ໃນວັນທີ 17 – 19 ກໍລະກົດ 2017, ທີ່ ສໍານັກງານໃຫຍ່ອົງການສະຫະປະຊາຊາດ, ຄະນະຜູ້ແທນ ແຫ່ງ ສປປ ລາວ ນຳໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ນໍາພາຄະນະທີ່ປະກອບດ້ວຍທ່ານຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ, ຄະນະກົມຈາກກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນເຂົ້າຮ່ວມກອງປະຊຸມລະດັບລັດຖະມົນຕີເວທີການເມືອງລະດັບສູງ ກ່ຽວກັບ ການພັດທະນາແບບຍືນຍົງ ປະຈໍາປີ 2017 ພາຍໃຕ້ຫົວຂໍ້ “ການລຶບລ້າງຄວາມທຸກຍາກ ແລະ ສົ່ງເສີມຄວາມຈະເລີນຮູ່ງເຮືອງໃນສະພາບທີ່ໂລກກໍາລັງມີການປ່ຽນແປງ”, ເຊິ່ງໃນປີນີ້ມີ 43 ປະເທດ ຂຶ້ນສະເໜີບົດລາຍງານແຫ່ງຊາດແບບສະໝັກໃຈ ກ່ຽວກັບ ຄວາມຄືບໜ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ). ໃນກອງປະຊຸມຄັ້ງນີ້, ນອກຈາກກອງປະຊຸມພາກອະພິປາຍທົ່ວໄປແລ້ວ ຍັງມີກອງປະຊຸມປິ່ນອ້ອມຈຳນວນຫລາຍ ຈັດໂດຍປະເທດສະມາຊິກ ແລະ ຫນ່ວຍງານທີ່ກ່ຽວຂ້ອງຕ່າງໆ.
ໃນຕອນບ່າຍ ຂອງ ວັນທີ 14 ກໍລະກົດ 2017 ທີ່ ກະຊວງການຕ່າງປະເທດ, ສະຫະພັນແມ່ຍິງກະຊວງການຕ່າງປະເທດ ໄດ້ຈັດພິທີສະເຫຼີມສະຫຼອງວັນສ້າງຕັ້ງ ສະຫະພັນແມ່ຍິງລາວ ຄົບຮອບ 62 ປີ (20 ກໍລະກົດ 1955 - 20 ກໍລະກົດ 2017), ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ນາງ ຄໍາເພົາ ເອີນທະວັນ, ຄະນະປະຈໍາ ພັກກະຊວງ, ຮອງລັດຖະມົນຕີກະຊວງການຕ່າງປະເທດ, ມີຄະນະພັກກະຊວງ, ຄະນະສະຫະພັນແມ່ຍິງກະຊວງ, ຄະນະກົມ, ຄະນະພະແນກ, ຜູ້ຕາງໜ້າຈາກສາມອົງການຈັດຕັ້ງມະຫາຊົນ, ປ້າບໍານານ, ສະມາຊິກສະຫະພັນແມ່ຍິງ ແລະ ພະນັກງານຊາຍຈາກກະຊວງການຕ່າງປະເທດເຂົ້າຮ່ວມ ລວມທັງໝົດ 400 ກວ່າຄົນ.
ໃນວັນທີ 13 ກໍລະກົດ 2017, ທີ່ ນະຄອນຫລວງວຽງຈັນ, ທ່ານ ຄິໂຢຊິ ໂອດາວາຣະ (Mr. Kiyoshi ODAWARA),ສະມາຊິກສະພາຕ່ຳ, ຮອງລັດຖະມົນຕີກະຊວງການຕ່າງປະເທດຝ່າຍລັດຖະສະພາຍີ່ປຸ່ນ, ໄດ້ ພົບປະກັບ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໃນໂອກາດທີ່ທ່ານ ພ້ອມດ້ວຍຄະນະ ເດີນທາງມາຢ້ຽມຢາມ ສປປ ລາວ, ໃນລະຫວ່າງວັນທີ 12-13 ກໍລະກົດ 2017.