ໃນວັນທີ 16 ພຶດສະພາ 2023, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ສ.ເກົາຫຼີ ຄັ້ງທີ 27 ທີ່ ຮ່າລອງ, ສສ.ຫວຽດນາມ ພາຍໃຕ້ການເປັນປະທານຮ່ວມຂອງ ສສ.ຫວຽດນາມ ແລະ ສ.ເກົາຫຼີ.
ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າຂອງການຈັດຕັ້ງປະຕິບັດວິໄສທັດຮ່ວມອາຊຽນ-ສ.ເກົາຫຼີ ວ່າດ້ວຍສັນຕິພາບ, ຄວາມສົມບູນຜູນສຸກ ແລະ ການເປັນຄູ່ຮ່ວມມື ສໍາລັບສົກປີ 2021-2025 ໂດຍສະເພາະການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 23 ໃນທ້າຍປີ 2022. ກອງປະຊຸມ ຍັງໄດ້ເຫັນດີຮັດແໜ້ນ ແລະ ສືບຕໍ່ການຮ່ວມມືໃນຂົງເຂດສາທາລະນະສຸກ, ເສດຖະກິດ, ການຄ້າ, ວິທະຍາສາດ, ເຕັກໂນໂລຊີ ແລະ ນະວັດຕະກໍາ, ການຫັນໄປເປັນດິຈິຕອນ, ການເຊື່ອມຈອດອາຊຽນ, ການສົ່ງເສີມຈຸລະວິສາຫະກິດ, ວິສາຫະກິດຂະໜາດ ນ້ອຍ ແລະ ກາງ (MSMEs), ການພັດທະນາຊັບພະຍາກອນມະນຸດ, ການສຶກສາ, ການແລກປ່ຽນການໄປມາຫາສູ່ຂອງປະຊາຊົນ, ສິ່ງແວດລ້ອມ, ການຮັບມືກັບໄພພິບັດ, ການພັດທະນາຕົວເມືອງອັດສະລິຍະ, ການຮັດແຄບຄວາມແຕກໂຕນດ້ານການພັດທະນາ, ການຮ່ວມມືໃນຂອບອະນຸພາກພື້ນ ໂດຍສະເພາະການຮ່ວມມືໃນຂອບແມ່ຂອງ-ສ.ເກົາຫຼີ.
ພ້ອມນີ້, ກອງປະຊຸມ ຍັງໄດ້ຮັບຊາບຕໍ່ຂໍ້ລິເລີ່ມ ວ່າດ້ວຍຄວາມສາມັກຄີອາຊຽນ-ສ.ເກົາຫຼີ (KASI) ຂອງ ສ.ເກົາຫຼີ, ຊຶ່ງເປັນຂໍ້ລິເລີ່ມແນໃສ່ຮັດແໜ້ນການຮ່ວມມື ລະຫວ່າງອາຊຽນ ແລະ ສ.ເກົາຫຼີ ໃນຊຸມປີຕໍ່ໜ້າ ເພື່ອກ້າວໄປສູ່ການສ້າງຕັ້ງການເປັນຄູ່ຮ່ວມຍຸດທະສາດຮອບດ້ານ ລະຫວ່າງອາຊຽນ ແລະ ສ.ເກົາຫຼີ. ພ້ອມນັ້ນ, ຍັງໄດ້ແລກປ່ຽນຄວາມຄິດເຫັນ ກ່ຽວກັບບັນຫາພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ, ພ້ອມທັງປຶກສາຫາລືເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ-ສ.ເກົາຫຼີ ທີ່ຈະຈັດຂຶ້ນໃນເດືອນກໍລະກົດ 2023 ແລະ ແຜນການການສະເຫຼີມສະຫລອງວັນອາຊຽນ-ສ.ເກົາຫຼີ ໃນປີ 2023 ແລະ ການສະເຫຼີມສະຫຼອງການພົວພັນອາຊຽນ-ສ.ເກົາຫຼີ ຄົບຮອບ 35 ປີ ໃນປີ 2024, ຊຶ່ງກົງກັບການເປັນປະທານອາຊຽນ ຂອງ ສປປ ລາວ.