ໃນວັນທີ 14 ມິຖຸນາ 2022 ທີ່ຜ່ານມາ, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສາທາລະນະລັດ ຟິລິບປິນ, ທ່ານ ສົງການ ຫລວງມຸນິນທອນ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳ ສາທາລະນະລັດ ຟິລິບປິນ ໄດ້ຕາງໜ້າໃຫ້ລັດຖະບານແຫ່ງ ສປປ ລາວ ມອບສານແຕ່ງຕັ້ງຂອງ ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃຫ້ແກ່ ທ່ານ ໂຈເຊັບ ກູ ຊີ (Joseph Cue Sy) ເພື່ອດຳລົງຕຳແໜ່ງເປັນກົງສູນກິຕິມະສັກ ແຫ່ງ ສປປ ລາວ ປະຈຳ ເກາະມິນດານາວ, ສາທາລະນະລັດ ຟິລິບປິນ, ໂດຍມີຂອບເຂດການເຄື່ອນໄຫວກົງສູນກວມເອົາ ເມືອງ ດາເວົາ ເດອໍຣໍ, ດາເວົາ ເດວນໍເຕດາເວົາ ເດວາຊີ, ດາເວົາ ອໍຣຽນໂທ ແລະ ດາເວົາ ອ໋ອກຊີແດນໂທ, ຊຶ່ງຈະມີພິທີເປີດຫ້ອງການກົງສູນກິຕິມະສັກ ທີ່ເມືອງດາເວົາ, ເກາະມິນດານາວ ໃນໄວໆນີ້.
ວັນທີ 13 ມິຖຸນາ 2022, ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ຈັດພິທີເປີດບັ້ນແຂ່ງຂັນ “ຊອກຮູ້ກ່ຽວກັບປະຫວັດສາດການພົວພັນແບບພິເສດ ລາວ-ຫວຽດນາມ, ຫວຽດນາມ-ລາວ” ປີ 2022.
ໃນວັນທີ 14 ມິຖຸນາ 2022, ທີ່ ກະຊວງການຕ່າງປະເທດ, ທ່ານ ສີສຸພັນ ມະນີວັນ, ຮອງຫົວໜ້າກົມກົງສຸນ ໄດ້ຕາງຫນ້າໃຫ້ກົມກົງສຸນ, ກະຊວງການຕ່າງປະເທດ ໃຫ້ສຳພາດຕໍ່ ບັນດາສື່ມວນຊົນລາວ ເພື່ອໃຫ້ຂໍ້ມູນ ແລະ ຊີ້ແຈງເຖິງສະພາບການຕົວຈິງ ໃນການເຮັດຫນັງສືຜານແດນຂອງພົນລະເມືອງລາວ ໃນໄລຍະປະຈຸບັນ ພາຍຫລັງການລະບາດຂອງພະຍາດ ໂຄວິດ 19 ຫລຸດລົງ ຢູ່ ສປປ ລາວ ກໍ່ຄືຕ່າງປະເທດ ໂດຍສະເພາະປະເທດເພື່ອບ້ານໃກ້ຄຽງ ໄດ້ເປີດປະເທດ ສຳລັບການເຂົ້າ-ອອກປະເທດຄືນໃຫມ່, ສຳລັບ ສປປ ລາວ ແມ່ນເລີ່ມແຕ່ວັນທີ 9 ພຶດສະພາ 2022 ເປັນຕົ້ນມາ ຊຶ່ງເຮັດໃຫ້ມີປະຊາຊົນຈໍານວນຫລວງຫລາຍຕ້ອງການເດີນທາງໄປຕ່າງປະເທດ ອັນເປັນເຫດເຮັດໃຫ້ປະຊາຊົນຈໍານວນຫລາຍເດີນທາງມາຈາກຕ່າງແຂວງ ມາຍື່ນຄຳຮ້ອງຂໍຫນັງສືຜ່ານແດນຢູ່ກົມກົງສຸນ ທີ່ນະຄອນຫລວງວຽງຈັນ ຈຶ່ງເກີດມີສະພາບຄວາມອັ່ງອໍຂອງປະຊາຊົນເປັນຈຳນວນຫລາຍ ດັ່ງທີ່ເຫັນເປັນຂ່າວໃນສື່ອອນລາຍນັ້ນ.