ໃນທ່າມກາງບັນຍາກາດທີ່ພາກສ່ວນຕ່າງໆ ທັງພາກລັດ ແລະ ເອກະຊົນ ກຳລັງຈັດຕັ້ງການປູກຕົ້ນໄມ້ ເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ, ກະຊວງການຕ່າງປະເທດ ໄດ້ຈັດຂະບວນການປູກຕົ້ນໄມ້ຂຶ້ນ ໃນຕອນເຊົ້າຂອງວັນທີ 1 ມິຖຸນາ 2017, ຢູ່ ບໍລິເວນຫໍພັກຂອງພະນັກງານກະຊວງການຕ່າງປະເທດ, ທີ່ ບ້ານວຽງແກ້ວ, ເມືອງໄຊທານີ, ນະຄອນຫຼວງວຽງຈັນ, ໂດຍການເຂົ້າຮ່ວມຂອງບັນດາທ່ານໃນຄະນະພັກ, ຄະນະນຳກະຊວງ ແລະ ພະນັກງານຂັ້ນຕ່າງຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ການຈັດຕັ້ງພິທີປູກຕົ້ນໄມ້ຄັ້ງນີ້ ແມ່ນກິດຈະກຳໜຶ່ງທີ່ມີຄວາມໝາຍສຳຄັນ ເພື່ອປະກອບສ່ວນຈັດຕັ້ງປະຕິບັດຄາດໝາຍດ້ານສິ່ງແວດລ້ອມ ທີ່ກອງປະຊຸມໃຫຍ່ ຄັ້ງທີ X ຂອງພັກວາງອອກ ແລະ ຍຸດທະສາດພັດທະນາປ່າໄມ້ ແຕ່ນີ້ຮອດປີ 2020 ໃນການປູກໄມ້ໃຫ້ໄດ້ 5 ແສນເຮັກຕາ ແລະ ເພີ່ມທະວີຄວາມປົກຫຸ້ມປ່າໃຫ້ໄດ້ 70 % ເພື່ອປົກປັກຮັກສາຊັບພະຍາກອນທຳມະຊາດ, ສິ່ງແວດລ້ອມ ແລະ ການນຳໃຊ້ຢ່າງມີປະສິດທິພາບ ຕາມທິດ ສີຂຽວ ແລະ ຍືນຍົງ ທັງເປັນການປະກອບສ່ວນເຮັດໃຫ້ນະຄອນຫຼວງວຽງຈັນ ມີເນື້ອທີ່ສີຂຽວປົກຫຸ້ມເພີ່ມຂຶ້ນ ຕາມທິດ “ສ” ສີຂຽວ, ພ້ອມທັງແນໃສ່ເຮັດໃຫ້ພື້ນທີ່ດັ່ງກ່າວ ມີຄວາມຮົ່ມເຢັນ, ອາກາດບໍລິສຸດສົດຊື່ນ ແລະ ມີສີຂຽວງາມ. ສຳລັບຕົ້ນໄມ້ທີ່ນຳມາປູກຄັ້ງນີ້ ປະກອບມີຕົນໄມ້ດູ່ລາຍ ແລະ ຕົ້ນດອກຄຸນ ລວມທັງໝົດຈຳນວນ 50 ຕົ້ນ.
ພ້ອມກັນນັ້ນ, ຄະນະທີ່ເຂົ້າຮ່ວມປູກຕົ້ນໄມ້ຄັ້ງນີ້ ຍັງໄດ້ບົວລະບັດຕົ້ນໄມ້ທີ່ປູກແລ້ວໃນປີຜ່ານມາ ແລະ ໄດ້ປູກເບ້ຍໄມ້ໃໝ່ ທົດແທນຄືນຕົ້ນທີ່ຕາຍໄປ ເພື່ອເຮັດໃຫ້ຕົ້ນໄມ້ໃຫຍ່ສູງ ແລະ ງົດງາມ ໃນເນື້ອທີ່ດິນທີ່ກຳນົດໄວ້ໃຫ້ເປັນພື້ນທີ່ສີຂຽວໃນບໍລິເວນຫໍພັກຂອງກະຊວງການຕ່າງປະເທດ.