ໃນຕອນບ່າຍ ຂອງ ວັນ​ທີ 14 ກໍ​ລະ​ກົດ 2017 ທີ່ ​ກະຊວງ​ການ​ຕ່າງປະ​ເທດ, ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​​ໄດ້​ຈັດ​ພິທີ​ສະ​ເຫຼີມສະຫຼອງວັນສ້າງ​ຕັ້ງ ​ສະ​ຫະ​ພັນ​ແມ່​ຍິງ​ລາວ​ ຄົບ​ຮອບ 62 ປີ (20 ກໍ​ລະ​ກົດ 1955 - 20 ກໍລະກົດ 2017), ໂດຍການເປັນ​ກຽດເຂົ້າ​ຮ່ວມເປັນປະທານ​ຂອງ ທ່ານ ນາງ ຄໍາເພົາ ເອີນທະວັນ, ຄະນະປະຈໍາ ພັກກະຊວງ, ຮອງລັດຖະມົນຕີກະຊວງການຕ່າງປະເທດ, ມີຄະນະພັກກະຊວງ, ຄະນະສະຫະພັນແມ່ຍິງກະຊວງ, ຄະນະກົມ, ຄະນະພະແນກ, ຜູ້ຕາງໜ້າຈາກສາມອົງການຈັດຕັ້ງມະຫາຊົນ, ປ້າບໍານານ, ສະມາຊິກສະຫະພັນແມ່ຍິງ ແລະ ພະນັກງານຊາຍຈາກກະຊວງການຕ່າງປະເທດເຂົ້າຮ່ວມ​ ລວມທັງໝົດ 400 ກວ່າຄົນ.

ໃນ​ພິ​ທີສະເຫຼີມສະຫຼອງດັ່ງກ່າວ, ​ທ່ານ ນາງ ພິມ​ພາ ​ແກ້ວ​ມີ​ໄຊ, ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ ສະໄໝທີ 7, ປະທານ​ສະຫະພັນແມ່ຍິງກະຊວງການຕ່າງປະເທດ ໄດ້ສະ​ເໜີ​ເອ​ກະ​ສານມູນເຊື້ອ ວັນ​ສ້າງ​ຕັ້ງສະ​ຫະ​ພັນ​ແມ່​ຍິງ​ລາວ ຄົບ​ຮອບ 62 ປີ. ຫຼັງຈາກນັ້ນ, ທ່ານ ນາງ ຄໍາເພົາ ເອີນທະວັນ, ຄະນະປະຈໍາພັກກະຊວງ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້​ກຽດ​ຂຶ້ນໂອ້ລົມຕໍ່ພະນັກງານທີ່ມີໜ້າເຂົ້າຮ່ວມໃນພິທີ ເຊິ່ງທ່ານ ໄດ້ເນັ້ນເຖິງຄວາມສະເໜີພາບ ລະຫວ່າງ ຍິງ-ຊາຍ ແລະ ໜ້າທີ່ຂອງແມ່ຍິງລາວທີ່ຄວນປະຕິບັດ ເປັນຕົ້ນບັນດາມະຕິຄຳສັ່ງ ແລະ ກົດໝາຍພາຍໃຕ້ການຊີ້ນຳ-ນຳພາຂອງ ພັກ-ລັດຖະບານ ໃນໄລຍະໃໝ່.

​ນອກ​ຈາກ​ການ​ຈັດ​ຕັ້ງພິທີສະເຫຼີມສະຫຼອງຄັ້ງນີ້, ສະ​ຫະ​ພັນ​ແມ່​ຍິງ​ກະ​ຊວງ​ການ​ຕ່າງ​ປະ​ເທດຍັງ​ໄດ້ເຄື່ອນໄຫວ ກິດ​ຈະ​ກຳ​ຕ່າງໆ​ເຊັ່ນ: ເຂົ້າ​ຢ້ຽມ​​ຊົມ​ຫ້ອງ​ມູນ​ເຊື້ອ​ຂອງ​ສະ​ຫະ​ພັນ​ແມ່​ຍິງ​ລາວ, ຈັດຕັ້ງການແຂ່ງຂັນກິລາເຕະບານມິດຕະ ພາບເພດຍິງ ລະຫວ່າງ ບັນດາກົມພາຍໃນກະຊວງການຕ່າງປະເທດ ແລະ ຢ້ຽມຢາມບັນດາແມ່ປ້າອາວຸໂສບຳນານ. ພິທີສະ​ເຫຼີມສະຫຼອງວັນສ້າງ​ຕັ້ງ​ສະ​ຫະ​ພັນ​ແມ່​ຍິງ​ລາວ ຂອງກະຊວງການຕ່າງປະເທດ ໄດ້ດຳເນີນດ້ວຍບັນຍາກາດຟົດຟື້ນ ແລະ ມີຄວາມໝາຍ.