ໃນລະຫວ່າງວັນທີ 11 - 14 ກັນຍາ 2023, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຄັ້ງທີ່ 11, ຈັດຂື້ນທີ່ ເຊີແນວ, ປະເທດສວິດສ.

ສປປ ລາວ ໃນນາມປະເທດລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ (Convention on Cluster Munitions - CCM) ໄດ້ເຂົ້າຮ່ວມກອງະຊຸມປະຈຳປີເພື່ອລາຍງານຄວາມຄືບໜ້າການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໂດຍຄັ້ງນີ້ ທ່ານ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ໃນນາມຫົວໜ້າຄະນະ ໄດ້ກ່າວຄຳເຫັນໃນພາກອະພິປາຍທົ່ວໄປ ໂດຍໄດ້ຢ້ຳຄືນນະໂຍບາຍ ແລະ ຄວາມໝາຍໝັ້ນທາງການເມືອງຂອງ ສປປ ລາວ ໃນນາມປະເທດທີ່ໄດ້ຮັບຜົນກະທົບຈາກລະເບີດລູກຫວ່ານຫລາຍທີ່ສຸດໃນໂລກ ທີ່ໄດ້ສະໜັບສະໜູນ ແລະ ໃຫ້ຄວາມສຳຄັນຕໍ່ສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ໃນການປົກປ້ອງຊີວິດຂອງປະຊາຊົນ ຈາກລະເບີດບໍ່ທັນແຕກ. ພ້ອມດຽວກັນນັ້ນ ຄະນະຜູ້ແທນ ສປປ ລາວ ກໍ່ໄດ້ລາຍງານການຈັດຕັ້ງປະຕິບັດການສຳລວດ ກວດກູ້ ລະເບີດບໍ່ທັນແຕກ (ລບຕ), ການຊ່ວຍເຫລືອຜູ້ຖືກເຄາະຮ້າຍ, ການຜັນຂະຫຍາຍສົນທິສັນຍາສາກົນເຂົ້າໃນນິຕິກຳພາຍໃນ ເພື່ອຮັບປະກັນການແກ້ໄຂບັນຫາລະເບີດບໍ່ທັນແຕກໃຫ້ມີປະສິດທິພາບ ແລະ ປະສິດທິຜົນ. ໃນໂອກາດດັ່ງກ່າວ ຄະນະຜູ້ແທນ ສປປ ລາວ ກໍ່ໄດ້ສະແດງຄວາມຂອບໃຈຕໍ່ບັນດາປະເທດຄູຮ່ວມພັດທະນາ ແລະ ອົງການຈັດຕັ້ງສາກົນທີ່ກ່ຽວຂ້ອງໃນການຮ່ວມມື ແລະ ສະໜັບສະໜູນ ສປປ ລາວ ໃນວຽກງານການແກ້ໄຂບັນຫາລະເບີດບໍ່ທັນແຕກ ຢູ່ ສປປ ລາວ ແລະ ຮຽກຮ້ອງໃຫ້ວົງຄະນະຍາດສາກົນສືບຕໍ່ຊ່ວຍເຫລືອປະເທດທີ່ໄດ້ຮັບກະທົບຈາກລະເບີດລູກຫວ່ານ ເພື່ອສືບຕໍ່ປົກປ້ອງຊີວິດປະຊາຊົນ ແລະ ອຳນວຍຄວາມສະແດວກໃຫ້ການປະຕິບັດຕາມເປົ້າໝາຍການພັດທະນາແບບຍືນຍົງ.

ນອກຈາກການປະກອບຄຳເຫັນລາຍງານຕໍ່ກອງປະຊຸມແລ້ວ, ຄະນະຜູ້ແທນກໍ່ໄດ້ມີການພົບປະສອງຝ່າຍກັບຫລາຍພາກສ່ວນ ໂດຍສະເພາະແມ່ນການປຶກສາຫາລືກັບກອງເລຂາສົນທິສັນຍາເພື່ອກະກຽມບົດລາຍງານການຕໍ່ໄລຍະເວລາການຈັດຕັ້ງປະຕິບັດມາດຕາ 4 ໃນການສຳຫລວດ ກວດກູ້ ລະເບີດບໍ່ທັນແຕກ ພາຍໃຕ້ສົນທິສັນຍາ CCM ທີ່ ສປປ ລາວ ມີພັນທະໃນການສົ່ງບົດສະເໜີຂໍຕໍ່ໄລຍະເວລາດັ່ງກ່າວໃນປີ 2024.

ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ເປັນສົນທິສັນຍາສາກົນທີ່ໄດ້ຖືກຮັບຮອງໃນປີ 2009 ແລະ ສປປ ລາວ ເປັນປະເທດທີ່ສອງທີ່ໄດ້ລົງນາມ ແລະ ໄດ້ເປັນເຈົ້າພາບຈັດກອງປະຊຸມຄັ້ງລັດພາຄີສົນທິສັນຍາ CCM ຄັ້ງທຳອິດໃນປີ 2010 ທີ່ນະຄອນຫຼວງວຽງຈັນ. ປັດຈຸບັນ ສົນທິສັນຍາ CCM ມີລັດພາຄີຈຳນວນ 112 ປະເທດ.