ໃນວັນທີ 20 ກັນຍາ 2023 ທີ່ ນິວຢອກ, ສ.ອາເມລິກາ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອງຂອບການຮ່ວມມືແຫ່ງອາຊີ (ACD) ຄັ້ງທີ 18, ໂດຍພາຍໃຕ້ການເປັນປະທານຂອງ ຣາຊະອານາຈັກ ບາເຣນ, ຊຶ່ງມີບັນດາລັດຖະມົນຕີຕ່າງປະເທດ ແລະ ຜູ້ຕາງໜ້າຈາກປະເທດສະມາຊິກເຂົ້າຮ່ວມຢ່າງພ້ອມພຽງ. ຈຸດປະສົງຂອງກອງປະຊຸມດັ່ງກ່າວແມ່ນເພື່ອທົບທວນການຈັດຕັ້ງປະຕິບັດວຽກງານ ACD ໄລຍະຜ່ານມາ ລວມທັງຮັບຟັງທັດສະນະຕ່າງໆຈາກປະເທດສະຊິກ ກ່ຽວກັບ ສະພາບການພາກພື້ນ ແລະ ສາກົນ ພາຍຫຼັງການແຜ່ລະບາດຂອງພະຍາດໂຄວິດ-19 ແລະ ທິດທາງການຮ່ວມມືໃນຕໍ່ໜ້າ. ໃນໂອກາດດັ່ງກ່າວ, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ມີຄຳເຫັນຕໍ່ກອງປະຊຸມ ຮ່ວມກັບອີກ 21 ປະເທດ ຊຶ່ງໄດ້ຍົກໃຫ້ເຫັນສະພາບພາກພື້ນ ແລະ ສາກົນ ທີ່ກຳລັງປະເຊີນໜ້າກັບສິ່ງທ້າທາຍຮອບດ້ານ ທີ່ຮຽກຮ້ອງໃຫ້ບັນດາປະເທດສະມາຊິກຕ້ອງສືບຕໍ່ເພີ່ມທະວີ ແລະ ຮ່ວມມືກັນ ພ້ອມທັງຊຸກຍູ້ການຈັດຕັ້ງປະຕິບັດບັນດາຂໍ້ລິເລີ່ມ ແລະ ກິດຈະກຳຕ່າງໆ ພາຍໃຕ້ຂອບການຮ່ວມມືໃຫ້ປະກົດຜົນເປັນຈິງ. ກອງປະຊຸມໄດ້ຮັບຮອງເອົາຖະແຫຼງການບາເຣນ (Bahrain Declaration) ແລະ ໄດ້ມີພິທີມອບ-ຮັບໜ້າທີ່ປະທານ ACD ລະຫວ່າງ ບາເຣນ (ຜູ້ເກົ່າ) ອີຣ່ານ (ຜູ້ໃໝ່). ພ້ອມນັ້ນ, ໄດ້ຮັບຟັງລາຍງານ ກ່ຽວກັບ ການກະກຽມເປັນເຈົ້າພາບຂອງກອງປະຊຸມສຸດຍອດ ຄັ້ງທີ 3 (The 3^rd ACD Summit) ໂດຍການເປັນເຈົ້າພາບຂອງປະເທດກາຕາ ພາຍໃຕ້ຄຳຂວັນ ການທູດກິລາ (Sport Diplomacy), ຊຶ່ງຈະຈັດຂຶ້ນໃນວັນທີ 18-19 ຕຸລາ 2023 ທີ່ ໂດຮາ, ປະເທດກາຕາ.

 ໃນວັນທີ 21 ກັນຍາ 2023, ທີ່ ນິວຢອກ, ສ.ອາເມລິກາ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ຮ່ວມກັບ ສາທາລະນະລັດ ໂດມິນີກັນ ໄດ້ເປັນປະທານຮ່ວມ (Co-chair) ໃນກອງປະຊຸມລັດຖະມົນຕີຕ່າງປະເທດສາມຝ່າຍ ຂອງເວທີປຶກສາຫາລືຂອບການຮ່ວມມື ລະຫວ່າງ ອາຊີຕາເວັນອອກ ແລະ ອາເມລິກາລາຕິນ ຄັ້ງທີ 5 (The 5^th FEALAC Troika) ເຊິ່ງມີບັນດາລັດຖະມົນຕີຕ່າງປະເທດ ແລະ ຄະນະຜູ້ແທນຈາກປະເທດສະມາຊິກ FEALAC Troika ເຂົ້າຮ່ວມ ຄື: ສປປ ລາວ, ສ.ໂດມິນິກັນ, ສ.ເກົາຫຼີ, ໄທ, ກົວເຕມາລາ ແລະ ໂກສະຕາຣິກາ. ຈຸດປະສົງຂອງກອງປະຊຸມ ແມ່ນເພື່ອປຶກສາຫາລືຂອບການຮ່ວມມືດັ່ງກ່າວ ໃຫ້ໄດ້ຮັບການຈັດຕັ້ງປະຕິບັດໃນຫ້ເປັນຮູບປະທຳຍິ່ງຂຶ້ນ ໂດຍສະເພາະແມ່ນຂອບການຮ່ວມມື ລະຫວ່າງ ສອງພາກພື້ນອາຊີຕາເວັນອອກ ແລະ ອາເມລິກາລາຕິນ ໃຫ້ມີປະສິດທິຜົນກວ່າເກົ່າ. ໃນກອງປະຊຸມຄັ້ງນີ້ ຍັງໄດ້ຮັບຟັງການລາຍງານຄວບຄືບໜ້າການຈັດຕັ້ງປະຕິບັດ ບັນດາວຽກງານຕ່າງໆຜ່ານມາ ເປັນຕົ້ນ: ຜົນກອງປະຊຸມຂອງກອງເລຂາອິນເຕີເນັດ FEALAC ຄັ້ງທີ 13 ປີ 2023, ກອງທຶນ FEALAC Trust Fund, ແລະ ການກະກຽນເອກະສານແນວຄວາມຄິດ ກ່ຽວກັບ ກົນໄກໝູນວຽນການເປັນປະເທດປະສານງານປະຈຳພາກພື້ນ ທີ່ເປັນຂໍ້ລິເລີ່ມຂອງ ສປປ ລາວ. ໃນໂອກາດນີ້, ທ່ານ ຮອງລັດຖະມົນຕີ ໄດ້ແຈ້ງໃຫ້ກອງປະຊຸມຊາບ ກ່ຽວກັບ ສປປ ລາວ ສະເໜີເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ຄັ້ງທີ 22 ໃນຮູບແບບທາງໄກ ເພື່ອຮັບຮອງເອົາເອກະສານດັ່ງກ່າວຂ້າງເທິງ ຄາດວ່າຈະຈັດຂຶ້ນໃນເດືອນມັງກອນ 2024. ກອງປະຊຸມ FEALAC Troika ແມ່ນກອງປະຊຸມລັດຖະມົນຕີຕ່າງປະເທດ FEALAC ແບບ 3 ຝ່າຍ ຄື: ປະເທດປະສານງານຜູ້ເກົ່າ, ຜູ້ປະຈຸບັນ ແລະ ຜູ້ຕໍ່ໄປ ປະຈຳແຕ່ລະພາກພື້ນ, ເຊິ່ງຈະຈັດຄຽງຄູ່ກັບກອງປະຊຸມສະມັດຊາໃຫຍ່ ຂອງ ສປຊ ໃນເດືອນກັນຍາ ຂອງທຸກໆປີ.

ວັນທີ 29 ກັນຍາ 2023, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ເປັນປະທານກອງປະຊຸມປຶກສາຫາລື ລະຫວ່າງ ຫົວໜ້າເຈົ້າໜ້າທີ່ອາວຸໂສຂອງສາມເສົາຄໍ້າປະຊາຄົມອາຊຽນ ຂອງ ສປປ ລາວ ເພື່ອປຶກສາຫາລື ແລະ ສັງລວມບູລິມະສິດ ສຳລັບ ການເປັນປະທານອາຊຽນ ຂອງ ສປປ ລາວ ປີ 2024.