ໃນຕອນເຊົ້າຂອງວັນທີ 22 ພຶດສະພາ 2023, ທີ່ ກະຊວງການຕ່າງປະເທດ ໄດ້ມີພິທີລົງນາມເອກະສານແລກປ່ຽນໂຄງການທຶນການສຶກສາ ເພື່ອການພັດທະນາຊັບພະຍາກອນມະນຸດ (ລະດັບປະລິນຍາໂທ ແລະ ປະລິນຍາເອກ) ຫຼື ທຶນ JDS, ມູນຄ່າ 343 ລ້ານເຢນ ຈາກ ລັດຖະບານຍີ່ປຸ່ນ ໃຫ້ແກ່ ສປປ ລາວ, ເຊິ່ງຕາງໜ້າຝ່າຍລາວ ລົງນາມໂດຍ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດລາວ ແລະ ຝ່າຍຍີ່ປຸ່ນ ລົງນາມໂດຍ ທ່ານ ໂຄບະຢະຊິ ເຄນອິຈິ (KOBAYASHI Kenichi), ເອກອັກຄະຣາຊະທູດ ຍີ່ປຸ່ນ ປະຈໍາ ສປປ ລາວ, ແລະ ມີບັນດາຜູ້ຕາງໜ້າຈາກຂະແໜງການກ່ຽວຂ້ອງສອງຝ່າຍ ລາວ ແລະ ຍີ່ປຸ່ນ ເຂົ້າຮ່ວມເປັນສັກຂີພິຍານ.

      ໃນວັນທີ 19 ພຶດສະພາ 2023, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ພົບປະທາງໄກກັບ ທ່ານ Weldon Epp, ຜູ້ຊ່ວຍຮອງລັດຖະມົນຕີຕ່າງປະເທດການາດາ ຮັບຜິດຊອບອິນໂດ-ປາຊີຟິກ ທັງເປັນເຈົ້າໜ້າທີ່ອາວຸໂສຂອງ ການາດາ ຕໍ່ວຽກງານອາຊຽນ.

ໃນວັນທີ 19 ພຶດສະພາ 2023, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ Yohannes Abraham, ເອກອັກຄະລັດຖະທູດ ແຫ່ງ ສ. ອາເມຣິກາ ປະຈໍາອາຊຽນ ທີ່ ຈາກາກຕາ, ໃນໂອກາດທີ່ ທ່ານທູດ ສ.ອາເມຣິກາ ປະຈໍາອາຊຽນ ເດີນທາງຢ້ຽມຢາມ ແລະ ເຮັດວຽກ ຢູ່ ສປປ ລາວ. ໃນໂອກາດນີ້, ທ່ານ ຮອງລັດຖະມົນຕີ ແລະ ທ່ານທູດ ສ. ອາເມຣິກາ ປະຈໍາອາຊຽນ ໄດ້ແລກປ່ຽນຄວາມຄິດເຫັນຕໍ່ການຮ່ວມມືອາຊຽນ-ສ.ອາເມຣິກາ ໃນໄລຍະຜ່ານມາ ລວມທັງປຶກສາຫາລືກ່ຽວກັບການຮັດແໜ້ນການຮ່ວມມື ໃນຖານະເປັນຄູ່ຮ່ວມຍຸດທະສາດຮອບດ້ານອາຊຽນຂອງ ສ.ອາເມຣິກາ ແລະ ຊຸກຍູ້ການຮ່ວມມືໃນຂົງເຂດທີ່ມີຄວາມສົນໃຈຮ່ວມກັນ.