະສານສະບັບທີ ສອງ ແມ່ນມະຕິວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະໜັກແໜ້ນ.
ກອງປະຊຸມໄດ້ພ້ອມກັນຄົ້ນຄວ້າປຶກສາຫາລືຢ່າງເລິກເຊິ່ງ ແລະປະກອບຄໍາເຫັນຢ່າງກົງໄປກົງມາເຂົ້າໃສ່ບັນຫາທີ່ສໍາຄັນ ໃນຂົງເຂດເສດຖະກິດ-ການເງິນ ກໍຄືການກໍ່ສ້າງຮາກຖານການເມືອງ ຂອງລະບອບປະຊາທິປະໄຕ ປະຊາຊົນ ທີ່ຕິດພັນກັບພຶດຕິກໍາຕົວຈິງ ຂອງຂະແໜງການຕົນ.
ຈາກນັ້ນ, ໄດ້ມີການປະກອບຄໍາຄິດຄຳເຫັນ ແລະ ຂໍ້ສະເໜີແນະຕ່າງໆກ່ຽວກັບການປັບປຸງພາຍໃນ, ແກ້ໄຂບັນດາຈຸດອ່ອນ ຂໍ້ຄົງຄ້າງ, ຊອກໃຫ້ເຫັນບັນດາສາເຫດທີ່ເປັນພື້ນຖານ ແລະຕົ້ນຕໍ ເພື່ອວາງມາດຕະການ, ທິດທາງ, ວິທີການແກ້ໄຂທີ່ຖືກຕ້ອງ, ແທດຕົວຈິງ ແລະ ສາມາດປະຕິບັດໄດ້ຢ່າງມີປະສິດທິຜົນ ໃນການຈັດຕັ້ງປະຕິບັດວຽກງານໃນສະເພາະໜ້າ ແລະ ຍາວນານ. ໂອກາດນີ້, ປະທານກອງປະຊຸມໄດ້ຮຽກຮ້ອງມາຍັງຄະນະພັກ-ຄະນະນໍາ ແຕ່ລະຂັ້ນ ຈົ່ງເພີ່ມທະວີຄວາມຮັບຜິດຊອບ, ຄວາມເປັນເຈົ້າການ ໃນການຈັດຕັ້ງເຊື່ອມຊຶມ ເພື່ອກໍາແໜ້ນ ແລະ ນຳໄປຈັດຕັ້ງປະຕິບັດ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ຢ່າງເປັນຂະບວນຟົດຟື້ນ, ແຂງແຮງ, ແທດຕົວຈິງ ແລະ ມີຜົນສໍາເລັດຕາມຄາດໝາຍ.
ໃນວັນທີ 9 ມັງກອນ 2019 ຜ່ານມາ, ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມ ນາຍທະຫານຢູ່ ກອງພົນທີ 1, ເມືອງວັງວຽງ, ແຂວງວຽງຈັນ, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ. ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ພັນເອກ ສາຍໃຈ ກົມມະສິດ, ຮອງເລຂາຄະນະພັກ, ຫົວໜ້າການທະຫານກອງພົນທີ 1 ພ້ອມດ້ວຍຄະນະ, ມີຄະນະພັກ-ຄະນະບັນຊາ 5 ຫ້ອງ, ພະນັກງານໃນຫຼັກແຫຼ່ງກົມກອງຂຶ້ນກັບ ເຂົ້າຮ່ວມ.
ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ໄດ້ຮັບຟັງການລາຍງານສະພາບການໂດຍຫຍໍ້ການເຄື່ອນໄຫວ ປະຕິບັດໜ້າທີ່ການເມືອງຂອງກົມກອງ ໃນໄລຍະຜ່ານມາຈາກ ທ່ານ ພັນເອກ ສາຍໃຈ ກົມມະສິດ, ຮອງເລຂາຄະນະພັກ, ຫົວໜ້າການທະຫານກອງພົນທີ 1, ເຊິ່ງເຮັດໃຫ້ຂອບເຂດກົມກອງ ຮັບຜິດຊອບມີຄວາມສະຫງົບ ປັດຈຸບັນກົມກອງພ້ອມສຸມໃສ່ ຂະບວນການດ້ານຕ່າງໆ ເຊັ່ນ: ການເຝິກຊ້ອມສວນສະໜາມກະກຽມ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ. ນອກນີ້, ກໍແມ່ນຂະບວນການປະດັບປະດາສະຖານທີ່ຄ້າຍຄູ, ຂະບວນການກິລາກາຍະກຳ, ສິລະປະວັນນະຄະດີ, ຂະບວນການແກ້ໄຂຊີວິດການເປັນຢູ່ ເຮັດໃຫ້ກົມກອງມີບັນຍາກາດຟົດຟື້ນ.
ໂອກາດດຽວກັນ, ທ່ານ ລັດຖະມົນຕີ ສະເຫຼີມໄຊ ກົມມະສິດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານໃນໄລຍະຕໍ່ສູ້ກູ້ຊາດ ກໍ່ຄືໃນໄລຍະປະຈຸບັນ ໃນພາລະກິດປົກປັກຮັກສາ ແລະ ສ້າງສາປະເທດຊາດ ໄປຄຽງຄູ່ກັບການຮັບໃຊ້ສັງຄົມ ກໍ່ຄືຮັບໃຊ້ປະຊາຊົນ ແລະ ໄດ້ເປັນກຽດໂອ້ລົມນາຍ ແລະ ພົນທະຫານ, ຊຶ່ງທ່ານໄດ້ແຈ້ງສະພາບການໃນພາກພື້ນ ແລະ ສາກົນ ພ້ອມກັບສະພາບ ກ່ຽວກັບ ການປັກຫຼັກໝາຍຊາຍແດນກັບ 5 ປະເທດໃກ້ຄຽງ, ໃນນີ້ ຍັງມີ 2 ປະເທດທີ່ຍັງບໍ່ທັນສຳເລັດ, ຊຶ່ງຈະໄດ້ສືບຕໍ່ເຈລະຈາ ເພື່ອປັນຫຼັກໝາຍຊາຍແດນໃຫ້ສຳເລັດຕາມຄາດໝາຍທີ່ວາງໄວ້ ສູ່ນາຍ ແລະ ພົນທະຫານຟັງ.
ໃນໂອກາດອັນທີ່ມີຄວາມໝາຍສຳຄັນນີ້, ທ່ານລັດຖະມົນຕີກະຊວງການຕ່າງປະເທດ ກໍ່ໄດ້ມອບເງິນສົດຈຳນວນໜຶ່ງ, ເຄື່ອງອຸປະໂພກ-ບໍລິໂພກ ແລະ ເຄື່ອງນຳໃຊ້ຫ້ອງການ ເພື່ອເປັນການຊຸກຍູ້ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ຈະໝູນວຽນມາເຖິງອີກວາລະໜຶ່ງ.
ໃນວັນທີ 6 ມັງກອນ 2019, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ຫງວຽນ ຊວນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ ໄດ້ຮ່ວມເປັນປະທານຊີ້ນຳກອງປະຊຸມ ຄັ້ງທີ 41 ປະຈຳປີ 2019 ຂອງຄະນະກໍາມະການຮ່ວມມືທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຢູ່ທີ່ນະຄອນຫຼວງຮ່າໂນ້ຍ ສສ ຫວຽດນາມ. ໃນກອງປະຊຸມ ສອງຝ່າຍ ໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມ ຄັ້ງທີ 40 ກໍ່ຄືຂໍ້ຕົກລົງ ວ່າດ້ວຍ ແຜນການຮ່ວມມື ປະຈໍາປີ 2018 ແລະ ພ້ອມກັນປຶກສາຫາລື ກ່ຽວກັບທິດທາງການຮ່ວມມື ໃນປີ 2019.