ກອງປະຊຸມຄະນະກໍາມະການຊາຍແດນຮ່ວມ ລາວ-ຈີນ ຄັ້ງທີ XV ໄດ້ຈັດຂຶ້ນໃນລະຫວ່າງວັນທີ 23-24 ມັງກອນ 2018 ທີ່ ນະຄອນຫຼວງວຽງຈັນ, ສປປ ລາວ. ຄະນະຜູ້ແທນຝ່າຍລາວ ນໍາໂດຍ ທ່ານ ແພງສະຫວັນ ແກ້ວປະເສີດ, ຫົວໜ້າຫ້ອງການຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ແຫ່ງ ສປປ.ລາວ, ຫົວໜ້າຄະນະກໍາມະການຊາຍແດນຮ່ວມ ລາວ-ຈີນ ແລະ ຝ່າຍຈີນ ນຳໂດຍ ທ່ານ ນາງ ຫວາງເຫວີນລີ້, ຮອງຫົວໜ້າກົມກິດຈະການຊາຍແດນ ແລະ ທະເລ, ກະຊວງການຕ່າງປະເທດ ແຫ່ງ ສປ.ຈີນ, ຫົວໜ້າຄະນະກໍາມະການຊາຍແດນຮ່ວມ ຈີນ-ລາວ, ພ້ອມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງຂອງສູນກາງ ແລະ ແຂວງທີ່ມີຊາຍແດນຕິດຈອດກັບ ສປ ຈີນ.
ຄະນະຜູ້ແທນ ກົມການຂ່າວ ກະຊວງການຕ່າງປະເທດ ແຫ່ງ ສປປ ລາວ, ຈຳນວນ 10 ທ່ານ, ໄດ້ທຳການຢ້ຽມຢາມແລກປ່ຽນບົດຮຽນທັດສະນະສຶກສາ, ທີ່ ສປ ຈີນ, ແຕ່ວັນທີ 03-07 ມັງກອນ 2018, ຕາມການເຊື້ອເຊີນຂອງ ກົມການຂ່າວ ກະຊວງການຕ່າງປະເທດ ແຫ່ງ ສປ ຈີນ, ເຊິ່ງໄດ້ເດີນທາງໄປຢ້ຽມຢາມ ແລະ ທັດສະນະສຶກສາ ຢູ່ 03 ເມືອງ ຄື: ປັກກິ່ງ, ຊຽງໄຮ ແລະ ຄຸນມິງ.